تفضل احجز عن طريق موقع طيران إيرأسيا بالعربي
http://www.airasia.com/sa/ar/home.page
بالنسبة للعفش مافيه عندهم وزن مجاني لازم تدفع للوزن الآن وقت الحجز حسب توقعك لوزن عفشك تقريبا وزود ولا تنقص
بالنسبة للتكلفة رخيصة
إذا أنتم نفرين رايحين جايين تكلفكم التذاكر تقريباً 800 ريال

وليش ياخوي ماتجرب الباص السياحي إيرولاين؟
أنا رحت ماليزيا عدة مرات وكنت أتنقل فيها بالطيارة
آخر مرة كانت من حوالي الشهر وفضلت أجرب الباص السياحي من كثر الكلام عنه
الصراحة تجربة مثيرة وجميلة جداً وممتعة ولا حسيت بالوقت شلون مر
مقاعد الباصات مريحة جداً وفخمة وأفخم من المقاعد اللي بالطيارة
ويقدمون لك وجبة وشاي وكوفي وماي على طول الطريق
وسماعات أحسن من اللي في الطيارات وشاشات تعرض كارتون وأفلام وألعاب منوعة
الطريق ياخذ من 4 إلى 5 ساعات لكن ولا حسينا فيه من جمال المناظر اللي مرينا عليها
مع فترة توقف إستراحة وكل هذي ب 60 رنغت فقط لاغير يابلالالالالاش
ولو فكرت فيها وقلت بالطيارة أريح وأوفر للوقت أنا باقول لك لا والله مابتوفر وايد
إذا بتروح المطار لازم تكون قاعد قبلها بثلاث ساعات أو أكثر
ساعة ونص تتجهزون وتجهزون شنطكم وساعة الطريق إلى المطار وساعة أو ساعة ونص قبل الإقلاع وساعة من المطار إلى الفندق
يعني هالأربع أو خمس ساعات هي نفسها اللي بتقضيها وإنت منسدح براحتك وحوالينك الماء والخضرة والوجه الحسن
وبتدفع لشخصين روحة ورجعة 240 رنغت فقط لا غير

السلام عليكم ورحمة الله وبركاته اسعد الله صباحكم بكل خير
بالنسبة للباص السياحي يطلع للنكاوي

اخوي ماجد
الاراء والاقتراحات تختلف من شخص لشخص
انت وش تفضل ؟؟ تبي الخضرة والمناظر واجواء الطرق البريه الجميلة فأختي كرستاله عطتك الحل
او تحب التنقل جو عشان توصل بسرعه وراحة من عناء السفر فأخوي المغادرون عطاك الحل
قرر وش اللي تبيه وتوكل على الله
للحجز على الطيران مثل ماتفضل اخوي المغادرون نزل لك الرابط لموقع اير اسيا بالعربي تدخل وتحجز وبيكون السعر رخيص جدا طبعا انتبه للوزن لازم تشتريه ويكون اقل وزن 15 كيلغ ب25 رينقت-- واكبر وزن 40 كلغ ب110 رينقت
طبعا المعروف عن هذا الطيران انه كل ماقربت الرحلة زاد سعرها يعني حاول تحجز من بدري مع توفير
لابد من وجود بطاقة فيزا
دمت في رعاية الله ،،،

a3noood
اختي عنود
بعد اذن اختي كرستاله راح اجاوبك
طريقة الانتقال من كوالا الى للنكاوي فقط عن طريق الطيران لأنها جزيرة معزوله بريا عن اي مدينة ثانية
والانتقال من لنكاوي الى بينانق عن طريق الطيران جوا أو عن طريق العباره (الفيري) بحرا
طبعا من بينانق الى كوالا هو نفس الباص اللي تتكلم عنه اختي كرستاله
دمتي في رعاية الله ،،،

الله يجزاكم خير جميعا
أحرجتموني بطيبكم وكرمكم .
https://artravelers.com/ المغادرون 2007 / كرستالة
ألف شكر لكم
عندي استفسار بالنسبة للباص السياحي
من الكلام أنه كويس وتجربة جميلة
لكن وين مكانه وكيف طريقة الحجز فيه .؟
وهل هو آمن لو رحت أنا وزوجتي ؟

الله يعطيكم العافيه
ان شاء الله راح احجز من تاريخ 15/6 ذهاب فقط الى لنكاوي3 ليالي بلنكاوي
ومن 18 ذهاب فقط الى بينانق طيران طبعاً 3 ليالي ببينانق
ومن 21 الى لنكاوي عن طريق الباص السياحي

a3noood
عزيزتي الأخ الكريم ماقصر عطاج الإجابة الوافية

majid2020
في لنكاوي ماعندي خبرة الصراحة على قد زياراتي المتكررة إلا إني مارحتها
بس أنا جربت باصات الإيرولاين في رحلتي من سيلانغور إلى بينانغ ومن بينانغ إلى كوالالمبور
في سيلانغور شريت التذاكر قبل الرحلة بيوم من مكتبهم المقابل للبوابة الرئيسية لملاهي الصنواي لاغون
ولما وصلت بينانغ نزلونا عند محطة باصات الأيرولاين (كوينسبي مول) وقبل ماروح الفندق شريت تذاكر الذهاب إلى كوالالمبور
ومستوى الأمان كان ممتاز ولله الحمد والشكر والباص كان عامر بالعوايل عرب وأجانب وكل شي كان سهالات وإستانسنا بصراحة