المنتدى عن طريق اعضاءه ومشرفينه يوفر لك النصيحة والمشورة والارشادات ،، وما يتكفل بترتيب سفرك لانه ليس جهة رسمية تجارية تقدم خدمات مدفوعة ،،
يعني ممكن نسوي لك جدول لرحلتك شامل السكن والرحلات السياحية واماكن التسوق وكل شي ،، وكل اللي عليك تنفذ اللي يجيك بالجدول وتقوم بحجز التذاكر والفنادق من النت والتذاكر الداخلية من النت ايضا ،،
شرط وضع عدد ايام الرحلة و بأي شهر راح يكون السفر وكم ميزانية السفرة و كم ميزانية السكن لليلة الواحدة ،،

يزاك الله الخير اخويي
ان شاء الله راح انسق واكلمكم متى السفر
شو رايك بمنتدى رحلات تايلند ؟
ينسقون الرحله شامله !!

نعم المنتدى اللي ذكرته ينسق رحلة كاملة شاملة سكن ورحلات ومواصلات ،،
لكن لهم نسبة فوائد وطبعا هذا حقهم نظير خدمتهم ،،
لكن احنا نرتب لك رحلتك بدون مقابل وفوائدنا هي دعواتك لنا بالتوفيق والنجاح
يعني يكفي تكون عندك بطاقة فيزا او ماسترد كارد حتى تقوم بحجوزات السكن والطيران لوحدك والباقي كل راح ننسقه لك يوم بيوم وما عليك الا انك تركب الطيارة وتروح وترجع بالسلامة

كفوو
ماا عليك زود والله
المشكله كيف بقدر اتواصل معاكم لو رحت !
لأن الاب توب ما بيكون موجود

ما يحتاج تتواصل عزيزي ،،
مجرد تعطينا مدة الرحلة كم يوم؟ + كم شخص مسافر + ميزانية الرحلة كاملة بدون احتساب سعر التذاكر الدولية + ميزانية السكن للية الوحدة كم ؟
راح نرتب لك رحلة كاملة ومع وضع عدد من الفنادق اللي تناسب ميزانيتك وعليك الاختيار وايضا راح نرشح لك الرحلات السياحية وكيف تحجزها و ايضا راح نعطيك اسماء اماكن التسوق وغيرها ،،
كل هذا راح يكون مكتوب وانت اللي عليك فقط انك تطبع الجدول وتاخذه معك وتمشي عليه خلال رحلتك ،، والسكن والطيران الداخلي تحجزه بنفسك عن طريق النت طبعا بعد ما تشتري التذاكر الدولية .

السلام عليكم
بعد اذن صاحب الموضع اذا يسمح
ولد البحرين انا مسافر يوم 21/4 وراجع ان شاء الله 6/5 (15 يوم )
اربعه اشخاص المزانيه 24000 بدون التذاكر الدوليه (كيف الميزانيه وعلى فكره ترى نصرف ويمكن ماتكفي )
طبعا شباب ومستحيل نتقيد ببرامج بس مابعد حجزنا فنادق احسن الفنادق المناسبه من حيث الاسعار والامان (بتايا)
ووش الاماكن الي تنصحنا نزورها ولا برامج سياحيه ولا اي شي تزودنا به
وبالليل وش الاماكن الحلوه الي ممكن نسهر فيها واي شي يطلع من خاطرك وراح ندعيلك ياغالي
اكرر اسفي من صاحب الموضوع مره ثانيه

قلوب مسافره
ما وضحت لي عزيزي المبلغ المذكور بالريال او ايش ؟
الميزانية اذا بالريال لاربعة اشخاص او لكل شخص ؟ اذا للجميع فهي قليلة راح تكفيكم للسكن والتنقل وكم رحلة يعني راح يكون برنامجكم نوعا ما مضغوط لقلة الميزانية ،، يعني راح تروحون رحلات اقل و تستغنون عن التسوق نوعا ما ،،
انصح ترفعون الميزانية الى بحيث تكون ميزانية كل شخص 8000 ريال يعني المجموع 32000 ريال
والسكن يكون كل شخصين في غرفة من سريرين توفيرا للمال ،،
وانصحكم يتغيير الوجهة الى بوكيت بدلا من بتايا ،، صحيح بتايا شبابية اكثر واقل في الاسعار ،، لكن بوكيت متعة لا نهاية لها ورحلات سياحية كثيرة ومتنوعة من البحرية وغيرها ،، وخاصة بتايا انا خبرتي فيها قليلة وغير متخصص بها كونها جزيرة شبابية للسهر وفيها رحلات سياحية قليلة ولا تصلح للعوائل نوعا ما لذا انصح بالبعد عن هذه الاجواء
دام السفر 15 يوم اقترح التوزيع التالي مع حذف يومين للذهاب والعودة :
8 ايام بوكيت
5 ايام بانكوك
او اذا كنت مصر على بتايا ممكن نغير في ايام الرحلة كالتالي :
6 ايام بوكيت
4 بتايا
3 بانكوك
اذا ناسبك الموضوع وقدرت تزيد الميزانية رد علي وراح ارتب لكم سفرها كلها رحلات ووناسة وملاهي مع تسوق خفيف

مشكور اخوي ولد البحرين للتجاوب والتفاعل مع مشاركتي
المبلغ 24000 ريال وهذا المبلغ للسكن للوجبات الرئيسيه للرحلات لسهر المشترك
والتسوق واي شي شخصي كلن ومخباته وحسابه الشخصي
احنا حسمنا موضوعنا 7 ايام باتايا 5 بوكت 1 بانكوك
ياليت تعطيني الاماكن الحلوه والزينه نقدر نروح لها ب 5 ايام لاني لقيت اماكن واجد ورحلات واجد واحترت الصراحه يعني لو ترتب لي فقط الاماكن السياحيه من 1 الى 10 واكون شاكر لك .
واذا فيه شقق حلوه تنصح فيها
شكرا لك مره ثانيه

1. انصحكم بالرحلات رقم 1 +2 +3 +4 +5

افظل لكم الفنادق من الشقق ،، اساسا تايلند قليل فيها نظام الشقق وسعرها مرتفع شوي ،، لذا غرفة بسريرين ممتازة لكم ،،
افضل منطقة للسكن في بوكيت هي الباتونق بيتش لانها منطقة صاخبة للسهر ومتوفر فيها اسواق ومطاعم عالمية وعربية وحياة ليلية جميلة ،،
وانصح بالفنادق التالية في بوكيت:
بامبوري
توني ريسورت
بوبا بالاس
رايبوري
افضل الرحلات السياحية في بوكيت :
1-فانتزي شو ( رحلة مسائية من 6 الى 11 فيها عرض مسرحي حلو وبوفيه عشاء وصالة العاب مهارية )
2-بي بي ايلاند ( رحلة بحرية من الساعة 8 الى 5 مساء شاملة الغداء ويفضل الحجز في المركب الكبير )
3-جيمس بوند ايلاند ( رحلة بحرية من الساعة 7 الى 5 مساء شاملة الغداء ويفضل الحجز في المركب الكبير )
4-سفاري ايلاند ( رحلة روعة لنصف يوم شاملة ركوب الفيل والرافتينق في النهر و البانشيات وعليكم اختيار الرحلة تناسبكم لانها كذا برنامج لنفس المكان وكل ما زادت الفعاليات زاد السعر )
5-بوكيت زوو ( حديقة حيوانات وعروض حيوانات )
6-سبلاش جانقل ( ملاهي مائية )
7-رحلة منوعة ( ترتبها مع مكاتب السياحة شاملة سيارات الكارتينق + الرماية + زيارة مصانع العسل والكاجو وغيره )

انصحكم بالرحلات رقم 1 +2 +3 +4 +5

طبعا التسوق في بوكيت لديكم مجمع الجونسيلون تقدرون تروحونه مشي وفيه كارفور واسواق وفي المساء المنطقة تصير كلها اسواق ليلية ،، وهناك مجمع كبير اسمه سنترال فيستيفال يبعد عن الباتونق تقريبا 25 الى 30 دقيقة .