- الحركة ستكون حسب وقت الوصول اذا الوصول فى الفترة الصباحية
- جزر الأميرات
- اليوم الرابع
- اليوم السادس
زودتني إحدى الأخوات الفضليات بارك الله فيها (وهي الأخت Lamoon ، لأمانة النقل) ببرنامج مقترح لزيارتي المرتقبة بحول الله عز وجل إلى اسطنبول ، بتاريخ 10 /4 ، سؤالي يتمحور حول هل ثمة أي إضافات أو تعديلات من الخبراء الأفاضل على هذا البرنامج المقترح ، طمعا بمزيد من التجويد له ، وبارك الله لكم جهدكم.
نبدأ البرنامج بسم الله
اليوم الأول يوم الوصول
الحركة ستكون حسب وقت الوصول اذا الوصول فى الفترة الصباحية
عمل اجراءات دخول الفندق - التمشي حول الفندق للتعرف على المنطقة والتأكد من وجود بقالة صغيرونه تنفع وقت الزنقات.
النزول للغداء فى السلطان أحمد ثم الذهاب الى جراند بازار (السوق المسقوف). طبعا انتوا اصلا تعبانين من السفر بس السوق هذا قريب عليكم والتمشي فيه ممتع بس لاتشتروا منوا شي او كاسروهم كتير كتير يعني الشطة اللي يقولك عليها 600 ليرة قولها 100 ليرة ورح يوافق. ارجعوا على الفندق ارتاحوا وتعشوا عشاء خفيف يعني تروح البقاله وتشتري شوية جبنه ولبنه وبندورة وخيار وزيتون وخبز وكان الله بالسر عليم.
لاتنسى تاخد معك ابريق شاي على الكهرباء عشان تشربوا كاسة شاي مع العشاء. وعلى فكره هذا عشاكم كل يوم عشان تناموا خفيف وتقدروا تصحوا بكير.
اليوم الثاني
جزر الأميرات
تروح على محطة الترام وهناك حتلاقي كشك ببيع اشياء مختلفة اشتري من عنده كارت اسطنبول (بس واحد) وعبيه بخميس ليرة بياخدوا تأمين اعتقد 7 ليرة.
تطلع بالترام باستعمال كرت اسطنبول من لاليلي الى آخر محطة كاباتاش وهناك تنزل حتلاقي محطة الحجز الى جزر الأميرات وبرضه باستعمال كرت اسطنبول التذكرة 3 ليرة للشخص والعودة نفس الشى بس انتبه متى آخر رحلة عودة من هناك وضروري تاخد معك خبز عشان تطعمي طيور النورس. تنزل فى آخر جزيرة اسمها بيوك اضا وهناك فعلا رح تنبسطوا كتير . تاخدوا لفة بالحنطور ب 60 ليرة وتغدوا وديروا بالكم من بعض المطاعم اللي على البحر مباشرة مغلونجية.
بعد العودة ممكن تروحوا شارع الاستقلال فى تقسيم . لما تنزلوا من الباخرة فى كاباتاش تقطع الشارع رح تلاقي محطة المترو برضه بكرت اسطنبول رح تنزل فى تقسيم وتطلع رح تلاقي نفسك مقابل شارع الاستقلال. تعشوا وبعدين تمشوا واهم شىء لاتبقى بالليل هناك يعني 10 بالكثير تكون مروح من هناك.
اليوم الثالث
مسجد السلطان احمد و متحف ايا صوفيا وقصر توب كابي وخزانات المياة الرومانية
ممكن تمشي مشي من الفندق وممكن تاخد الترام وتنزل فى محطة السلطان احمد.
فى ايا صوفيا وتوب كابي فى زحمة على الطوابير بس ممكن تخلي زوجتك جالسه وانت واقف تنتظر (معلش متحيزة للنساء)
ضروري فى توب كابي تروحوا على الكوفي شوب اللي هناك بس لاتاكلوا غالي ومو طيب بس المنظر رائع .
وانتبه لايام الاجازات فى المتاحف رح تلاقيهم فى تقرير الأخ الغالي ابو سامر.
وكمان تحذير البسوا احذية رياضية مريحة جدا جدا جدا وأنصحكم بسكتشرز (Go Walk) لانه فى مشي كتير وفى وقفه كتير وصحيح انا عم بحكي عن 4 اماكن كلها جمب بعض بس متعبة جدا جدا. هلأ انتوا ممكن ترتاحوا فى حديقة السلطان احمد ممتعة ورايقة وفيها واي فاي كمان وطبعا بائعي السميت (خبز السمسم) والكستناء حتلاقيهم هناك كمان. وممكن تنغدوا فى نفس الشارع وتكملوا باقي المشوار. لما تخلصوا خدوا الترام على كاباتاش وهناك فى محطة باصات اطلعوا الباص رقم 25e أو الباص رقم 22reي وقول للسواق اورتاكوي. مكان رائع جدا جدا جدا كوفي شوبات وجلسات على البوسفور.
والعودة أحسن خد تاكسي عشان حتكونوا خلص فعلا تعبانين كتير بس خد التاكسي اللي عليه اسم شركة مو بس رقم لانهم مرتبطين بشركاتهم بلاسلكي.
اليوم الرابع
قصر دولمه بهجه - تاخد الترام الى كاباتاش، خلي البحر على يمينك واشي 5 دقائق حتلاقي القصر بوجهك رئع جدا وأنصحك تاخد مرشد سياحي بيحكي عربي لانه زحمه مره على قولة اخوانا السعوديين حبايبنا. لانك لما تاخد مرشد بتدخل اسرع وطبعا شرحهم رائع يعيشونك الجو.
بس تخلص الجولة ترجع على كاباتاش حتلاقي ختيار شكله هندي ببيع سندويشات كباب ولبن عيران والله اطيب اكله اكلتها فى اسطنبول.
ممكن من نفس الموقع تحجز جولة بحرية فى البوسفور او رحلة برج البنت Kiz Kulesi والرحلتين ممتعين بس ما بتقدر تستعمل كرت اسطنبول.
اليوم الخامس
تروح سبنجا تتنفق مع سواق وتكلفتها مع الديزل 250 دولار وتقوله ياخدك على البحيرة ثم مطعم ناتوركوي Naturkoy ثم الى منتجع جرين بارك بس ما تدخلوا بس اركبوا التلفريك وادعولي
اليوم السادس
السوق المصري تطلع بالترام وتنزل فى امينونو مقابلها السوق المصري (سوق بهارات وحركات حلوة)
بس تخلصوا ممكن تتغدوا هناك وبعدين ترجعوا على امينونو حتلاقوا محطة باصات اركبوا اي من باص رقم 399D - 399C - 44B - 36CE - 399B - 99 وبس تطلع بالباص تقولهايوب سلطان وهناك تنزل حتلاقي مسجد فيه قبر ابو أيوب الأنصاري تخليه على يسارك وتمشي شوي حتلاقي تلفريك تطلع فيه على مقهى بيرلوتي ما يقدم الا شاي وقهوة اجلسوا هناك وتذكرونا ولاتنسونا من صالح الدعاء. وطبعا العودة نفس الطريق بالعكس. والباص والتلفريك بكارت اسطنبول.
اليوم السابع
بورصة ممكن تروحوها مع شركة سياحية وبياخدوكم وبرجوعكم على الفندق.
اليوم الثامن
خلص هون صار لازم ودعكم ممكن تروح مسجد السليمانية قريب عليكم وتتمشوا شوي بالسلطان احمد وتحضروا الشنط للعودة الى أرض الوطن.
