1. السلام عليكم ورحمة الله وبركاته ..

السلام عليكم ورحمة الله وبركاته ..

صراحةً ما ادري من وين ابدأ .. لكن هالموضوع مبين من عنوانه اني ابي مشورتكم والكل يعرف هالمثل او الحكمه الي تقول "ماخاب من استشار " وانا جيت هنا واجزم اني ان شاء الله ابي احصل الي ابيه منكم وانتم منتب مقصرين معي..
الموضوع ومافيه , اني ناوي انا والعائله نسافر للنمسا لمدة اسبوعين او ثلاثة اسابيع بالعطله الصيفيه ان شاء الله وراح اخذ منكم استفسارات و ايضا مشورتكم بحكم ان البعض عنده خبره بهاك المناطق .. و حتى تكونون بالصوره عددنا 6 بالغين و 3 اطفال .. لكن وش افضل وقت للنمسا انه تكون السفره قبل الرمضان او بعده من ناحية الاسعار و الجو وايضاً ناحية الزحمات ..
الاستفسار الاول عن خطوط الطيران ..وشي افضل الخطوط من الرياض الى فرانك فورت وهل افضل اني اروح لفرانك فورت او اني اروح لفيينا ,طبعا يكون هناك مقارنة في الاسعار !
الاستفسار الثاني عن السيارة , النية ان شاء الله اننا نبي نستأجر سياره فأكيد ان هناك شركات كثيره , وشي ازين شركه باسعاره و ايضا بالامان والتعامل .؟
الاستفسار الثالث عن توزيع الايام بالمدن هناك وتكون الحصه الكبرى لزيل ام سي ..بحيث يكون هناك اريحيه بالتنقل لانه خبركم العائله الكبيره ماهي مثل الشباب او العوائل الصغيره ..
الاستفسار الثالث عن السكن وهو باعتقادي اهم شي بالسفر ,, طبعا في زيل ام سي او بالقرى القريبه منها لانه هي مقصدنا بالسفره ..وصراحة انا ودي بفيلا او شقه تكون من ثلاث غرف بس تكون واسعه ولها مطل حلو ..واللي يعرف شي او سكن بشيء حلو هناك لا يبخل علينا لا هنتوا ..
احس اني كثرت عليكم لكن الواحد ماوده يجزم ويخطط على شيء الا اذا اخذ المعلومات الكافيه .. الاستفسار الاخير هو عن المصاريف والاسعار هناك من غير الاكل لانه من الممكن اننا ناخذ عزبة طبخ وهذا الي يحبه الوالد بكل سفراته .. واقصد بالمصاريف : الاشياء الاستهلاكيه هناك من بنزين او ديزل وماء او متوسط اسعار بعض التذاكر والانشطه هناك ..
هذي كل استفساراتي وان كان فيه شيء مو واضح اسألوني اوضحه لكم