مرحبا اخوي التميمي 22 لو وضعت سؤالك في بوابة السعودية لكان افضل لان الاخوان في السعودية اخبر
في الطرق منا بحكم مجيئهم للإمارات ولو دورت في بوابة السعودية اكيد بتحصل الجواب وتقبل تحياتي

أنا سافرت إلى دبي برا أكثر من مرة ، وكان آخر شيء هو العام الماضي . بس للأسف أنا عيبي إني أنسى الأرقام لذلك راح تكون المسافات تقريبية وإذا فيه خطأ يصحح لي بقية الأعضاء.
وإنت ماشي مع طريق الرياض الدمام السريع وبعد تقريبا 300 كم راح تجيك لوحة كبيرة ( قطر - عمان - الامارات ) ومكتوب عليها ايضا ( الهفوف) وهو نفس مخرج (النعيرية ) بحيث النعيرية تروح مع الكبري يسار والهفوف يمين ، طبعا إنت راح تروح يمين والطريق هذا شبه سريع سيدين رايح وسيدين ىجاي وبينهم فراغ ترابي بالوسط ولا يوجد شبك على جوانب الطريق ، وبعد 150كم راح تاصل الهفوف ، وبصراحة أنا دايم اضيع بالهفوف بس اللي يساعدني إني عارف إن الطريق بالجهة الجنوبية الشرقية من الهفوف ، و أهلها ناس طيبين مجرد ما أسأل اي احد عند الاشارة يقول : خلك وراي وأوصلك ، وبعدين بداية الطريق من الهفوف تحصل اللوحات كلها مكتوب عليها (قطر) حتى إنك أحيانا تشك وتقول يمكن هذا مو طريق الامارات ، والطريق من الهفوف الى مخرج البطحا طريق اصبح مزدوج من العام الماضي وهو الآن سيدين رايح وسيدين جاي وبينهما فراغ ترابي ولا يوجد أيضا سياج وانتبه الى إنك تتزود بانزين بالهفوف وخذ بعض الحاجات الخفيفة للأطفال لأنه إلى البطحاء (300كم ) ما أذكر إني شفت ألا يمكن محطة واحدة متهالكة ( محطة الدجة والفلس ) ، عند الوصول الى البطحاء تجد على يسارك محطتان أحدهما سيسكو والأخرى ( أم نسيت ) وكلاهما محطاتان كبيرتان ويوجد عندهم غرف للتأجير بالساعة ( إذا ودك تريح أو تنام ) ، بعدين تدخل إلى منفذ البطحاء و أول شيء يجيك الجمارك توقف عنده وتعطيه الجواز والاستمارة و(أنت بسيارتك ما يحتاج تنزل ) وبعدين يسألك عن عدد الركاب ( من المهم تعطيه العدد بالضبط ولا تنسى أحد البزران ما تعده ) خذ الورقة وتأكد ان العدد مطبوع صح وانطلق الى الجوازات ( وأنت بالسيارة ) يختم الجواز ات وبعدين تمشي 20 متر تحصل صندقة صغيرة مكتوب عليها ( مطابقة النساء ) أعط أم العيال جوازها وخلها تدخل حيث تشاهدها الموظفة وتختم الجواز (شوهد ) ، وبعدين تستمر حتى آخر بوابة يتأكد العسكري من ختيم الجوازات ومطابقة النساء والعدد ويقول لك توكل على الله.
بعد تقريبا 2كم يجيك حدود الامارات وأول شيء الجوازات ( أيضا وأنت بالسيارة ) والنساء طبعا بدون مطابقة يعتمدون على الاجراءات السعودية ، وبعدين تتجه الى الجمارك وتلبق عندهم وتطفئ السيارة وتفتح الشنطة ، في أغلب الأحوال يمررون عفشك على جهاز الفحص ( مثل المطارات ) طبعا فيه عندهم عمال يشيلون ويرجعون ، واحيانا يطلب منك فتح شنطة او شنطتين وهي بالسيارة ويقول امش ، طبعا إنت راح تعطيهم الورقة اللي اخذتها من جمارك السعودية ، وبعد الجمارك خلاص انت في الامارات ، و بعد ما تطلع من الجمارك (20 متر ) تحصل على يسارك محلات صغيرة وهي شركات التأمين ، وهذا مهم حيث إن التأمين إجباري ولو ما سويت التأمين ترى لو حادث بسيط جدا يمكن تتعرض لمشاكل مالها اول ولا تالي وسعر التامين 100 ريال لخمسة أيام وإذا تبي تطول أمن على حسب مدة إقامتك ، وخذ كرت المحل وجرب بجوالك التلفون اللي موجود على الكرت عشان تتأكد إنه صحيح ولا هو قديم ، ( يوجد أكثر من شركة تأمين أنا اطب عليهم بالبركة احيانا تعجبني لوحتهم ، وأحيانا يعجبني الموظف وأحس انه شقردي ) ، وأيضا يوجد مكتب لحجوزات السكن والمفروض مسوي حجز السكن من الرياض أرخص وأضمن بس لو نسيت مر على هالمكتب وأحجز أول يوم على الأقل حتى تستقر وقد تستفيد من المكتب بالحصول على بروشورات لبعض الشقق وأماكنهم وطبعا سعر المكتب أرخص من لو إنك تمرهم شخصيا (تأكد من رقم المكتب لأني تورطت مرة معهم أرقامهم كلها خطأ بس اللي أفادني إني اتصلت على التأمين وقلت جيبو لي موظف المكتب ابيه ضرور ي)
المنطقة اللي أنت فيها الآن هي منفذ الغويفات وبعدها ب 5 كم تأتيك منطقة اسمها (السلع ) وهذا مهم جدا حيث إنك وأنت راجع ما راح تلاقي شيء اسمه السعودية ، أغلب اللوحات كلها (السلع أو الغويفات ) الطريق الآن الى مفرق ابو ظبي مزدوج ومشجر وجميع محطات البانزين راقية وفيها مطاعم نظيفة وكشخة والمساجد ودورات المياه على كيف كيفك ، بس البانزين عندهم 3 أنواع أنت خذ النوع الوسطي (عادي ، ممتاز، وسوبر) أو أسماء أخرى بس النوع الأوسط (أعتقد ممتاز ) هو مثل الذي بالسعودية بس فرق بالسعر (عسى الله يخلي لنا ابو متعب ويطول بعمره ) الى مفرق ابو ظبي 200كم تقريبا وبعدين الى دبي 150 كم تقريبا ، بس هناك مشكلة في دبي وهي ارتفاع اسعار السكن بشكل فاحش ، حيث أني كنت اسكن في العادة في استديوات وشقق مع عائلتي ب 200 ريال والعام الماضي هي نفسها اصبحت على 600 ريال يعني تضاعف السعر 3 مرات .
تمنياتي لك برحلة سعيدة

الله الرحمن الرحيم
يعجز اللسان ان يصف شعوري واعحابي وشكري العميق لكم واخص بالثناء على أخي حسون وسرعة تجاوبه ووصفة العالي واريد المزيد خرائط او ما يفيد
هذا ولكم تحياتي وتقديري وأسأل الله سبحانه وتعالى ان يوفقكم ويحميكم من كل مكروة وان يقضي حوائجكم
والسلام عليكم ورحمة الله وبركاته

السلام عليكم
اخواني الاعزاء اود سؤالكم حول طريق ذهابي من الدمام الى منفذ البطحاء بالتفصيل الممل
هل امر على الهفوف واتبع نفس الطريق المذكور اعلاه؟؟

70
030 !!

السلام عليكم
وشوله تتعب نفسك وتروح الاحساء وبعدين طريق البطحاء ليش ماتتجه للخرج وبعدين حرض تقريبا170كم بعدها تمسك طريق البطحاء ترى كذا اسرع وانادائما اذهب بهذالاتجاه اسرع ومختصر حتى الاخوان الاماراتيين دائما يسلكونه وآسف على الاطاله.

نصيحة:
ابعدوا عن طريق منتزة سعد او اي طريق اخر خطر
طريق خطر
لفات كثيررة + اسفلت متهالك + انواع التريلات + طريق ضيق= لا سمح الله
يا جماعة وخاصة العوائل:
ترى زيادة كم كيلو والدخول في طريق معروف وفيه اوادم ويمر على مدن يقدر السائق يريح فيها افضل مليون مرة من الاختصارات الي ممكن تتعب السائق نفسيا اكثر منه جسديا.
وبعدين تعالوا ناخذها بالمنطق:
الحين انت رايح دبي بالسيارة يعني تبي تقعد لك مو اقل من خمسة ايام
هالاختصارات وتوفير كم ساعة او ساعتين بيفرقون اذا وصلت دبي؟
او هل دبي تبي تطير مثلا؟
وصدقوني من تجربة طويلة اذا اسرع السائق وحاول يختصر ويساقط و.....
نعم راح يوصل بدري لكنه ما يدري ان ضيع على نفسه يوم كامل.
لانه اذا وصل بيكون ارهق نفسيا وعصبيا وراح يحتاج الى الراحة يوم كامل
اما لو مشى بامان وسرعة معقولة واخذها فلة وبساكيت وشاهي وقهوة وفرابتشينو....
راح يوصل والضحكة على كشرته
بعض الشباب يظن ان السفر عبارة عن حلبة فورملا 1 لازم يكسر رقم شوماخر من الرياض الى دبي.
ترى السفر اولا واخيرا هو متعة
على فكرة عشان ما تقولون شايب:
انا شاب وكنت واحد منهم الين ما جاني ولد وعقلت
ابعدوا عن اي طريق خطر
وتوصلون بالسلامة ان شاء الله