مشكور وماقصرت أخوي أبو عبد العزيز...على التنبيه
تحياتي

اخوي اول شي طريق حرض ما يصلح في النهار اوقات الصيف وانا سبق وحذرت من ذلك في اكثر المشاركات لزحف اللرمال الكبير ولان الشيولات ما تشتغل الا في اوقات المغرب.
والحمد لله على السلامه.
وهذا ما يعيب الطريق انك بغيت تصدم العيب انك ما تؤمن بالقضاء والقدر وان اللي صار لكم شي مكتوب .
المهم نصيحه للكل اذا ودك تروح الامارات في هذه الاوقات(الصيف) حاول انك تمشي في اوقات هدوء الرياح اي من الساعة 12 ليلا الى الساعة 12 ظهرا لان الشارع بيكون خلصت صيانته .

اخواني الاعزاء
اخونا الغالي ابو شل انا احترم رايك
واقدر المجهود اللي بذلته في سبيل
التعريف بهذا الطريق المختصر
لاكن حنا هنا اولا وقبل كل شي اخوان
ونحاول نستفيد من تجارب بعض
وترى رأيك وانتقادك لي يعني انك تحترمني
وكتابتي لهذا المقال عن تجربتي الشخصية
مع هذا الطريق ورايي الشخصي
لاينتقص من قدر احد او من مجهوده
انا مريت بتجربه ورايت اشياء سيئة
جدا ً في هذا الطريق من واجبي كمسلم
ان احذر اخواني المسافرين من الاخطار
الموجودة في هذا الطريق (المؤمن اخو المؤمن )
عموما ااخوي احب اوضح لك امر
اولا انا ما اعترضت على القضاء والقدر
واللي حصل لي ممكن يحصل في احسن الطرق
لاقدر الله ولاي انسان
لاكن انا ماارمي نفسي بالتهلكه واقول انا مؤمن بالقضاء والقدر
ياخي لنا في سيرة السلف الصالح قدوة
لما وقع الطاعون في عهد عمر رضي الله عنه
في احد مدن الشام ورفض دخولها قال له الصحابه
اتهرب من قدر الله قال نعم اهرب من قدر الله الى قدر الله
اخي العزيز انا قدامي طريقين واحد سيء والاخر جيد
اروح مع السيء عشان اكون مؤمن بالقضاء والقدر
بعدين انت تقول مايصلح بالنهار طيب انا اخوي
ودي اشوف الخط واتعرف عليه اكثر وهذا مايحصل الا بالنهار
وبعدين اللي لاحظته ان الطريق يكون بالليل اسواء بكثير
مثل ماقال اخونا المسافر راح ( ما انصح بالسير فيه ليلا)
ثانيا ياخي افرض ان معي عائلة ولا ابغى المشي بالليل
بعدين تقول الشيولات ماتشتغل الا المغر ب انا ماادري وين هالشيولات
ما شفت ولا واحد منهن الا واحد ومتعطل شكله
وافرض ان هالشيولات جت الله واكبر وش بتشيل وش بتخلي
اخوي اقولك جبال من الكثبان الرملية جبال في وسط الخط
وانت تقول تشتغل في الليل يعني الصباح القى الخط جاهز
وبعد الظهر دمران معقولة بها السرع يتم كل شيء
اخوي العزيز
(المهم نصيحه للكل اذا ودك تروح الامارات في هذه الاوقات(الصيف) حاول انك تمشي في اوقات هدوء الرياح اي من الساعة 12 ليلا الى الساعة 12 ظهرا لان الشارع بيكون خلصت صيانته .)
ياخي كلامك في محلة بس ترى اغلب الناس اجازاتها في الصيف
ومسالة الرياح على قولتك مامنها خوف لها الدرجه(حنا طالعين رحلة برية مو بحرية )
يعني ياما مشينا مع طرق وكلها هواء وغبار وزحف رملي
وكان الامر عادي بس مو بالشكل هذا
بعدين انا احاول احط في بالي كل الناس
ولا اقيس على نفسي بس
يعني الناس فيه منهم الكبير بالسن وفيه الصغيرالطايش...وفيه ضعيف النظر .....الخ
يعني انا حبيت انقل تجربتي الشخصية
من باب النصح لاخواني المسافرين
وبعدين هذا رايي وانا ماافكر بالرجوع مع
هذا الطريق الا اذا تمت صيانته بشكل معقول
وانت لك رايك اخوي وانا احترمه ولك من يؤيد رايك وانا
احترم راي الجميع
ومع فائق الشكروالتقدير لك اخوي وللجميع

جبل من الرمال على وشك الهجوم على الخط
هذي الصوره اللي قدرت اخذها قبل الليل
عموما ياكثر مايقابلك مثل هالجبل من الرمال
وفي وسط الطريق تمام

اخوي ابو عبدالعزيز الحمدلله على السلامه
انا جيت من دبي أمس ورحت وجيت مع طريق حرض
وسبق وجربته
وفعلاً الطريق خطير جداً
ولا يصلح تطلع معه وانت معاك عائله
عموما انا صورت الطريق وانا جاي كان الجو مغبر لأكثر من 200 كيلو ولعب في وجه سيارتي
هذي الصور

صوره تبين إنعدام الرؤيه حتى على مسافات قريبه يعني ما تقدر تمشي أكثر من 60كم/ساعه

صوره تبين تغطية الكثبان الرمليه لنصف الطريق

الكثبان الرمليه وقد غطت أكثر من نصف الطريق

كثبان رمليه في الطريق

أحب أقدم شكري للأخ أبو شل
على الخريطه اللي سواها فعلاً خريطه دقيقه ونفعتني في الطريق
وأتمنى من الأخ أبو شل عمل خريطه لطريق الرياض الإمارات عن طريق الإحساء

الله يسلمك
والف شكر لاخونا المهاجر
على التوضيح وصورك
ماشاء الله تحكي الواقع اللي شفناه
انا حاولت اني اخذ صور
تبين الواقع لاكن ما جاء فرصة
عموما الله يعطيك العافيه
على هالنصائح الغالية لاخوانك ما بقى شيء يحتاج توضيح
وانا عارف انك كان لك راي
من زمان ان طريق الاحساء
هو الافضل حتى لو زاد 200كم
لاكن في الاخير نقولها مره ثانية
حنا هنا اخوان ونستفيد من تجارب بعض
والغرض هو ايضاح الحقيقة بشكل اكثر واقعية وصدق
حتى لوكان على حساب اراءنا الشخصية
لان هناك الكثير الكثير من اخوانا اللي يطالعون المنتدى
ويحاولون الاستفاده من كل مايكتبه اعضاء المنتدى
ويعتبرونه مصدر معلومات لهم في السفر ربما يعتمدون عليه
عشان كذا الواحد لازم يحط في باله هالشيء
ويحاول ايصال الحقيقة بكل تفاصيلها
فلكل انسان زاوية ينظر من خلالها
تختلف عن الاخر
ولا ننسى المجهود اللي بذله اخونا العزيز ابو شل في اخراج خريطه
تفصيلية لهذا الطريق وياليت ويكون له السبق مره ثانية ونشوف
خريطه تفصيلية لطريق الاحساء
اكيد بيكون فيها جديد وشيء نافع لاخوانا المسافرين
شكري للجميع ولاخونا ابو شل و المهاجر على الايضاح

هلا أبو عبدالعزيز
أولاً : طريق حرض ومشكلة الرمال: لازم يعالجون هذي المشكله لأنها تتسبب في حوادث شنيعه ومميته
أتمنى لو تزرع على جانبي الطريق أشجار توقف زحف الرمال
مثل طريق الغويفات - أبوظبي
الطريق على مدى 370 كم مزروع بأشجار على الجانبين ومنعت وصول الرمال الزاحفه للطريق
ثانياً :الطريق ما بين الخرج وحرض سيء جداً والطبقه الأسفلتيه مرقعه لا بد من إعادة سفلتة الطريق وزيادة مساحة الأكتاف مثل طريق حرض - بطحاء
لأن الطريق ما بين الخرج وحرض ما فيه أكتاف
أتمنى من وزارة النقل تهتم أكثر لهذا الطريق لأن أكثر المواطنين و مواطني دول الخليج من حجاج وسياح يستخدمون الطريق وهو في غاية الخطورة