1. هذا اول منظر استقبلني وكنت سعيده حدي حدي حدي

سفره كانت اكثر من رائعه بدايتها كانت في برلين اللي بجد توفقنا فيها واجمل ذكرياتي كانت فيها
الصور راح تتكلم اكثر مني اذا تذكرت شي بقوله مقصدي من هذا التقرير اني اخليكم اتشوفون شكل برلين في ديسبمر والله روعه ومن الحين اقولكم الصور جدا جدا متواضعه بس انا لاني احب منتدى العرب المسافرون علشان كذا ودي افيد الكل لو بشي بسيط واسمحولي مقدما على القصور
سفرتنا كانت في شهر 12 بس كم بالضبط ماتذكر اختكم فيها نسيان عجيب غريب اسمحولي بس اللي اتذكره ان احنا رجعنا تاريخ 26 او 27-12 حضرنا الكريسماس وكان شي روعه مدة السفره تقريبا 16 او 17 يوم
الرحله كانت على القطريه الساعه 2 فالليل اقلعنا والوجهات كانت
برلين - روما - فيينا - كوبنهاجن-مالمو وكل التنقلات كانت بالطيران الاوروبي ... مفروض ان بعد فيينا انروح باريس بس دوم كل مانخطط انروح لها ماتكنتب لي ماعرف ليه رحت لها مره ومن قلب خاطري ارجع لها
انصحكم اتسون مثلنا نحجز بس حق اول محطه وبعدين واحنا هناك نقرر وين نبي انروح .. سوري دوشت لكم راسكم
المهم لكم ان تتخيلو فرحتي وانا رايحه المطار قمه في السعاده الحمدالله والشكر اللي يشوفني يقول ماقد سافرت
حجزنا كان على البزنس والطيران طبعا واكيد على القطريه احسن طيران في الشرق الاوسط

هاذي الصوره في المطار قبل لاتطير الطياره واسمحولي على الحوسه في الصحن ترى متشاركين انا وزوجي في صحن يابلفيت تخفيف
توقعت اني بنام في الطياره بس للاسف ماقدرت انام لان القطريه اذا الوجهه ماكانت عالميه مثل لندن او باريس او فرانكفورت يودون الركاب بطياره صغيره والسبب الاساسي أن الركاب شوي والبزنس فيها مب اوكي الكرسي مايقلب سرير ماعرفت انام وزوجي مشاءالله عليه نام وانا تميت قاعده يمكن نمت اقل من نص ساعه قمة التعب
وبحمد الله وصلنا بس شفت برلين سبحان الله دخلت قلبي وحبيتها من وانا في الطياره

هنا برلين تبتسم لي وتناديني وتقول تعالي بدون شعور شفت نفسي ابتسم وابي انزل بسرعه
مع ان المطار قديم وصغير بس مريح يجنن من الطياره على طول على باب المطار قريب ولما تدخلون المطار جنب الشرطه سير الشنط اقولكم يجنن المطار صغيرون احسن من المطارات الكبيره المتعبه

هاذي الصوره الوحيده اللي صورتها في المطار مع ان وصلنا الصبح بس مثل ماتعرفون في الشتا الشمس تتاخر لين تشرق
https://www.booking.com/hotel/de/concordehotelberlin_berlin.ar.html?aid=1300939
السكن كان في هذا الفندق .. احلى مافيه موقعه خطير والغرف وسيعه بس مايستحق 5 نجوم وهذا شي طبيعي على اوروبا والعيب الكبير ان الغرفه مافيها ارسال ابدا ابدا كنت اعاني اذا بكلم حد الارسال بس حبه وحده بس وترجع تختفي دوم لاصقه عند الدريشه احاول اصيد ارسال ولافي فايده لازم نطلع برى
بعد ماوصلنا الفندق قالوا لنا الشيك ان الساعه 2 الظهر واحنا واصلين الساعه 8 او 9 مادري اشلون راح عن بالنا نحجز ليله قبل والمشكله احنا مب لابسين ثقيل والدنيا برى ثلج وانا النوم لاعب فيني مانمت حاول زوجي فيها قالت بعطيكم غرفه على اساس تبدلون والشي الاهم احنا ماصلينا الصبح نبي نصلي .. عطتنا كرت الباب استانسنا في الاخير اطلعت كذابه قصدها انروح نادي صحي واحد للنسا والثاني للرجال وتعرفون هم ماعندهم خصوصيه عادي اي حد يدخل حتى مفتاح الباب مافي بس حظنا ان ماكان في حد حطيت فوطه وصليت عليها الله يتقبل يارب الوضع كان صعب جدا للصلاه مافي خشوع .. وبعدها لبسنا ملابسنا الشتويه وطلعنا ويامحلا برلين حب من اول نظره

هذا اول منظر استقبلني وكنت سعيده حدي حدي حدي

كنا نبي انضيع وقت رحنا تريقنا في كوفي شوب وحبيناه صرنا كل صبح نتريق فيه وبعدها شفنا باص سياحي مدته ساعتين قررنا نركبه علشان انضيع الوقت واول ماركبته قعدت اعيوني تسكر صرت انام وارجع اقوم ولاقمت اصور وبعدها ارجع انام

هذا سور برلين المشهور

اللي يميز برلين ان اكشاك الكريسماس في كل مكان بتشوفونها معاي في الصور الجايه وين ماتلفون وجهكم بتحصلون مجموعة اكشاك جد قمة المتعه منظر العيد وفرحة الناس بالعيد شي يبهج النفس

حبيت هالعجوز
الى هنا والنوم بدا يلعب فيني بكمل معاكم عقب .. سي يو