اكيد تستاهل الزياره
ابوظبي عاصمتنا الجميله وفيها اماكن سياحيه حلوه وترفيهيه واكيد المواصلات هناك بكثره
ونفس الشي العين اللي تزدهر بالاماكن السياحيه والتراثيه
مااعرف كم يوم بتزور الامارات ,,,بس ابوظبي يبغي لها ع الاقل يومين

ان شاء الله 5ايام
بس ابغى الاماكن الحلوه لو سمحتوا

1. و عليكم السلام هلا اخوي شحالك عساك بخير

و عليكم السلام هلا اخوي شحالك عساك بخير

اذا كنت تحب المولات فبتحصل في ابوظبي المارينا مول وهو مول كبير يستحق الزيارة وشي هناك مولات2 بس اصغر مثل ابوظبي مول والخالدية مول والوحدة مول ,,, وعندك الكورنيش تقدر تطلع رحلة بحرية من منطقة الميناء الين المارينا طبعا مع بوفيه اذا حبيت ,,, طبعا منطقة الكورنيش بتحصل مقاهي حلوة وجلسات جميلة ,,, وهناك بعد مسجد الشيخ زايد اللي يعتبر من معالم بوظبي ويعتبر من اكبر 10 مساجد فالعالم يمكنك تزوره اذا حبيت ,,, واذا كانت رحلتك فشهر 11 هناك حدث كبير اللي هو سباق الفورمولا1 فحلبة ياس اللي تقع فجزيرة ياس وهي حلبة رائعه بمعنى الكلمة ,,, وطبعا فشهر 12 هناك كاس العالم للاندية وبيقام فبوظبي ايضا اذا كانت زيارتك فهااشهر تقدر تحجز تذكرتك من الحين اذا كنت من محبين الكرة ,,,,
اما اذا حبيت تزور العين فاول شي لازم تروح منطقة مبزرة وجبل حفيت وهي منطقة رائعه بمعنى الكلمة وتستحق الزيارة وفيها مسابح مياه كبريتيه وجبا خضرا وشاليهات اذا حبيت تحجز وتبات هناك وهي عائلية بالدرجة الاولى ,,,, واذا كنت تحب المولات ايضا تقدر تروح العين مول او الجيمي مول وشي مول يديد بس بعيد شوي عن المدينه اسمه بوادي مول ,, واذا كنت من محبي الاماكن التراثية والتاريخية فتقدر تزور متحف العين الوطني ومتحف قصر العين وقلعه الجاهلي ,, وبشكل عام العين مدينه هادية وخضرا وجميلة وبعيدة عن صخب المدينة والابراج العالية فاذا كنت تحب الهدوء والراحة عليك بالعين
طبعا هالاشيا من تجربتي المتواضعة فهالمناطق وان شالله باقي الاعضاء ما بيقصرون وياك
وحياك الله بين هلك وناسك والسموحة عالقصور ^_^

مشكور اخوي ورد اكثر من رائع
بس حبيت استفسر عن المواصلات والتكسي في ابو ظبي و والعين

افا عليك اخوي حاضرين للطيبين
بالنسبة للمواصلات في شبكة مواصلات عامة فالمدينتين بس انصحك تاجر سيارة من المطار اللي بتنزل فيه سواء كان مطار دبي او بوظبي عشان تاخذ راحتك وتخطط الرحلة ع كيفك ^__^