ماشاء الله .. اشوف الاسعار مناسبه
من وين اخذتهم ؟؟
سفره سعيده

الأخت فراولة
الاسعار والحجز من مكتب سياحى في جده ولو تسمح الادارة اضع اسم المكتب ما عندى مانع وانا في انتظار موافقة ادارة الموقع ليستفيد كل الاخوان

الله يخليك اخوي khalil1194
ممكن تساعدني هو صحيح ان الاخوان ماقصروا بس ولو ودي باحد ينصحني خطوه خطوه اذا ممكن عطني الضوء الاخضر وانا اقولك استفساراتي كلها

كريستي
اولا اخوى امر في اي استفسار انا تحت امرك باللى اقدر عليه
بس حط في بالك انا اول مرة اسافر تايلند لا تعتمد على كثير - طبعا سافرت الى ماليزيا وتركيا وسوريا والاردن - وهذه اقدر افيدك فيها
على العموم تران انا من الناس لما احب اسافر بلد لازم اجمع عنه جميع المعلومات حتى وان كانت بسيط بس والله تفيدك خاصتا انى معاى المدام
اخر التطورات اخوى انا غيرت حجزى في بانكوك من فندق رديسون لان كثير من الاخوان يقولون عنه بعيد جدا واخذت فندق باى سكاى - جنيور سويت بسعر 345 ريال
وكمان قصيت التذاكر للطيران الداخلى من لحظة وصولى بانكوك الى شنقماى بسعر 700 ريال على التايلندية للشخصين وطبعا شراء التذاكر من جدة
ومرة اخيره انت امر وانا تحت امرك اخوك ابو مازن

لكل مجتهد نصيب وانت انسان تتسم ببذل الجهد والاسباب في سبيل تحقيق الغايات من وجهة نظري اختيارات موفقه جدا واسعار ممتازه ومواقع روعه توكل على الله ودعواتي لك وللعائله الكريمه بقضاء اجمل واروع الاقات في كل مكان تقيمون به في تاي بالنسبه للبرامج اليوميه اي منتجع او فندق انت ساكن فيه راح تلاقي عندهم العروض وانت اختار اللي يناسبك وعشان تشوف الاسعار لو لفيت حول مكان اقامتك راح تلاقي كوشكات خاصة ببرامج السياحه والانشطه اليوميه او مكاتب سياحيه قارن بينها وبين الموجود في مكان اقامتك وقرر وغير كذا خلي صرفك من منطقة العرب في بانكوك الاسعار افضل بكثير من المطار مثلا العام صرفنا الريال ب8 بات وب 7 بات في المطار في نانا كان الصرف ريال ب 10 بات او 9 بات والحال ينطبق على كل المناطق اللي بتزورها .
طبعا على كذا راح نرقيك بعد الرجعه بالسلامه برتبة (خبير دولي) مشاء الله دول كثير زرتها يعني ماينخاف عليك الله يوفقك وبكذا طمنتني عليك انا من اول متبع نشاطك واستفسارتك وكنت اتمنى اقدم لك لو خدمه بسيطه حفظكم الله ورعاكم.
.

سواح
اولا خوى صدقنى هذا بفضل الله ثم بفضل مساعدتك انت والاخوان في المنتدى ومع ذلك ما استغنى عنك وعن الاخوان جميعا في منتدنا الرائع واعدكم ان شاء الله بعد عودتى بالتقرير الشامل اللى راح يسعد الاخوان اللى ناوين على السفر مستقبلا
بالنسبة للصرف هل كلامك هذا ينطبق على شنغماى لان اول مدينة راح اسكن فيها ان شاء الله ومشكور مرة اخرى اخوك ابو مازن

^
هلا ابو مازن ياخوي حنا لبعض اهم شي ان الجميع يقضو اجمل وامتع اللاوقات برحلاتهم ويكونو مرتبين وعارفين يدبرو امورهم عشان تكون رحلة ناجحه ولاتنسى وخاليه من المتاعب والصعاب (وماذل قوم تعاونو)
قبل ما كلمك عن الصرف ان شاء الله انك استخرجت الفيزا لك انت والمدام؟ طمني
الصرف من المطار خذ قدر حاجتك يعني حق التاكسي لين توصل مكان الاقامه ومحلات الصرف الله يعطيك العافيه متوفره بأي مكان تحط رحالك فيه بلد سياحي ميه الميه وعارفين المتطلبات الكامله للسياح ومن الاشياء الجيده كثرة العروض والمتنافسين وهذا يعود بالفائده على الاسعار المناسبه
وخير ماخترت شانق ماي جدا روعه وعائليه جوها جدا لطيف وتعتبر من ارخص مناطق تاي لاتفوتك شلالاتها شي يبكي على قولة خوي اللي سافر معاي وراح تعجبك عروض الفيله وفيه برامج جدا ممتازه انت بس تنق على قولتهم وباحضان الطبيعه شي خيالي.
حط فبالك بوكيت شوي غاليه عن بانكوك وشانق ماي وراح تلاحظ هالشي في المطاعم والمواصلات التاكسي بوكيت بها الكثير من المطاعم العربيه ولكن اسعارها عاليه اعمل حسابك اي مشوار مايقل عن 10 ريال 100 بات بينما شانق مي ممكن مشوار بالتاكسي 20 بات او بالتاك توك 10 بات وبانكوك بالعداد بوكيت مافيه حاجه اسمها عداد لكن انت ماراح تحتاج التاكسي كثير لان اكيد انت برنامجك ملي بالزيارات للجزر والاماكن السياحيه بالجزيره مع الانشطه والعروض المختلفه
برامج غوص او شواطي استجمام ممكن ماتنسبك انت والعائله وهالشي راجع لكم لكن بقية الجزر ك جيمس بوند وبي بي جدا رائعه وصدقني بمجرد ما توصل راح توضحلك الصوره بشكل ممتاز العروض تجيك من هنا وهنا والعالم تبي تكسب ودك ماعندك مشكله من هالناحيه وماراح تغلب .
تروح وترجع بالسلامه ورحلة موفقه يارب وانا متواجد بالمنتدى لو احتجت لأي خدمه انا والاخوان حاضرين حتى وانت في تاي برضك معاك على مدار اليوم وانا ان شاء الله رحلتي لتاي في 26 من هالشهر والله يوفقنا واياك اخوي ابو مازن.

اخوي خالد تروح وتردون بالسلامه ..بس ممكن طلب صغينون وهو انك تسئل عن سعر الفندق من هناك هل انه رايح يفرق عن سعر مكاتب السياحه او لا لاني مااحب احجز فنادق من مكاتب السياحه الي هنا بسبب التقيد بالفترة التي حجزت فيها .

1. nasr467


2. اولا اخوى راح اشرحلك طريقتى في السفرة اتمنى تفيدك

nasr467

اولا اخوى راح اشرحلك طريقتى في السفرة اتمنى تفيدك

طبعا انا لما قررت اسافر لتايلند وبعد حجز التاكر بديت ابحث من خلال تجارب الاعضاء عن الفنادق اللى تناسبنى وعلى فكرة لكل شخص مزاج في الفنادق بعضهم يحبها بعيده وهادية وبعضهم يحبها وسط المدينة وسط الاسواق والضجيج كل واحد له مزاج؟؟
المهم انا بعد ما حددت الفنادق اللى تناسبنى بديت اقارن بين اسعارها في النت والاسعار فى المكاتب السياحية عندنا في جده والمكاتب السياحية في تايلند عن طريق سوال الاخوان في المنتدى الموجودين في تايلند واللى توهم وصلوا ( وعلى فكرة اخذت منى هذه المقارنات اكثر من شهرين خاصتا اللف على المكاتب اللى عندنا في جده ) المهم بالنسبة للاسعار وانا نشرتها في موضوعى الرابط اعلاه
المهم بعد ما استقريت على الفنادق انا وجدت انا الفرق في السعر بسيط جدا ( وكانت بعض اسعار الفنادق ارخص من النت وبعضها اغلى شوى يعنى الفرق في المجموع الكلى بسيط جدا) لذلك حجزت من المكتب الموجود في جده وكمان للاسباب التالية :
1- انا ما عندى فيزا ؟
2- انا ماودى اشيل معاى كاش كثير يعنى ادفع التذاكر والفنادق هنا واشيل معى حق المصاريف والمشتريات فقط خوفا من ضياعها او سرقتها
3- بالنسبة للحجز من النت انا سمعت تجارب بعض الاخوان اللى سارت معاهم مشاكل مثل الاخ اللى خصموا نه المبلغ ومالقوله حجز ولحد الان ما رجعو فلوسه
4- انا رايح على شنغماى على طول وما ودى اضيع يوم في بانكوك علشان عمل حجوزات الفندق خاصا ان مدة سفرتى قصيرة ( وكذلك لان المدام معاى ينى لوكانت السفرة شباب كان الحجز من المكاتب في تايلند ما فيها كلام)
5- انا حجزت التذكرة الداخلية من بانكوك الى شنغماى من هنا لنفس السبب علاه
6- في حالة رغبتى في الغاء الحجز او تعديل نوع الغرفه او تغير الفندق كل ذلك ممكن سوا من هنا قبل ما اسافر او حتى وانا هناك ماعندهم مانع حتى انهم يعطونى رقم المكتب هناك مندوبهم انسق معاه)
7- لو حصل انى قطعت السفرة او عدم رغبتى الاكمال في حد الفنادق كل ما على انى اختم الكرت من الفندق ولما اجى هنا اخذ فلوسى من المكتب (وعلى فكرة حصلت مع خويى قطع اجازته في ماليزيا العام وكلمهم ولما رجع هنا اخذ فلوسه من المكتب)

• بالنسبة لباقى الرحلات الداخلية و الرحلات السياحية والبرامج كمان ندبرها هناك

ثانيا هذا ربط موضوع الاخوان ما قصروا وضو كل ارائهم وتجاربهم اتمنى تفيدك
https://artravelers.com/p/re/126077
اخير مشكورين على ارائكم واتمنى انى افدت واستفدت وتحياتى للجميع