الم الماضي
06-11-2022 - 01:17 am
السلام عليكم ورحمة الله وبركاته
كيفكم اخواني واخواتي اعضاء منتدى العرب المسافرون
عندي استفسارات اتمنى احصل لها جواب منكم
ان شاء الله بنسافر لماليزيا بتاريخ 29/07 وعددنا 7 اشخاص
ف حابه ان رحلتنا تكون منظمه ومخططه بشكل جيد
الحمدلله انتهيت من عمل جدول لطلعاتنا وحسبت اسعار الفنادق و رسوم الدخول للأماكن السياحيه ومصروفاتنا للأكل وغيره
بس ما عرفت احسب سعر تنقلاتنا الداخليه بكوالالمبور لان ما شاء الله عددنا كبير ف بنحتاج فان
واستخدام الفان لجميع التنقلات بيكون مكلف كثير
ففكرت ان نعتمد ع قطار المونوريل بما انه ارخص
احتاج مساعدتكم بإخباري بأسماء المحطات
انا بسكن في فندق امبيانا قرب منطقة البرجين
اللي عرفته ان اقرب محطه للفندق هي (راجا شولان)
فإذا اريد اروح للاماكن التاليه، ايش اسم المحطات اللي لازم انزل عندها:
مجمع سوجو
امبانج بارك
مجمع الميد فالي
الصن واي لاجون
هل من الممكن اروح لأفاموسا بإستخدام القطار؟؟
اذا اخذنا فان لمنتجع افاموسا كم بيكلفنا؟؟
واذا احد عنده رقم سايق تكون عنده فان ل 7 اشخاص يرسلي رقمه عالخاص و بكون شاكره له
بعد ما رتبت جدول رحلتنا جاء في بالي اضيف بينانج********>بتذبحني اختي
فهل تستاهل؟؟؟ وهل يكفيها يومين؟؟؟
واذا بغيت اروح لبينانج بالباص ومنها اطلع للكاميرون بالباص، يصير احجز كل هالتذاكر من محطة بودورايا بكوالا؟
اعرف اسئلتي كثيره بس اعذروني مالي غيركم
الف شكر لكم...
اختكم:
الم الماضي
من فندق امبيانا الى مجمع سوقو :
(1) تروح الى قطار المونوريل الاقرب وهو راجا شولان ... تطلب تذكره محطه ميدان تنكو ... لمن توصل المحطه بتشوف مجمع سوقو يمينك ( ام ممكن يكون بعيد شوي )(2) تروح الى قطار المونوريل الاقرب وهو محطه راجا شولان ... تطلب تذكره محطه hang tuah ... تنزل وتروح للقطار الثاني نفس الاسم لكن نوع ستار ... وتركب القطار ستار وتتوجه الى محطه bandaray .. كذا بيصير سوق سوقو جنبك ..
هناك اسئل عن الطريقه الافضل ... طبعا الاسهل هي الطريقه الاولى ... لكن مدري كم المسافه بين محطه ميدان تنكو الى مجمع سوق سوقو .... اعتقد انها قريبه مره ... لكن اسئل علشان تكون على بينه ..
انا اتذكر انها قريبه لاني كنت اشوف سوق سوقو وانا في القطار ...
من فندق امبيانا الى امبانغ بارك:
(1) تمشي الى البرجين وتركب القطار اللي هناك وهو من نوع بوترا اسم المحطه klcc وتنزل للمحطه اللي بعدها مباشره واسمها امبانغ بارك ..
(2) تمشي الى امبانغ بارك ( يعني ما تركب لا قطار ولا شي ) مو بعيده مره ... يعني في حدود ربع ساعه عن فندق امبينا ..
(3) تركب قطار المونوريل راجا شولان ... وتنزل في محطه بوكيت ناناس ... ثم تتوجه للمحطه القريبه التي من نوع بوترا واسم المحطه هو دانق وانقي وتركب القطار وتنزل في محطه امبانغ بارك ..
من امبيانا الى مجمع ميدفالي :
(1) تركب قطار المونوريل راجا شولان .. وتنزل في محطه كي ال سنترال ... ولمن تنزل روح الى داخل محطه كي ال سنترال ... وابحث عن قطار نوع KTM وتاخذ تذكره لمحطه ميدفالي ... وانتبه ترى فيه قطارين يروحون بنفس الاتجاه .. لكن واحد يروح ل سرمبان والثاني يروح ل كلانج .... انت اركب للي يروح ل سيرمبان .. وانزل في محطه ميدفالي ولمن تنزل بتشوف نفسك وسط السوق تقريبا ..من امبيانا الى صن واي لاقون :
(1) تركب قطار المونوريل راجا شولان وتتوجه الى محطه كي ال سنترال ... تنزل وتدخل داخل محطه كي ال سنترال وتركب قطار KTM اللي يروح الى بورت كلانج .. وتنزل في محطه صوبانج جايا .. ومن هناك تاخذ تكسي بحدود 15 ريجنت الى صن واي لاقون(2) تركب قطار المونوريل راجا شولان وتتجه الى محطه كي ال سنترال ... تنزل وتدخل داخل المحطه وتركب قطار نوع بوترا وتنزل في محطه كيلانا جايا ... ومن هناك تاخذ تكسي الى صن واي لاقون
هذا افضل من الطريقه الاولى ...
ملاحظه : افخم القطارات هو نوع بوترا ... فخم ونظيف .. اما قطار KTM فانا لا ا نصح به ابدا .. مزدحم جدا جدا واحيانا من الزحمه ( اكون محشور بالزوايه ... ومخنوق من الروائح ) .. اما بوترا بالعكس تماما ..
ملاحظه اخرى ... كيف الوصول من فندق امبيانا الى محطه المونوريل راجا شولان ..
اخرج من الفندق واتجه يمين .. ثم لف يمين ... طبعا يصير فندق امبيانا على يمينك ... طالع قدام بتشوف فندق كران بلازا لكن من الخلف ... تلاقي سلم كهربائي اطلعه وهو يوصلك الى لوبي فندق كران بلازا ... وبعدين اطلع من البوابه الرئيسيه في الجهه المقابله ........ اذا خرجت بتشوف المحطه قدامك ..