- السلام عليكم ورحمة الله وبركاته
السلام عليكم ورحمة الله وبركاته
أنا حاليا في اسطنبول أمس وصلنا حوالي الساعه 5 ونص "كنا ماخذين ترانزيت على طيران الاماراتيه" أكلمكم من فندق ( GOLDEN HORN sultanahmet ) الفندق أربع نجوم و موقعه ممتاز وسط المدينة حولينا ( جامع السلطان أحمد ، آيا صوفيا ، السوق المسقف ) وأمامنا الكثير لنستكشفه ..
- ملاحظه غرف الفندق أصغر مما تبدو عليه في الصور على الانترنت.
الجو روعه والخضره ما شاء الله تفتح النفس وريحه الذره المشوي أم.. خيال ..
وأنا أمشي فالشارع أجوف الخبز الي بالسمسم الي مدحتوه وأقول لأمي هذا هو الخبز الي امدحوه لي ..
وللحين ماجربته وخاطري فيه ..
- ملاحظه فالليل أنصحكم ما تدخلون الحدائق وخاصةً إذا معكم أطفال.
الصدمة الكبيرة الي ما كنا نتوقعها هي غلاء المطاعم..
يعني تخيلوا إحنا خمسة أشخاص وطفلين ..واليوم عشانا كان ب 150 ليرة يعني حوالي 400 ريال قطري
والمطعم مب راقي وايد ..وكان على الشارع..
وبسألكم سؤال ..هل الجاي الاحمر يوصل لليرتين يعني حوالي 6 ريال قطري ؟؟
لأن استغربنا من السعر جاي احمر عادي بستة ريال!! ولا بس علينا احنا يعني!!
وما حصلنا أي إعاقه في طلب الجاي .. لأن إحنا نلفظه بنفس الطريقة "تشاي"
وأبوي طلب "black coffe" بس بعد ياب له جاي
وفي شي أزعجنا وايد ..نظرات الاستغراب وابتسامات السخرية والتصوير المفاجأ من قبل السياح الاوروبيين!!
لأن أمي ما اتركت لا العبايه ولا النقاب .. وأنا وأختي حافظنا على العبايه والشيله
وتدرون شلون عرفنا أن السياح أوروبيين..لان لا كانوا يتكلمون إنجليزي ..ولان السياح الامريكان كانوا يستأذنون منا قبل لا يصورون ..
وكنا نقول "no, please" لكن مروا علينا قروب ثاني واستأذنوا منا قلت لهم يبلفيت بطلع قدراتي.. بتفلسف يعني " but we are not turkish"..
إلا تقول الامريكيه " its okay, it dosen't matter " إلا "جيك ججك جك جيك" فلاشات في عيونا والاخ الامريكي لصق احذاي وصورتنا امه ...لو ابوي كان معانا جان اذبحه وذبحني وراه
بس لا تخافون كنت لابسه نظارات جنها صدام همر
الحين اخليكم ..وتصبحون على ألف خير ..
واحب اشكركم كلكم ..لان لولاكم من بعد الله سبحانه جل جلاله جان ما جيت تركيا ..ولا كنت الحين قاعده اتفلسف على أهلي ..مصدقه عمري مرشده سياحيه
الله يحفظكم ..
