وعليكم السلام ورحمة الله وبركاته ...
يامرحبا بك اختي المهرة ونورتي سلمك ربي
وش رايك يا طويلة العمر ...
سلانجور - لنكاوي - بينانغ - كاميرون - كوالا .
سلانجور = الخيول الذهبية ..ليلتين .
لنكاوي = شيراتون بيردانا ..4 ليالي .
بينانغ = راسا ساينغ ...4 ليالي .
كاميرون = اكواتوريال ...ليلتين .
كوالا = باقي المدة ...بغيتم جنب شارعنا المزعوم خذوا ويستن .
وان بغيتم بفندق فخم جنت البرجين اجل عليكم بماندرين .
ومن كوالا تقدروا تاخذوا طلعة يوم لجنتنغ ...مدينة الترفيه
والملاهي ...وتقدروا تتجهوا لأفاموسا لو بغيتم ...وعندكم
برضه الحشرات المضيئة لو لكم نية ...وبرضه خلوا روحتكم
لصن واي لاقون من كوالا وما تحتاجون تحجزون بفندقهم .
استفسري ليه قلت لك الخيول وماقلت لك صن واي لاقون
طبعاً في بداية الرحلة ....ام ....لانكم في شهر عسل
وبغينا لكم فندق جميل وهاديء ويجمل الوجه ومدينة متكاملة
حولك ...وبرضه خوفاً على مشاعركم بصن واي لاقون لانه
عندهم في ناس يلبسون عريان حلوة يلبسون عريان
وماعندكم اطفال ...فالخيول افضل لكم
والتنقل بالسيارة ماعدا ...من كوالا للنكاوي (طيارة)
ومن لنكاوي ان بغيتم الفيري مع اني ماانصح فيه ترى ممكن
وان بغيتم طيارة تراها افضل .
التماشي داخل المدينة والقريبة من كوالا كلها سيارة .
وكلامك الاخير مافهمته ...لكن تقدري تخلين بدايتكم بالخيول
واخر ليلة او ليلتين بصن واي لاقون ...مع انكم تقدروا
تتجولون بها وانتم من كوالا ولكن ان بغيتم فترى مافي
اي مشكلة وتصير اخر ليلة او ليلتين بصن لانه ماشاء الله
وقتكم واسع وجميل .
موفقة اختي بأذن الله ....والف الف مبروك
وشهر عسل سعيد وعقبال العزوبية وتروحون وترجعون بالسلامة
والسلام عليكم

مشكور يالشعيبي وتراي أبغثك هاللحين عن الفنادق والمدن وعقبها عن المنتزهات
شف أنا حطيت في بالي أول يومين الخيول الذهبيه وبعدها أسكن بجنتنج يومين لان ودي بمزرعة الخيول بس ماقررت أي فندق مدري وش الأصلح
وبعدها بالسياره على الكاميرون وأبقعد فيها يومين ومدري كم المسافه بينها وبين جنتنج وبغيت فندق ستروبري يتهئ لي أنه أحسن من اكواتوريال
ومنها لبياننج وأبقعد سته أيام عاد مدري وشلون أروح لها باأي طريق وطبعا قررت فندق راسا ساينغ
ومنها للنكاوي وأبقعد ثلاثه أيام ولا أدري وش أسكن فيه أنا سمعت أن فيه فلل بمسبح خاص ولاأدري باأي منتجع
وبعدها لكوالالمبور وأبقعد فيها 7 أيام خمسه أيام في فندق وماأدري أي فندق أبغى في شارع بوكيت لأني أبي شارع تسوق وسمعت بفندق ريجنت ولا أدري عن خدماته وبعدين أبروح يومين لصن واي لاقون
وبغيت أسال عن الأسواق من أي مدينة أتسوق الهدايا يعني أشياء عاديه ميب غاليه ومن اي مدينة
وسوق أخذ أغراضي وطبعا أبي أشياء فخمه ومميزه يعني ميب عندنا بالرياض
أتمنى ترد علي وأي أحد عنده خبره

اختي المهرة كيف حالك
صراحة فشلتيني سويت لك برنامج وانت عندك برنامج جاهز وجميل
ترى امزح
طيب ...
يصير اول يومين الخيول الذهبية ...ماعليها خلاف .
جنتنغ ...دام بغيتي اللي يشبهوا اسمك ...اجل خذوا بفندق اوانا .
كاميرون ...في حدود ساعتين طبعاً بر لانه مافي طريقة اخرى .
وش معنى اخترتي فندق الفراولة ...احد وصاكي عليه ؟
انا رأيي وانتي حرة يا طيبة انه اكواتوريال احلى وافخم .
وموقعه اجمل بالقمة ...وترى الفراولة 4 نجوم واكواتوريال
5 نجوم ...لكن كاميرون فخامة فنادقها مش ولابد مثل جنتنغ .
يعني مشي حالك وزيادة عن مشي حالك ...مانسوي نفسنا فيها
من كاميرون لبينانغ ...بالبر ...سيارة في حدود ساعتين وشوية
وان صارت الساعتين والشوية 4 ساعات لا تدعي علي
لانه لها طريقين وما ادري سولقكم من وين راح يوديكم ..راح
يجيبكم من الجسر ام راح يطلعكم العبارة ...وكلها فيها زحام وخاصة
سرى طلوع العبارة ...هذا ان كان سواق طيب ووده يمشيكم صح
ويمتعكم ويسوي لكم تجربة جديدة ...مافي غير السيارة اختي من كاميرون
لبينانغ ...وزين مااخترتي راسا ساينغ .
لنكاوي ...عاد تروحون لها بالفيري اللي هي مثل العبارة
او عن طريق الجو ...الفيري عاد فيها دوار وطراش ودوخة
وتراها حسب الشخص ...مانقدر نعمم ...ويبيعون حبوب منع الدوار
لو بغيتي بس انتبهي لا يكون مخدرات يا لطيف الله لا يبتلينا .
صراحة انا عزوبي فما يهمني المسبح الخاص ومعناها انه لا علم
لدي بالفلل اللي فيها مسبح خاص ...اغلب المنتجعات ان لقيتها
فلل مباشرة راح يكون لها مسبح خاص مثل افاموزا بملاكا .
بغيتي فندق بلنكاوي انتي تأمرين امر وهذه لعبتنا ..ههه
كوالا ...بغيتي بشارعنا المزعوم ...طيب يصير نلغي بقية الاحتمالات .
نجي نركز في بوكيت بينتانغ ...الثلاثي المرعب ببوكيت بينتانغ
ويستن - ماريوت - ريجنت ...في نظري الفخامة من اليمين لليسار .
ريجنت روعة ولكن في فنادق تسبقه في نظري على نفس الشارع
وان اخذتيها راح تنبسطين فيها لأننا مدلعين مرة وندور افخم الفخامة.
فنادق 4 نجوم حلوة فما بالك انتي مختارة 5 نجوم ومن التوب 10
صن واي لاقون معروفة ..ويصير منها للمطار .
وين ماتروحي في هالدنيا جيبي لكِ منها ذكرى
وخذي من كل منطقة بماليزيا تي شيرت خاصة بالمنطقة وتلقيها
بكثرة ...سنة صرت معاون تنفيذي وكل مايكون في جولة في مخيم
حجاج البس تي شيرت الدولة او مدينة منها ...وينبسطوا الحجاج
وصرت كلاون
بغيتي تشتري هدايا للناس وتذكارات اجل اتجهي لسنترال ماركت
بكوالا ...روعة ...صح انها اغلى ...لكن الفرق بسيط وحق
المشاوير والتعب والبحث .
بغيتي تتسوقي اشياء فخمة وماركات عالمية اجل اتجهي
لسوريا klcc وفي يوم اخر اتجهوا لميغل مول ميد فالي
اتوقع في هالمجمعين راح تلقين اللي تدورين عليه .
ودام انكم ساكنين جنب بوكيت بينتانغ اجل المراكز ياكثرها جنبكم
لكن اللي ذكرتهم لكِ اتوقع راح تنبسطي فيها اكثر .
موفقة اختي بأذن الله ...ومانستغني ترى عن مشاركاتكم يالكرام .
ولكم تحياتي وتقديري والسلا م عليكم

الله يسلمك ويوفقك
وترانا في البدايه يعني أبنشب لك هاليومين
طيب ماقلت لي عن أفضل منتجع وفلل بلنكاوي ماأبي فندق أبي أكواخ ولا فلل وأن حصل بمسبح زين على زين
وأن ماحصل الشكوى على الله
يعني بنظرك وش يميز هالمنتجعات شيراتون بردانا وبيلانجي بيتش ولانكاوي لاقون
وبالنسبه لشحن الأغراض وش أحسن طريقه ماتكلف علي

الله يبارك فيكِ اختي المهرة
دام انك بغيتي اكواخ اجل على طول اتجهي للنكاوي لاقون .
وخذي فيلا على البحر ...حدود 600 ريال الليلة ...ومنتجع جميل
وفخم وماراح تندموا عليه .
ان بغيتي نظام فندقي اجل خذي بشيراتون بيردانا ...فخم وجميل .
وبيلانغي ممتاز ولكن في نظري انه اقل من الاثنين اللي قبلهم وفي
الاول والاخير هذه اذواق وتختلف من شخص لأخر .
الخلاصة : ذوقك في نظري اختار لانكاوي لاقون
الشحن : اشحني بضائعك عن طريق pos malaysia
و10 كيلو ب257 ريال تقريباً ...ومايسمحون للكرتون فوق 10 كيلو
وان عفشكم اكثر تأخذون كرتون اخر ...وهكذا ...الكرتون تشترونها
من نفس مكتب البريد ب3 رينجيت و80 سنت ...ويربطوها لكم عندهم
ب2 رينجيت ....وتوصل في حدود 8-14 يوم ...ولهم فروع والفرع
الرئيسي معروف عند التكاسي واللي هو جنب المحكمة بقلب العاصمة .
وتراها اوفر من شحنها مع عفشكم بالطيارة لانك توفرين النصف .
موفقة اختي المهرة بأذن الله والسلام عليكم

السلام عليكم ورحمة الله وبركاته
حياك ياشعيبي
اقول انت تقول سكنت بلفلل الي على البحر بلانكاوي لاقون صح!
طيب اوصفها لنا بالتفصيل ايش فيها بالضبط وكيف سكنت فيها لوحدك وهي فيها ثلاث غرف وحمامين او ايش بالضبط
وبعدين كيف تصلح لشخصين وهم عرسان ولا انت كنت ماجر غرفتين. ههه
ارجو ان توضح لنا
وجزاك الله خير

وعليكم السلام ورحمة الله وبركاته ...
حياالله السناتوراسير المرام ووش اللي خرجك من منطقتك
صراحة انا ماجربت فيلا فيها 3 غرف وحمامين يكرمكم ربي .
وانما فيلا فيها غرفة ودورة مياه وكورنر مطبخ ...ركن صغير .
وفي فلل فيها غرفتين واعتقد والله اعلم في فلل فيها 3 غرف .
وان مالقوا لك فيلا بغرفة راح يحذفوك لابو غرفتين .
هي مش فيلا ..ولكن هم كده يسموها ...تقدر تقول بيت ملايو
او كوخ وان اعطوك فيلا بغرفتين مثلاً بسعر غرفة واحدة
لا ترفض لانها اكبر واشرح وحتى لو كنتم نفرين .
ان بغيت غرف عادية تقدر تاخذها بالفندق ...وان فكرت تاخذ غرفة
عادية نصيحتي لك تتجه لشيراتون بيردانا ...وان بغيت الفلل عاد
توكل على الله ...وخذ ابو غرفة .
وترى الفيلا ابو غرفة خاصة لشخصين اصلاً واللي عنده اطفال
يقدر يضيق سرير زيادة ....لا يغرك انه اسمه فيلا معناها فيها
غرف كثيرة .
موفق اخوي بأذن الله ورحلة سعيدة والسلام عليكم

فيه تغيير طفيف على الجدول
يعني بيكون بعد الخيول بياننج ومنها للنكاوي ومنها للكاميرون ومنها لجنتنج ونرجع لكوالا
بس مدري كيف الطريف من لنكاوي لكاميرون وبرضو هل أقدر من جنتنتج ارجع عن طريق التلفريك
أذا فيه باصات تودي من لنكاوي للكاميرون أبي أعرف وين وكم ساعه والسعر
وبغيت أسال أنا رحلتي بعد أربعه أيام يعني مابعد قضى عيد الأستقلال وأول يومين أبكون في الخيول هل فيه مكان تنصحوني أروح له أحضر أحتفالاتهم فيه؟

اختي المهره
الافضل الانتقال من بعد الخيول الذهبيه الى لنكاوي عن طريق الطائره ومن لنكاوي الى بينيج بالطائره او الفيري
بس الطائره افضل واريح
ومن بعد بينينج الى الكاميرون عن طريق البر تكسي او باص او سياره خاص الباص ارخص وفخم
اما من لنكاوي الى الكاميرون لايوجد طريق مباشر
سفره سعيده ان شاء الله