بسم الله الرحمن الرحيم
يالغالين ..
السلام عليكم ورحمة الله وبركاته
كيف حالكم ياعساكم دوم بخير ..
وعليكم السلام ورحمة الله وبركاته
حيا الله اخوي القطري
نورت بوابة الامارات
السالفه ومافيها جاتنا دوره في دبي لمدة اسبوعين من تاريخ 18/5 إلى غاية 30/5
الدوره بتكون الصباح وبعدها بيكون عندنا وقت نطلع ونتمشى ..

حياك الله اخوي القطري
اختنا اليازي كفت ووفت
بس أحب أضيف شغله صغيرة
3- وين مكان المطعم الي كله ثلج وأيش الأشياء الي عنده مميزه ..يعني أكله حلو ولا عصايره ...الخ
هو كوفي شوب .. مش مطعم .. وان كان عندي اكلات بسيطة
ومافيه شي مميز من ناحية الأكل
اساسا ماراح تلاقي احد يطلب اكل
الكل يروحله عشان الجو
يعني كل شي حولك ثلج
حتى الكراسي
وبرد (درجة الحرارة -6)
لما تشتري التذكرة تدفع 60 درهم
يعطونك الملابس .. ولك مشروب مجاني
كل يوم عندهم شي
مرات يكون عندهم مشروبات باردة بس
ومرات بادرة وحارة
انا رأيي انك تاخذ شي بارد
بتقول اشلون اشرب شي بارد والجو اصلا بارد
هو ترى مب وايد بارد
عادي
بس الحلو ان الكوب اللي يجيونه يكون مصنوع من الثلج
بس اذا طلبت مشروب حار .. يجيبونه في كوب شكله عادي
فهالكوفي شوب انا اشوفه من النوع اللي تروحله مرة وحدة
تشوفه وتجربه وخلاص
وبالنسبة للمطاعم
في وايد مطاعم سيفود
بس انا ما أحب أغامر وايد
بس ياليت لو عرفت مطعم حلو قولنا

اليازي !!
صدق من سماج خبيرة الإمارات ..
فعلاً خبيره ماشاءالله تبارك الله
وتسلمين على ردج وماخليتي شارده ولا وارده إلى رديتي عليها ..
وكان خاطري أقرا وصفج للأماكن أشلون
ماقصرتي وإذا عندي اسألج راد أرجع بسيفي قصدي بسألتي
يسلمو

The Watcher
الله ايحييك ويرفع قدرك الغالي
ويسلمو على الإضافه والحمدالله انك نبهتنا عن مسألة المشروب البارد عشان انجرب القلاص الثلجي :8888:
ماقصرت جعلك ذخر ..

القطري
السلام عليك اخونا القطري ...
وحياك الله في ديرتك الثانيه الامارات ...
ولانك ضيفنا ماحبينا نخليك من غير مانساعدك بالاجابات على اسئلتك
ولو اني وصلت متأخره بس اهم شي قبل وصولك ...
احم ... احم ... نبدأ ...
1- السوق الصيني :
هو اسمه Dragon Mart
خذ طريج شارع الامارات ، ولما تشوف لافته مكتوب عليها سوق الخضار ، تلف وتركب الجسر
وتعبر وماتاخذ اتجاه سوق الخضار ، وخذ الجهه المقابله وتنزل من الجسر وتكمل على
طول وبتشوفه جدامك ، (( عموما اذا بتاخذ تاكسي ، أتأكد انهم كلهم يعرفونه ))
2- اما سؤالك عن المجمعات اليديده :
أنا بضيفلك المول اللي موجود في فيستفال دبي ، وهذا موقعهم :
http://www.dubaifestivalcity.com/
نبذه عنه :
هو المول الرئيسي في منطقة فيستيفال سيتي و فيه قرابة 550 محل
و 90 مطعم مكون من 3 طوابق ..
الطابق الاول و الثاني محلات و مطاعم
الثالث فيه صالة رياضية .. صالة بولينج
و احلى شي في المول هي المطاعم المختلفة و جلساتها الخارجية المطلة على القناة المائية
الجزء الثاني من المطاعم و اللي بيكون مطل على البحر
المول مربوط بجسر مع محل ايكيا الضخم و في الجسر لمحلات كثيرة و في نهايته بعد مطاعم
و كوفيات و محل هايبر بنده

• وبعد في مول يديد على طريج العين ، واسمه اوت ليت out let center

وهو يديد ويتميز بانه يبيع ماركات معروفه ورخيصه لانه البضاعه المعروضه انتهى موسمها
بالاضافه الى محلات ثانيه فيه بعد بضائعها رخيصه.

• وفي منطقة مردف فتحوا أب تاون up town

وهو مكان مفتوح وجديد نظامه وفيه محلات ومطاعم وكوفيهات وسوبرماركت ، والاجواء حلوه
وخصوصا اذا الجو جميل .

• واخيرا سنتر صحارى في الشارقه وايد حلو ، وفي سينمات وكثير من المحلات .

3- كوفي شوب الثلج :
اسمه كوفي out chill
وهو موجود في تايمز سكوير سنتر
تكلف اجرة الدخول 60 درهما ، وعند المدخل يقدمولك عصير و حبة شكولاته
ولماتدخل داخل تشوف مجسمات ثلجيه لمعالم عمرانيه مشهوره في دبي مثل برج العرب
وغيره ، بالاضافه انه كل الديكور من الثلج ، وقبل ماتدخل يعطونك لبس شتوي يساعدك انك
تتحمل الجو البارد ، ومسموح لك تيلس مدة 45 دقيقه ، ويقدم المطعم مشروبات ساخنه
وبارده وحلويات وفواكه ...الخ .
4- المطاعم ....
اول شي مطاعم السي فود :

• مطعم سي فود fish market

موجود في فندق الميرديان بجانب مطار دبي ، والمطعم داخل ساحة الفندق ومب داخل الفندق
وهو مطعم ممتاز وماعنده بوفيه ، مجرد تمر تختار من الاسماك والروبيان ... الخ وتكون نيه ، وتطلب
طريقة طبخها ، وطبعا تكون معاك وحده تساعدك في الاختيار ، وهذا المطعم انا وايد جربته
وروعه ، ونصيحه اذا اخترت روبيان او لوبستر اطلبه بالجبن أم لذيذ .

• في مطعم مماثل له ماعنده بوفيه ويكون بالطلب وموجود في شارع الشيخ زايد بعد

مركز المزايا ، وبتشوف وانته في الشارع صورة لوبستر كبيره ، والمطعم في الطابق الاول
وديكوراته حلوه واكله حلو .

• مطعم ياباني موجود في الشيراتون اللي على الخور ، وهذا المطعم يقدم كل اربعاء بوفيه

سي فود ، لكن لازم تحجز قبلها بيومين على الاقل .
سعر الشخص 190 درهم
ورقمهم المباشر : 2071750 -04
ورقم الفندق وممكن يحولونك على المطعم : 2281111 -04

• مطاعم ثانيه غير السي فود :
• مطعم ايراني اسمه انار ANAR في مدينة جميرا في داخل السوق القديم ، وله جلسه

تجنن على النهر ، ونصيحتي روحله على عشا ، المكان جميل والمطعم اكله لذيذ ، مثل كبيده
لحم او دجاج + لبنهم + خلطة باذنجان حلوه بس نسيت اسمها .
ولانه المكان دايما مزحوم احجز قبلها بدري حتى لو في نفس اليوم ، واطلب جلسه على النهر
ورقمهم : 3686505 - 04

• في فندق حياة جراند ، اول ماتدخل اسأل عن المطعم البوفيه

شوف اول ماتدخل خذ ايدك اليسار وامشي لحد ماتحصل سلم يوديك على تحت ، وبعدها
بتشوف المطعم البوفيه وهو مفتوح وله يلسات حلوه ، واول ماتدخل يعطونك كارت ، وتلف على
المطاعم الموجوده والمفتوحه جدامك مثل مطعم ايطالي ، ومطعم هندي ، ومطعم عربي ..الخ
والحلو اللي فيه انك من كل مطعم تختار اللي تباه ، واي شي بتختاره بياخذ الكارت منك
وبيحسب عليك ، اما قسم الحلويات بيكون بوفيه في الوسط ونفس الطريقه ، تختار اللي تباه
وهم يسجلون في البطاقه ، ولما تخلص ، وين مااعطوك البطاقه تعطيهم ياها وهم بيخبرونك
كم الحساب.

• في مطعم مكسيكي داخل فندق لو ميرديان يقولون حلو انا ماجربته .
• مطعم الفرسان

يقع هذا المطعم فى منتجع باب الشمس ويحتوى على عده مطاعم منها الايطالى والهندى
ومطعم الفرسان بوفيه (غدا وعشاء) ونصيحتي روح للمطعم على الغدا لانه على العشا
يكون فيه طرب ورقص .

• فندق قمر الدين يوجد بوفيه ايطالى

وهو على شارع الشيخ زايد جنب برج دبى .

• عندك بعد مطعم ايطالي انا وايد احب اكله ، اسمه بييلا biella وهو موجود في سيتي سنتر

وفي الفيستفال وفي وافي واعتقد في الامارات مول وبرجمان .
اتمنى اني اكون قد جاوبتك على اسئلتك ، والله يجعل اقامتك عندنا سعيده
واي سؤال في خاطرك نحن حاضرين .
تحياتي لك

هلا وغلا بأستاذتنا هداوه ..
وتوا ماتبارك الموضوع ..
وماشاءالله كفيتي ووفيت ياجعلج ذخر ..
وأيقولون دبي نورت من أمس :8888:

السلام عليكم ...
عندي سؤال عن فنادق دبي ، شو هي الفنادق اللي ترشحها
واسعارها معقوله من خلال خبرتك ، حسب ماقلت انك تزور الامارات
كم مره في السنه .
ويعطيك العافيه

وعليكم السلام ورحمة الله وبركاته ..
هلا وغلا أم حمده ..
في دبي مافي شي رخيص حالياً ..ومن ناحية الفنادق الي سكنتها متنوعه ..مابين السيتي سنتر والماريوت وأنتر جميرا اجديد الي ورا برج العرب وجميرا بيتش ..الصراحه اعجبني السويت مال فندق الأنتر الي يطل على البحر ..كان سويت راقي وحلو وايطل على البحر وعلى جزيرة النخيل ..
والأسعار من 1400 وانتي طالعه ..
أتمنى اكون افدتج في إجابتي

القطري
اخوي هذا اي فندق اللي تقصده؟