Saloooh
25-11-2022 - 10:27 am
السلام عليكم
مساكم الله بالخير أخواني & أخواتي..
أتمنى الجميع في أتم الصحه والعافيه.
أعزائي .. انا قبل رمضان بأربع أيام وانتم بخير راح أقوم بزياره لبيتي الثاني ( دولة قطر الشقيقه )
تقدرون تقولون رحله استجماميه ^ _ ^
صحيح وقت متأخر بس ظروف عملي أجبرني :*_*:
بس بصراحه انا رحلاتي وسفراتي كلها داخل المملكه ... يعني هذه أول مره أسافر فيها لخارج دولتي الغاليه ويشرفني انها تكون لدولتي الشقيه وبيتي الثاني ( قطر )
انا حجزت بفندق الفورسيزون وخلصت كل شي ... وممكن أجي سياره أو طياره للآن ماقررت بصراحه ..
المهم اني ودي أعرف إذا في برنامج معين او اماكن سياحيه حلوه ممكن أزورها و المولات الراقيه وأفضل سينما ممكن أروح له
شاكر ومقدر لكم .. وربي يعطيكم الصحه والعافيه
أخوكم ومحبكم
صالح ^ _ ^
السلام عليكم
هلا ومرحبا فيك اخوي في بلدك الثاني ..
بالنسبة للمولات عندنا فيلاجيو (( أجدد سينما تم افتتحاها فيه )) , و الستي سنتر (( فيه مجمع سينمات )) , واللاندمارك , والرويال بلازا (( أيضا ً فيه سينمات صغيرة وهادية جدا ً )) , وأخيرا الحياة بلازا المحاذي لفيلاجيولكن أفضلهم فيلاجيو وهو الأكثر حيوية .. بعده الستي سنتر لكن مابتشوف فيه من هل قطر الا شوي
(( فيلاجيو ))
وبعدهم يجيك اللاند مارك .. صغير شوي لكنه محبوب من قبل اهل قطر
بالنسبة للأماكن الساحية عندنا .. اللي يحظرني منها الآن فقط منهم (( سوق واقف )) لابد انك تزوره رغم الحر لكن الجو هاليومين يمشي الحال والمكان يستاهل .. فهو سوق مبني عالطراز القديم وبإشراف سمو الأمير شخصيا ً !!(( سوق واقف ))
وان كنت من محبي البر والطعوس ولا البحر .. عندك (( سيلين )) ولا (( خور العديد )) فهي عبارة عن طعوس مطلة على منطقة بحرية ومحمية طبيعية ممنوع فيها الصيد منعا ً باتا ً باستثناء الصنارة! وتقابلك من الجهة أراضي المملكة العربية السعودية التي ترى بوضوح وانت على الساحل .. وهذا عن طريق شركات سياحية تأخذك بسيارات دفع رباعي بجولة في هذي المنطقة(( خور العديد والأراضي السعودية فالجهة المقابلة كما هو واضح ))
مشروع اللؤلؤة .. أنصحك بزيارته بصراحة .. فهو مشروع مارينا وابراج سكنية ومحلات وكوفيهات راقية مطلة عالمارينا الذي فاز بجائزةأفضل مارينا في العالم لعام 2009 أو 2008 ما أذكر بالظبط
ولاتنسى تمر تشوكلت بار كوفي .. مكانه حلو بس ماجربته كل ماروح له متأخر وبيسكر .. بس العالم أذونا فيه ههه
(( صورة مستقبلية لاللؤلؤة بعد اكتمال المشروع 100% ))
(( صورة حالية ))
وان كان الجو زين وينفع حق المشي وماعندك شي آخر الليل .. مر على كورنيش الدوحة وتمشى لك شوي .. وأفضل جزء من الكورنيش واكثره حيوية هو أقربه لفندقك ولفندق الشيراتون اللي على شكل هرم .. بالظبط عند مجسم كبير لدلة قهوة تلقاه هناك .. وبتلقى كافتيريا بالمنطقة هذي وجرب الطب لك شاي كرك من عنده .(( كورنيش الدوحة ويظهر في الصورة فندق الشيراتون على شكل هرم - تم افتتاحه عام 1982 ولايزال تحفة معمارية من تلك الأيام إلى يومنا هذا وبصفة خمس نجوم ويعتبر فندق المؤتمرات في الدولة ويقع فندقك على بعد أمتار من يمين الصورة ))
هاللي يطري علي الحين وان تذكرت غيرهم ان شالله بضمهم للبقية
وان شالله الأعضاء مابيقصرون معاك
موفق ان شالله