1. السلام عليكم وكل عام وأنتم بخير وتقبل الله منا ومنكم صالح الأعمال ،،

السلام عليكم وكل عام وأنتم بخير وتقبل الله منا ومنكم صالح الأعمال ،،

مرة من المرارير (المرارير جمع تكسير لمرة) يوم كنت في دبي يوم أنها رخيصه الله المستعان ،، وكان معي جوالي وكان الجوال مش ولا بد يعني سفري مشي حالك ،، والا ذيك المحلات اللي مليانه في شارع المصلى بدبي قلت يا ولد يمدحون محلات الجوالات بدبي رح صلح جوالك أكيد سعرهم رخيص وناس خبره وخر عنهم وطبعاً غالبية اللي يشتغلون في محلات الجوالات إيرانيين بصراحه ما أرتحت لكن قلت يا ولد مهوب ضارك شي صلحه ،،
وعطيت جوالي ذاك المهندس اللي وخر عنه لابس نظارات لحام قلت هذا يصلح فياغرا مهوب جوال وأنا فرحان وخر عني يا ولد عطه جوالك أكيد بدال مهوب رهيب 2000 بيخلية برج بيزا المائل ( ما بعد طلع برج العرب ولا المملكة ولا الفيصلية) أيام الجوالات أم هندل ،،
المهم عطيته الجوال قال ( أنتا يزي بكره ) يعني تعال بكره تاخذ جوالك وأنا مبسوط قلت ذاك اليوم أبتغدى في أحسن مطعم المهم رحت طقيت لك الشخصية وتغديت وتمشيت في دبي يوم أنها رخيصه
وجاء بكره اللي هو اليوم اللي هو يعني عقب اليوم اللي عطيت الجوال للمهندس وقلت يا ولد جوالك اللي محد صلحه أكيد ألحين يتصل بلاش ( مدري وش دخل هذي بس مشوها )
رحت وقابلت سعادة الدكتور باش مهندس خان منتظري قال ( هازا زوال ما فيه كويس كربان كربان) قلت له بالله عليك كربان وقلبي ناغزني قلت ما بدهاش آخذ جوالي وأظف وجهي ،،
المهم عقب ما رجعت لمدينتي الغالي الرياض بصراح مدري وش دخل الصورة هذي لكن لا تشرهون واجد ،،،
فيه زميل لي عنده محل جوالات وعنده مهندسين قلت تكفى يا صديقيني صلح جوالي قال أبشر على ها الخشم قلت عليه الشحم المهم خذ جوالي وقعد يومين ثم اتصل علي قال يا حبيبي ذا جوال هذا ما ينباع ولا بريالين الحين قلت وشلون وش السالفه وقعدت أهوجس
قال يا حبيبي جوالك هذا فيه قطعة ألكترونية تعتبر أهم قطعة في الجوال مهيب موجوده قلت أفا وش السالفه وقصيت عليه القصه وهو عنده خبره لأنه من أقدم الناس اللي يجيب جوالات من دبي ،، قال أيه لعبوا عليك قلت أنا محد يلعب علي
قال لي بعض محلات الصيانة في دبي ياخذون القطعة الألكترونية المهمة في الجوال ومهيب أول مره تصير معك صارت مع ناس غيرك لكن الله يعوضك خيرا منه
المهم أنا تراني ما زعلت ولا تضايقت أصلا عادي لازم تكون الروح رياضية حتى لو لعبوا عليك العالم ونصبوا عليك عادي أيزي كوم أيزي قو لا تضيق صدرك لأنك لو تضيق صدرك ما راح تستفيد بيصير الهم همين وأنا من رأيي أنك ما تتحسف ولا شي هي تجربه ولازم تتعلم منها وبيني وبينكم والكلام للجميع أنا ما تضايقت واجد ولا زعلت لكن حسبي الله عليه ،،،
ودمتم سالمين