كوالالمبور المسافرون العرب

أكتشف العالم بين يديك المسافرون العرب أكبر موقع سياحي في الخليج و الوطن العربي ، يحتوى على أكبر محتوى سياحي 350 ألف استفسار و نصائح عن السفر و السياحة, 50 ألف تقرير سياحي للمسافرون العرب حول العالم و أكثر من 50 ألف من الاماكن السياحية و انشطة وفعاليات سياحية ومراكز تسوق وفنادق، المسافرون العرب هو دليل المسافر العربي قبل السفر و اثناء الرحلة. artravelers.com ..
قصة حب تايلندية
17-12-2022 - 03:38 pm
السلام عليكم ورحمة الله وبركاته
الحمد لله والصلاة والسلام على رسول الله ..
صباحكم ورد وعود وعنبر
سلام مربع كبير واخيراً التقرير جاهز
تحية لكم من اعماق قلبي الصغير
اعتذر منكم على التأخير في طرح التقرير لانشغالي
و لو ما غلاكم والطلبات اللي توصلني على الخاص
كان لي الدافع الكبير لأتمامه
باختصار شديد ,,
هي رحلتنا رقم ماليزيا
روابط رحلاتي السابقه :
السعر :
الكبير : 170 دينار كويتي
ومن تأخر بالحجز بالبدايه معنا اصبحت تذكرته 200 دينار
الصغير لعمر 11 سنة : 145 دينار كويتي
البيزات والفلوس اهم شي :
· تحويل قيمة الفنادق كلها الي رينجت
وتوزيعها في أظرف كل فندق لحاله
وكتابه اسم الفندق ومدة السكن على الظرف
· تم تحويل مبلغ 1000 دينار كويتي الي رينجنت ( مصرف ورحلات )
· والباقي دولارات
· ومبلغ احتياط في بطاقه البنك
  • بطاقه الفيزا ضروريه

وعن تجربه ونصيحة من صراف في مطار مسقط
الصرف في ماليزيا افضل سعر
تاريخ السفر : 18/8/2013 الي 5/9/2013
خط سير الرحلة :
كويت - مسقط- ماليزيا-مسقط - الكويت
الصافي 17 يوم
انا كل سفراتي اربط على الشنط شرايط ملونه
حتي يتم تمييزها من بين الشنط وهي طالعه على سير الشنط
الرحله كانت الساعه 4 عصرا
طلعنا من البيت الساعه 12.30 عن الزحمة
  • * دعاء السفر **

"الله أكبر، الله أكبر، الله أكبر
{سُبْحانَ الَّذِي سَخَّرَ لَنَا هَذَا وَمَا كُنَّا لَهُ مُقْرِنِينَ * وَإِنَّا إِلَى رَبِّنَا لَمُنقَلِبُونَ}
"اللهم إنا نسألُكَ في سفرنا هذا البرَّ والتقوى، ومن العمل ما ترضى،
اللهم هون علينا سفرنا هذا واطو عنا بعده، اللهم أنت الصاحب في السفر،
والخليفة في الأهل، اللهم إني أعوذ بك من وعْثاءِ السفر، وكآبة المنظر
وسوء المنقلب في المال والأهل
" وإذا رجع قالهن وزاد فيهن "آيبون، تائبون، عابدون، لربنا حامدون"
خطة السفر والمناطق التي سنزورها بالترتيب :
سيلانقور
لنكاوي
بينانغ
كوالالمبور
وتفاصيل كل منطقة بتكون منفصله مع احداثها
وبما انكم تحبون الصور مثلي
فأهديكم هاللقطات اشعار لبدء السفرة الممتعه
وصلنا المطار وبسرعه وقفنا على الكاونتر
ندخل الشنط
وبدأت الزحمه
والحمد لله خلصنا خلال ساعه
وتمينا نسولف مع الوالدة وباقي الأهل
الحاضرين لوداعنا
حتي بدأ النداء للرحله
سعادة لا توصف
انا كان ودي اطير واركض من الوناسه بالمطار
فما بالك بالصغار وخصوصا اللي اول مرة
يكونون معانا
قلبوا المطار هيصة وزمبليطة
اسم الله عليهم
وطبعا وصايا الوالدةالله يحفظها :
خليكم مع بعض
لا تتفرقون
لا تتهاوشون
لا تتزاعلون
لا تركبون التلفريك واتطيحون
لا يضيعون الصغار
هههاي ياحلاتها الماما
بعد روحي تخاف علينا
الله يعطيها الصحة والعافيه ويطول لنا بعمرها
ودخلنا نكمل الأجراءات وختم الجوازات
السوق الحرة
انا وهالممر عشق لا ينتهي
الأبتسامة شاقه الوجه
والتصوير شغال


رحلتي الى ماليزيا
التعليقات (9)
قصة حب تايلندية
قصة حب تايلندية
هذه بوابتنا

وهذه هي الحب الكبير طيارتنا
ناطرتنا
تناظرني واناظرها من خلف الزجاج

الطيارة صغيرة نوعا ما
لكنها ما شاء الله مليانه ولا كرسي فاضي
وصورت المضيفة خلسه
صراحة صايرين نفوس وفيه وحدة شفتها تناشب
احد الركاب عشان التصوير

وتم الأقلاع في الوقت المحدد
الحمد لله

وتم تقديم الوجبات

وعدلت راسي بقلاص شاي
ولو انه مو حلو مثل شاينا في البيت

وقربنا نوصل عمان / مسقط
اطلاله جميله من الطيارة
طبعا انا عند الشباك للتصوير

ووصلنا بالسلامة
وكانت الباصات واقفة تنتظر وصول الطيارة لنقلهم
الي مبني الركاب

الجو كان حلو وما في رطوبه مثل العام الماضي قاتله
يا هلا ومسهلا بشيخهم

ووقفنا نصرف دولارات عند هالصراف

وصراحة خوش رجال
نصحنا نحولهم الي رينجات في ماليزيا يكون السعر افضل
هذه الأمانه والا بلاش

السوق الحرة في عمان

يا حلات دراريع القرقيعان الوانهم تشرح القلب
الجديد هالعام فيه خدمه الواي فاي بالمطار
بس حسافه طولت معانا ما اشتغلت بسرعه
ركبنا الطيارة الثانية يالله اشتغلت والله قهر
كنا بنرسل للأهل رساله نطمنهم بالوصول

وما يصير ما ناكل من صب واي
لذيذ للجوعانين فقط

قصة حب تايلندية
قصة حب تايلندية
الترانزيت في مطار مسقط كان ساعتين الا ربع تقريبا
توضينا وصلينا واكلنا وتوكلنا على الرحمن
وصار الليل ما شاء الله والجلو حليو
هذه طيارتنا الثانية كبيرة ونظيفه

وتم توزيع المنيو

اول الغيث قطرة
مكسرات ومشروبات غازية او عصير

وبالصورة لاحظوا حطيت الأي فون على الشحن
عجيبه اللقطة احب هالصورة حست اني داخل الكيس قاعدة

وهذه الوجبة الأساسية الأولي خلال الرحلة الي ماليزيا الدعاء قبل الطعام
  • إذا أكل أحدكم الطعام فليقل: (بِسم الله، فإن نسي في أوله فليقل: بِسمِ الله في أوله وآخره).
  • من أطعمه الله الطعام فليقل: (اللهم بارك لنا فيه وأطعمنا خيراً منه).- ومن سقاه الله لبناً فليقل: اللهم بارك لنا فيه وزدنا منه.


قصة حب تايلندية
قصة حب تايلندية
طليت من الشباك
والا المنظر خيالي اول مرة اشوف
بزوغ الفجر
سبحان الله واحنا فوق بين السحب
هذا هو : الشفق
هو ما يدل على تلون
تبارك الرحمن

لا اله الا الله قادر على كل شي

وعلى قوله اخوانا المصريين
الصبح شقشق

وها هي الفاتنه بدأت بالظهور للعيان

تحملوني احب تصوير الغيوم

الحمد لله تم الهبوط بسلام
الطيار صراحة محترف ما حسينا كلش

قصة حب تايلندية
قصة حب تايلندية
وصلنا كوالالمبور الساعه 8.30 صباحا
رحلة طويله 6 ساعات
لكن الحمد لله سهلة

مطارهم عجيب فرق بينه وبين مطارنا

وركبنا القطار لنقلنا الي مبنى الركاب والشنط

سريع جدا ,,,,,,
استانس على هالرسومات داخل القطار

كل سفرة اشوف الهاردوز وما أدخل
ما أدري ليش
واتحسف ليه ردينا الديرة وشفت الصور
مجسم للقطار داخل المطار

وقبل الوصول لكاونتر الجوازات
فيه مكاتب لبيع شرايح الموبايل والنت
اخذنا من سليكوم
نت وخط ب 50 رينجنت
ممتازة

قصة حب تايلندية
قصة حب تايلندية
ختمنا الجوازات
واخذنا الشنط
كان فيه زحمة شوي على الكاونتر
فيه اكثر من رحلة واصلة بنفس الوقت
لكن اجراءاتهم سهلة وسريعه
وتوكلنا على الرحمن

وعقبها شفنا نكتب التكسي
تقول اسم الفندق وعدد الأشخاص وعلى اساسه يعطيك السيارة
اخنا ميني فان
وتكسي صغير
عشان يكفينا كلنا
والأسعار على التذكره مع اسم الفندق

الأسعار :
ميني فان 167 رينجنت
والتكسي العادي 84.90 رينجنت
واتجهنا الي رقم البوابه المذكورة في التذكرة
وركبنا وانطلقنا الي الفندق
سالمة يا سلامة رحنا وجينا ووصلنا بالسلامة
عاد اشتغلت من هاللحظة المرشد السياحي للاعضاء الجدد
كشخة 0الجو صافي وحلو ومو حار

ووصلنا بعد ساعه تقريبا الي اول محطة
((((سيلانقور / فندق البراميد الرائع )))))

اسلتمنا الغرف على طول مع ان وصولنا قبل الموعد المحدد
وهذا تقريري مع الصور لفندق البراميد مع التفاصيل

هاللقطات ليليه بعد الراحة لفندق الصن واي الملاصق
للبراميد

المنظر عجيب وخصوصا بالليل

وهذه اطلاله غرفنا

التفاصيل لاحقا ,,,,,,,,,,,,

قصة حب تايلندية
قصة حب تايلندية
تفاصيل الحجز
الحجز طبعا من بوكينق
انا عميله (عبقريه) Booking Genius!
وهذا العلامة تدل عليها
يعني اخذ خصم اضافي على السعر المعلن بنسبة 10%
كنت حاجزة 3 غرف سوبيريور بدون اطلاله - مع افطار - الغاء مجاني
سعر الغرفة 1467 رينجنت ( غير شامل الضريبه والخدمة 16%)
وبمتابعتي اليومية للموقع والأسعار
لما اطلعت عيني
لقيت سعر حلو لغرفه مطله مع افطار والغاء مجاني
بعد شهرين تقريبا من حجزي الأول
بسعر اقل ب 90 رينجت ( ياحلاوة ينفعون مصرف لشي ثاني )
هذه تفاصيله
سعر يناسب الجميع لغرفه مطله على الألعاب ( مدينة الصن واي لاقون)
3 غرف لمدة 3 ليال
نوع الغرف
سوبيريور مزدوجة أو توأم مطلة على المحيط
تحتوي هذه الغرفة الواسعة والمكيفة على حمام خاص مع yukata (قطن kimono) ونعال
تطل الغرف إما على المدينة أو المتنزه (رهن بالتوافر)
يُرجى ملاحظة أنه لا تتوفر غرف متصلة
التكلفة الإجمالية لهذه الغرفة:
MYR 1,377 رينجنت
الضريبة (6%) غير مشمولة
رسوم الخدمة (10%) غير مشمولة
وبسرعه البرق تأكد الحجز ولغيت القديم
وطاير من الفرحة طاير
الحمد لله ما يضيع لي تعب
وصلنا والتعب واصل حده
وقبل الموعد اللي المفروض نستلم فيه الغرف بساعات
لكن الحمد لله ربي سهل وطلبنا من الأستقبال الدخول مبكرا
وطلعت غرفنا جاهزة
وما قصروا وافقوا على طول مع ابتسامة شقاقيه
صراحة تعاملهم راقي جدا ويسهلون على الناس كثير
طلبوا حجز الفندق مع الجوازات للتأكد
و200 رينجنت لكل غرفة تأمين
لكن طلبنا رفع ما في الثلاجة وما دفعنا التأمين
بكل سهوله مو مثل باقي الفنادق تسويها مصيبه
هذا الشاب جدا متعاون
http://img33.imageshack.us/i/rv43.jpg/

قصة حب تايلندية
قصة حب تايلندية

الممرات

غرفنا كلها نفس الشي
نفس الأطلاله وكلنا جنب بعض ( جيران )
كل الممرات فيها من هاللوحات الحلوة

غرفتي
خشي برجلك اليمين يا شابه

والمفاجأه رقم ( 1) للعيال
هي الأطلاله
صراحة ما شفتهم فرحانين كثر هاليوم وهم يطالعون الصن واي والتعب طار
ويحنون يبون ينزلون الحين

عزكم الله ( الشطاف موجود )

واتفقنا نريح بالغرف ساعتين تقريبا
ونزلنا نتغدا بالمول نفسه ( مول البراميد )
للبحث عن وليمة تليق بالمسافرون العرب

قصة حب تايلندية
قصة حب تايلندية
رحلة البحث عن الغداء والعشاء - 2 في 1
نزلنا المول وحالتنا حاله
الجوع قاتل وكافر
صاله التزلج في المول

المول عجيب وونيس فيه كل شي
يومين ما يخلص كل الأدوار

والقرار كان تقريبا منصب على مطعم فش ماركت اللذيذ

موقعه بالدور الأرضي ما يضيع ابداً
بعض المحلات

طبعا مش اول مرة نزوره في كل سفرة لنا قعدة فيه

هذا طلبنا كلنا بالصور
هذا طبقي ربيان بالجبن يمي يمي يمي عجيب حتي اخر قطعه

وعشان يسيح الجبن لازم اللهب

وطبق خواتي

كل الأطباق خطيرة وما فيها زفرة
يعني الطبخ 100/100

وام الربيان شي ما حصل
اللي يسافر زيزا لا يطوف هالمطعم ناطع

وهذه فاتورتي انا وعيالي بس = 142 رينجنت بس

والحمد لله على هالنعمة ترسنا الكرشنة وكملنا تمشي بالمول لما دخنا
دخلنا سوبرماركت نتطمش
وشفنا الرقي الأصفر

شفنا هالحبيب برد ستوري واخذنا منه معجنات لذيذة للحالات الصعبه اخر الليل
نضمن مستقبلنا والعيال الله يخليهم

وختمنا اليوم بايس كريم بارد يسرسح على القلب من ماكدونالدز

عوافي علينا
ورجعنا الفندق للنوم من بعد يوم متعب لكنه يوسع الصدر
انتظروني بتفاصيل اليوم الثاني،،،،،،،،،،،،،،،،

قصة حب تايلندية
قصة حب تايلندية
نسيت اقولكم على المفاجأه رقم
بهذا الفندق
ثاني يوم وصولنا يصادف عيد ميلاد عيالي
ومرت اخوي الغاليه
فسويت لكم طلب خاص لما حجزت الغرف
كيكة لعيد الميلاد
فوصلني الرد من الفندق بسرعه عن احجام الكيكات واسعارهم
فشفت ان الأسعار غاليه والكيك حجمه كبير
ما راح نقدر نشيله الي لنكاوي
فاقترحوا علي تقديم كيكة مجانيه لكن حجمه صغير
فوافقت
المهم الفرحة مو شرط الحجم
فلما رجعنا من المول
فتحنا باب الغرفة
وشفنا الكيكة على الطاولة
والعيال يطالعون بعض
فقلت لهم هذه هديتي لهم من الفندق
وتم الهجوم على الكيكة اللذيذة
عجيبة والأسفنجة طرية وندية جدا
ما توقعتها بالطعم الرائع

شكرا ماما

أنا سعيدة والفرحة مو شايلتني
تفاعلكم وتواصلكم يمدني بالطاقه
فديتكم والله
والجماهير والمشجعين منتظرين التقرير

شكرا لكم من القلب
واعذروني هالأيام امتحانات العيال الفاينل ابتداءا من اليوم ولمدة اسبوع
واللي بقدر عليه انزله لكم من تفاصيل الرحلة
دعواتكم للعيال بالنجاح وربي ييسر لهم الأختبارات ويوفقهم
ويفرحهم بعد هالتعب


خصم يصل إلى 25%