السلام عليكم ورحمة الله وبركاته
بمناسبة انتصاف العطله و اصرار امي علي اني انزله بالمنتدى عشان يفيد الجميع
ب اقدم لكم كتيب اشتغلت عليه صيف 2013 لتجهيز رحلتنا الى لندن
كان تخطيط الرحله مسؤوليتي , وسويت تحدي لنفسي هل اقدر اخطط لها بتفوق ونجاح او لا .
والحمد لله نجحت
صار فيه تغيير ببعض المخططات لظروف الاجواء و تعب احد المسافرين فاضطرينا انه نغير لاماكن تناسب المريض وماترهقه ..
طبعا كان الفضل لله ثم العضو https://artravelers.com في ترتيبي وتخطيطي للرحله
قريت بمنتديات كثيره ومواضيع كثيره بس مثل تقريره عن لندن ماشفت ولا استفدت الشي الكثير الا منه
واغلب الكتيب كان من مواضيعه جمعتها ورتبتها بطريقه سلسه عشان يسهل علينا اختيار الاماكن
ويكون الكتيب معنا بكل تنقلاتنا
بالبدايه كنت ناويه الكتيب يكون لي ومافكرت اوزعه او انشره
وجلست اسويه بكل حب وحماس عشان يفتح نفسي وانا اقرا فيه وابحث عن الاماكن
بعد ما خلصت من الكتيب طبعته ووريته اهلي
حبوه كثير كثير وامي اكثر وحده عجبها وطلبت نسخه لها " مع انها معي بالرحله بس معجبها وحبت تحتفظ بواحد "
بعدها اقترحت علي امي ليه ماتطبعين نسخ كثيره وتوزعينها على المسافرين اللي معنا بالطياره
خفت اول ماقالت لي الاقتراح
على طول جاء ببالي انه يمكن يكون مخالف ويبلغون عني و يمسكوني اول مانوصل المطار
وتحقيق وحوسه ( دراما كوين )
وانا وحده ما احب الشبهات والمشاكل
فاستبعدت الفكره تماما
بعدها بكم يوم رجعت اشيك على كل الحجوزات واقرا الكتيب
واحس بفخر ان هذا طلع مني
وقعدت افكر ليه ما افيد غيري واوزعه مثل ماقالت امي
يمكن شخص واحد تفيده معلومه من هالكتيب ويدعي لي واخذ اجر مساعده ودعوه
بديت بعدها ابحث هل التصرف مخالف والا لا
واقرا واقرا واقرا ومالقيت اي شي يدل على انه ممنوع نوزع اشياء مثل كذا على المسافرين
واشاور ابوي بحكم معرفته وزياراته المتعدده لهذي الدول وقال لي توكلي على الله
ورجعت اعدل بكم شغله على الكتيب
وطبعت 50 نسخه
عملت حسابي ان كل عائلة بالطياره ياخذون واحد عشان يستفيد اكثر عدد ممكن
وتوقعت كثير مارح ياخذون لان اكيد بعضهم مو الزياره الاولى للندن
جاء موعد السفره والكتيبات معي ، ركبنا الطياره والامور ماشيه تمام ولا احد قال لي شي الحمد لله
بعدها لهيت بالطيران والاجواء وتناسيت الكتيبات يوم شفت امي ناسيه امره
كانت نيتي اخلي احد الاطفال اللي معنا يوزعها بس من استقرينا بمقاعدنا وتجيني ام الركب
وين عقلي يوم افكر اوزع خفت مرره مره لذلك تناسيت امرهم ..
باقي ساعه على الوصول
الا تطيح امي بالكيس اللي فيه الكتيبات
وتقوم تاخذهم وتوزعهم هي ، بعد ماشافت الخوف اللي عاكس علي
دقايق الا اشوف من بعيد المضيفه تكلم امي واخذت منها الكتيبات ،
طبعا بهاللحظه جلست اتخيل شكلي وانا اتمرمط بين شرطتهم
رجعت امي وقالت ان المضيفه اخذتها تكمل توزيع عنها
وما اخذت 5 دقايق الا وهي راجعت لنا
قالت ان باقي المسافرين يبون نسخ معكم ؟
لا تسالوني هنا عن شعوري
اعتذرت منها لقلة النسخ
ورجعت ثاني قالت بعض المسافرين طلبوا اي وسيلة تواصل عشان ارسل لهم نسخ الكترونيه
حتى المضيفات طلبوا نسخ الكترونيه
والى يومكم هذا تجيني طلبات نسخ الكترونيه ودعاوي تشرح الصدر على الكتيب
شعور جميل الحمد لله
ووصلني كذا كومنت يقولون انه نجي لندن كثير بس ما درينا عن بعض الاماكن السياحيه الا من الكتيب
و بناءا على طلب امي و ردا لجميل هذا المنتدى
نزلت هذا الكتيب واتمنى يفيدكم لو بشي بسيط
هذا رابط الكتيب
اي شخص حاب يطبع او ينشره مع حفظ الحقوق ياخذ راحته
ولا احلل اي شخص ينسب هالكتيب له او يطمس حقوقي من الكتيب
.
.
.
واخيرا
ان أصبت فمن الله وإن أخطأت فمن نفسي ومن الشيطان
والسلام عليكم ورحمة الله وبركاته ..