1. وبعد ما رجعنا أكلنا خفايف ورحنا في سبات عميق

بسم الله الرحمن الرحيم
السلام عليكم ورحمة الله وبركاته
بارك الله لكم في رمضان وتقبل منا ومنكم صالح الأعمال إن شاء الله
6يوم في ربوع الألب وضواحيها
بدآيةً بعطيكم أبطال الرحلة ( أنا و المدام ) وكان خط سير الرحلة كالتالي /
الخفجي - الدمام - مسقط - باريس - شتوتغارت - زيورخ(هورقن) - قارمش - سان لورينز ( ماوصلها عربي قبلي )

• سالزبروغ - زيلآمسي - ميونخ - مسقط - الدمام - الخفجي

طبعاً خط السير طويل ولكن كان ممتع
الناقل الجوي كان الخطوط العمانية
بسم الله نبدأ القصة الشيقه والجميله بحكم إن معاي المدآم أول مره تطلع برى المملكة فالنكهه خاصه لهالسفرة وأنا كتبت في موضوع لي قديم
ان هالدول الخمسه رحلة يجب تكرارها ولكن هالمره كررتها مع تغيير الاماكن بالغالب ماعدا باريس وزيلامسي فقط المكرره
أول يوم وصول كان بتاريخ 15-6-2014 يوم الأحد الساعه 8 الصباح وطبعاً ماحجزت سيارة بحكم إني قريت موضوع هنا لأحد الأعضاء
كاتب إن الاسعار تقريبا نفس الشي
والصدمه الأولى ماكانت بسعر الحجزلأني كنت لاقي بالنت ب 120 يورو لأربع ايام وبالمطار مافيه أرخص من 540 يورو ؟؟؟
وهذا كان الدرس الأول اللي استفدت منه إني أكون حاجز حجز مسبق لأي شي بأوروبا أفضل من التأخير مثل ما صار ببرج أيفل !!!!!
طبعاً البرج رآح أحكي لكم قصته بعدين
بعد ما رجعت أجر أذيال الهزيمة من حجز السيارة قررت إني أنتصر لنفسي
ورحت للسكك الحديدية وحجزت تذكرتين لي والمدام لمدة 3 ايام للخمس مناطق بباريس
بحكم إني ساكن في المنطقه الرابعه ومن اول يوم ولله الحمد عرفت للخريطة حقتهم وإن شاء الله إذا الله أعطاني عمر بنزل لكم شرح للقطار
المهم ركبنا القطار ورحنا على إرمونت إيبونه وهي المنطقه اللي انا ساكن فيها في فندق من نجمتين ولكن كان نظيف
والمنطقه فيها عرب ومطاعم حلال وجميله هاديه
والصدمه هنا إن الرسبشن مقفل من الساعه 12.30 إلى 16.00 وحنا وصلنا 12.45 وتعبانين من الطيارة والقطار والمطار
المهم وبعد عدة اتصالات معاهم ولله الحمد جتنا الموظفه وأعطتنا مفتاح الغرفه
ولكن الغرفه كانت بسريرين منفصلين وأضطرينا نغيرها ثاني يوم وكانو ودودين وما أعترضو على التغيير أبد
طبعاً أول يوم وصول وحنا تعبانين ولكن حرآم يضيع اليوم بالنوم والجلوس بالفندق وغيرت ملآبسي بعد ما أرتحت ساعه فقط
واخذت المدام وتوجهنا إلى الشانزليزيه غرام الحريم
طبعا الحريم عامةً لو تخليها تشارك بالماراثون عشان تفكك عظامها وبعد دقيقه تقولها بنروح السوق تلقاها قدامك
المهم طلعنا من الفندق ولمحنا كلمة حلال ع اليمين اللي قال لنا عليها موظف الفندق ورحنا عنده وتغدينا
و منه أنطلقنا بالباص للقطار ومن القطار رحنا للشانز في جو ولا أروع شوي غيم وشوي شمس والنسناس بارد الجو كان جداً جميل وتمشينا فيه مايقارب ثلاث ساعات ورجعنا بعد ما طاحت رجولي من المشي ولا المدام لو على كيفها ننام بالسووق

وبعد ما رجعنا أكلنا خفايف ورحنا في سبات عميق

إلى هنا ينتهي اليوم الأول وإن شاء الله بحكي لكم قصة اليوم الثاني بكرة بس ماراح أحط ولآ صورة لأنها معقدة وشغلتها طويله خصوصا إن عندي مايقارب 1200 صورة من غير مقاطع الفيديو ياليت اذا فيه احد من المشرفين يساعدني بالصور ارسلهم له وهو ينزلهم هنا بالموضوع
همسه ( سان لورينزو ما أتوقع فيه أحد وصلها قبلي بالأخص خليجي ولو معروفه كان صارت من ضمن وجهاتهم أكيد )
سلآم