ابو ظبي المسافرون العرب

أكتشف العالم بين يديك المسافرون العرب أكبر موقع سياحي في الخليج و الوطن العربي ، يحتوى على أكبر محتوى سياحي 350 ألف استفسار و نصائح عن السفر و السياحة, 50 ألف تقرير سياحي للمسافرون العرب حول العالم و أكثر من 50 ألف من الاماكن السياحية و انشطة وفعاليات سياحية ومراكز تسوق وفنادق، المسافرون العرب هو دليل المسافر العربي قبل السفر و اثناء الرحلة. artravelers.com ..
مسافرأبوظبي
16-12-2022 - 07:32 pm
أخواني السلام عليكم ورحمة الله وبركاته
في ظل التطور وعالم السرعة اللي وصلنا له ولله الحمد..
والكثير من المعالم والأشياء القديمة اللي تعودنا عليها بدأت تختفي .. ومن الأشياء اللي كلنا تعودنا على وجودها وأكيد أكيد زرناها .. الأسواق التقليدية الشعبية ..
الحلو فالسوق الشعبي انكم تقدرون تتسوقون فجو بسيط وبطابع تراثي قديم.. وزيادة على هذا ان الأسعار تكون دائما معقولة والواحد يجرب المبايعة مع العاملين ويحاول ينقص فالأسعار ..
ومن أهم الأسواق التقليدية أو الشعبية اللي بعدها موجودة ف أبوظبي https://artravelers.com/s/311 :
سوق السجاد والسمك والخضروات والفواكه في الميناء
وسوق مركز التجارة العالمي - اللي هو مكان السوق القديم السابق في أبوظبي واللي تم تطويره وبناءه على هيئة مركز مغلق بس فيه الطابق التقليدي البسيط..
وسوق مركز مدينة زايد https://artravelers.com/p/re/905456
طبعا كلنا نعرف أن السمك من أهم الأطباق عندنا ..
وشو أحسن مكان لشراء السمك غير سوق السمك اللي قرب ميناء زايد، اللي تقدرون تلاقون فيه السمك الطازج بكل أنواعه ..
وطبعا اللي يدل على جودة السوق هو عدد الناس اللي تزوره كل يوم وانا واحد منهم طبعا لول
وبالقرب من سوق السمك تلقون سوق الخضار والفواكه
بالنسبة لي أحب أخذ الفواكه والخضار من هالسوق ، لأن فيه الكثير من المحلات وتقدر تفاوض في الأسعار وتبايع وتشوف أنواع مختلفة من الفواكه والخضار اللذيذة ..
احساس جميل لما تنزلون لسوق الخضار وتشوفون الخضروات الطازجة والخيارات العديدة اللي عندهم وبالنسبة لي ما قدرت الا ان اشتري كل الفواكه والخضروات اللي اشتهيتها في ذاك اليوم.
ومثل ما ذكرت فالبداية .. بجنب هالأسواق يوجد سوق السجاد
واحب اشارككم بمعلومة قالي إياها واحد من البائعين ان سعر السجاد يُحدد بعدد العقد اللي تكون في البوصة المربعة فكلما زاد عدد العقد كان السجاد أجود واغلى ..
فلما تشترون سجاد لا تنسون هذه المعلومة المهمة وحاولوا قد ما تقدرون تاخذون فكرة عن اسعار السجاد قبل الشراء.
والجميل في هالنوع من الأسواق انه السعر قابل للتفاوض مثل ما قلت وهالشي من الأمور اللي تخلي للشراء والتسوق فهالمكان متعة بحد ذاتها،
أعترفلكم اني مب شاطر فالمفاوضة على الأسعار، لكن لازم يوم أروح مثل هالأسواق يكون معاي حد شاطر لول.. فحاولوا قد ما تقدرون تحصلون على أرخص الأسعار في السوق.
وإذا تبون تزورون سوق شعبي فيه الكثير من المعروضات التراثية التقليدية أكيد بيكون سوق المركز التجاري العالمي خياركم ..
في كل مرة أزور السوق القى شي مميز ومختلف، وخاصة انه فيه أكثر من محل تلاقون فيها مشغولات يدوية وعبي ومجوهرات وحناء وعطور وملابس تراثية وغيرها الكثير ..
ومن الأماكن اللي أحب ازورها بعد هي سوق مدينة زايد اللي فيه أكثر من محل لبيع المستلزمات المختلفة من الأقمشة للإكسسوارات للملابس والعطور . . وبالإضافة بعد للذهب واللي تخصص له مبنى كامل
ومركز مدينة زايد مكانه في طريق المطار وطريق المرور
وهذه صورة لسوق مركز مدينة زايد من الخارج
والحلو انه بهالسوق انكم تلاقون الذهب على يمينكم ويساركم وفيه الكثير من الخيارات اللي بتحبونها.
وهذه باختصار جولتنا على الأسواق الشعبية في أبوظبي والصراحة التسوق بهالأسواق ممتع أكثر من مجرد تسوق ..
واللي يجربها يعطيني رايه


التعليقات (9)
Usas
Usas
ماشاء الله شيء جميل وحلو
يعجبني اكثر شي سوق السمك لان المأكولات البحرية مفضلة عندي
تسلم الايدي على الموضوع ,,,

مسافرأبوظبي
مسافرأبوظبي
الشكر لك أخي usas
ما شاء الله عليك كلك ذوق
مشكلتنا نحنا محبي السمك ما نرضى باي مكان ... بدنا دائما الأفضل والطازج أكثر
ذوقنا رفيع أخوي ما اعرف شو أقول أكثر

fudfud
fudfud
ما شاء الله أسواق رائعة. أعتقد من أفضل التجارب على الإطلاق خلال السفر زيارة الأسواق الشعبيه.. ممكن نشتري أسماك ولكن سوق الذهب نتفرج و-نروح

مسافرأبوظبي
مسافرأبوظبي
ههه أختي فاديا صحيح كلامك
خلينا على السمك أفضل

عناقيد الربيع
عناقيد الربيع
الميناء "الايرانين " سوقهم شي شي ماله صوره ..." مواعينهم حلوة "
مدينة زايد مدمرها الوساخة اقسم بالله اكره اخطف ع حمام عزكم الله
شو ريحة البواليع في المكان كله "قرف" ..اللي حادني عليه سوق الذهب
تحديدا محل سالم الشعيبي
بشكل عام جميع المراكز في العاصمة سواء كبيرة او صغيرة مرافقها زبالة
عكس مدينة العين تماما ..مادري هم يتعاملون من شركة مقاولات زفته
ولا العيب من الناس ...يبالها سنين ابوظبي الين تستوعب التقدم اللي وصلت له دبي ...
شكرا ع هالجولة
ودمت بود اخوي

مسافرأبوظبي
مسافرأبوظبي
الله يسامحك اظن بالغت بتعبيرك
ممكن انت يومها كنت متضايقة من شي
لكن انا ازور المنطقة دائما وما اشوف اللي شفته
وما يزور السوق الشعبي هذا العدد الكبير من الناس
اعتقد كل شخص له ذوقه الخاص ، لكن انا بنفسي ما امدح الا بالأماكن اللي تستحق
وكل مدن الامارات خير وبركة

عناقيد الربيع
عناقيد الربيع
ابدا ما بلغت هذا رأيي الشخصي وصدقني كثير ناس يوافقوني الرأي ...
تعال بس وشوف شكلي ما اروحه "مجبوره بعض محلات الذهب هناك مميزة"
ع طول اتلثم مع ان شكلي يكون غلط بس ماهمني اهم شي ما اشم الريحة
مدينة زايد بالذات هذا لحد يجب سيرته مفروض يسون له الف صيانة وصيانة ...
عندك كمان حمامات "الله يعزك" المشرف مول دون المستوى وزيها كثير
كمان اختلاف الجنسيات في ابوظبي اكيد له دور ..
بس بذمتك في اي وجه مقارنة بين مولات دبي ومولات أبوظبي؟؟

مسافرأبوظبي
مسافرأبوظبي
هلا أختي عناقيد الربيع
اشكرج على رأيج وعلى حرصج على توصيل فكرتج عن سوق الذهب
الاماكن الشعبية دائما وفي اي بلد تكون لها طابع خاص وميزة خاصة تعتمد ع طبيعة التجارة اللي تجري فيها والعدد الكبير من الزائرين كل يوم
وما اذكر اني شفت في السوق الشعبي بدبي اختلاف كبير عن اللي بأبوظبي
وانا أختي مثلج .. اتنقل بين دبي وأبوظبي وأحب في مولات أبوظبي طابعها المميز وروحها الدافئة
ان شاء الله نشوف تطور ونماء أكثر فكل مدن الإمارات
وشكرا لج مرة أخرى

مسافرأبوظبي
مسافرأبوظبي
وأخواني ادعوكم تتفضلون على موضوع أخوي وصديقي وليد المميز اللي عن سوق السمك الجديد في المشرف مول
موضوع كثير جميل ومفيد
اكبر سوق سمك في الخليج والأحدث عالميا في أبوظبي سوق مشرف https://artravelers.com/p/re/904033


خصم يصل إلى 25%