السلام عليكم ورحمة الله وبركاته
كيف حالج اختنا ام محمد وحمد
اختي راح اخدمكم في حاجه ان شاء الله تدعيلي
بعطيك رقم أخ مسلم تايلاندي سائق تاكسي ..
رجال ابوعيال وصبور وحبوب للغايه ..
يوديكم وين ماتبون ولا يتعبكم ..
اسمه : أمين بن محمد ..
وهذا رقمه :06614455160
اتصلوا له قبل السفر وقولوا له نبغي تحجز لنا شقه قريبه من ( نانا ) منطقة العرب
انا سكنت فيها مع الاهل شقق حلوة ونظيفة وادواتها كاملة ونظام أمن + بركة سباحة في السطح + اجهزة غسيل وتنشيف في الطابق التاسع (( ببلاش )) .. ماعليكم الا بالصابون
احنا اخذناها عن طريق هذا الشخص ودانا الى الشقق واتفقنا مع الاستقبال على مبلغ 2100 بات ( يابلاش ) غرفتين + مطبخ + صالة + تلفزيون كبير + فيديو سي دي + 2 بلكونه صغيره وكبيرة + 2 حمام داخلي وخارجي ( الله يعزكم ) + تكييف ( سبليت يونيت ) .
طبعا الاسعار متغيره بين شهر وشهر وماعليكم الا تحاولون فيهم ينزلون لكم ..
وعلى فكره راعي العماره اصلة ( هندي ) .. عليكم به جيبوا له هديه
الشقة مو قريبه على طول من شارع العرب هي بنفس المنطقة لكن داخل شوي ..
منطقة هادئة .. ويصير تروحون مشي او تاخذون تاكسي للذهاب الى المنطقة الشعبية ( نانا ) .
وانصحكم انكم تتصلون له يجيكم المطار وبعد ذلك يوديكم تشوفون الشقه اذا اعجبتكم توكلوا على الله
واذا حسيتوا انها بعيده عليكم شوفوا غيرها .
اتصلوا في الشيخ أمين وقولوا له من طرف اخوك جاسم من قطر ..
وهو بيعرفني على طول ..
انصحكم فيه خصوصا للي رايحين اول مره .. وراح يفيدكم كثير
يوجد موضوع عن الشيخ أمين مع اخونا العزيز ( ياماس )
رحلة الشيخ أمين ومشرفنا العزيز ياماس في تايلاند https://artravelers.com
واذا بغيتوا اي خدمه عطنوني خبر ولا يردكم الا لسانكم ..
رحلة موفقة ، ،،

السلام عليكم ورحمة الله وبركاتة
حياكِ الله اختي الكريمه وان شاءالله رحله موفقه ....
أختي ماراح أزيد شي على كلام خبرينا الباتشينو إلا بشغلة الشيخ امين فالله الله فيه تراه رجال طيب خلوق وامين على أسمه ...
ذكر لي أنه فيه شقق جديده ورخيصه لكن مارحت لها ... لكن هو يمدحها وهو اهل ثقه ماشاءالله عليه ...
ويالله العافيه

مشكورين وايد ((خبير سفر تايلاند)) ((ya-mas))
بس اكيد يا خبير عندك وايد معلومات عن الشقق في بانكوك واريد اعرف ((بثقل عليك شوية)) بس طمعانه في كرمك ..
وهذه الشقة قريبة يعني من جريس ولاند مارك والا في السكك والا واضح المكان لاني صراحه ((اهوم)) يعني بالعربي الفصيح اتجول في الليل وايد ....واذا كانت الشقة مخشوشة صعبة الطلعة في الليل والرده .
لانه مرات اروح بدون زوجي ... مع العائله وكلهم حريم وايد ماشاء الله وعيال ...
علشان جذية نبقي مكان واضح للعيان ..ومشكورين وايد وايد ...

أنتي أتصلي على هذا الشخص وحطي الطلبات اللي تبينها،،،
لأني شفت وجه أخوي ياماس أول مارجع و كان مبسوط من هالسواق الله لا يغير عليه،،،
وعلى العموم هي كل فترة تطلع فيها شقق جديدة بس الكلام هل هي أمينة وتنفع لسكن العوائل أم لا،،،

مرحبا الساع
اختي .. بالنسبة للموقع فهو شوي داخل مو على الشارع ..
مثل ماذكرت لج .. الشقة مو قريبه على طول من شارع العرب هي بنفس المنطقة لكن داخل شوي ..
منطقة هادئة .. ويصير تروحون مشي او تاخذون تاكسي للذهاب الى المنطقة الشعبية ( نانا ) .
اما اذا بغيتي مكان ثاني فعليكم بسؤال اخونا الشيخ أمين ..
بس انا سائل من قبل عن اقرب شقق للمنطقة فطلعت هذي الشقق هي الاقرب نسبياً .
ومثل ماقال اخونا كبيان كل فترة تطلع شقق جديدة .. ان شاء الله راح تحصلون اللي تبون ..
بالنسبة للتمشي في المنطقة بنسفج
مدري والله شاقولج .. هي منطقة هاديه جدا .. مو نفس منطقة العرب اللي رايح و اللي جاي .. فهي بالليل موحشه طبعا وذلك لهدوئها .
سالوا عن فندق ( رويال بينجا هوتيل ) في وسط منطقة نانا ( العرب ) بس مدري اذا كان متوفر نظام شقق او لاء ..
وانا حاضر لأي سؤال ...

يامرحبا فيكم جميعاً اخواني
خبير تايلاند شحالك وشحالكم كلكم ربكم بخير .
خبير تايلاند في فندق نظام شقق يمكن تعرفة وتفيدني لانه عرفته عن طريق وحده شفتها في الطيارة قالت انها من 1992م تروح بانكوك وتعرف كل شيء وهم الظاهر هالمره جلسوا فيه . وتمدحه وايد وللاسف ما اخذت رقم هاتفها .. المهم اسمه بالانجليزي :
(EVERGREEN PLACE)
والسموحة منكم ..