khalil125
09-12-2022 - 08:09 am
السلام عليكم ورحمة الله وبركاته
الأخوة الكرام .. اعضاء المنتدى الرائع
محتاج مساعدتكم عشان شهر العسل الخاص بي
ايام ورا ايام بتجول في المنتدى بقرأ كل المواضيع في بوابة مصر
عن شرم الشيخ ودهب وعن الغردقة ومرسى علم والرحلات والتقارير فيها
وكل ما استقر .....
بحس اني بتوه تاني كل ما اقرأ اكتر عن تجاربكم الجميله
في كل هذه الاماكن
ملهاش حل بقا.......الا نصايحكم
فرحي في شهر سبتمبر .......
وقررت اقضيه في داخل مصر ( انا مصري ).......ومحتاج خبرتكم
هو المدة : 15 يوم شامل يوم الوصول ويوم المغادرة (يعني صافي 13 يوم)
التكلفة المقترحه : حتى 7 ألاف جنيه
هكون انا وزوجتي المستقبليه قولوا يارب
(لو في معلومات تانيه مطلوبه ياريت تعرفوني....ساعدوني فالتخطيط)
اقضيه فين...؟؟؟؟
يعني شرم بس.....ولا شرم ودهب ...... ولا شرم والغردقة
ولا الغردقة ومرسى علم
ولا شرم ودهب ونويبع
هي نفسها في اماكن فيها حركة وانشطه مش كله هدوء واستجمام
ياريت ........تساعدوني
نصائح اللي قضوا شهر العسل ........ اي الحلو واي الوحش
شكرا ليكم وفانتظار اهتمامكم
اخوكم احمد خليل
أول شئ 7000 جنيه ميزانية 15 يوم قليلة جداً لو اقامتك في الفنادق + تنقل ومصروف يومي .
كذلك لو ستقيم كل المدة في نفس المدينة ممكن تزهق ولو ستقسم المدة على مدينتين لا بد تعمل حسابك على ميزانية التنقل وسترتفع التكلفة .
أرخص فندق في شرم ويكون المستوى معقول لشهر عسل سيكلفك 400 جنيه الليلة شامل 3 وجبات نظام all inclusive
وهذا النظام انصحك به لأن الأكل في المطاعم سيكلفك خاصة وأنك ستحتاج للتنقل لهم بالتاكسي والتكسي غاليه في شرم والمطاعم كذلك اسعارها سياحية
في الغردقة أقل فندق 250 جنيه بالفطار فقط والمطاعم الرخيصة في وسط البلد وتحتاج ركوب عشان تروحها .
لذا من رأيي تتصل بمكتب سياحة وتاخذ عن طريقهم رحلة كروز الأقصر وأسوان بالباخرة النيلية 4 ليالي 5 أيام ( 1200 جنيه للفرد ) رحلة جميلة كبداية لشهر العسل رومانسية وترفيهية في آن واحد .
ثم تضيف لها 5 ليالي في الإسكندرية مع إنتهاء الإجازة الصيفية ممكن يحصلوا لك على عروض منخفضة فيها . أو تأجر شقة مفروشة على الشاطئ في حدود 250 جنيه الليلة وتفسحوا براحتكم والأكل يكون بره وفيه مطاعم حلوة وأسعارها معقولة هناك هبقى أدلك عليها في الوقت المناسب . وإسكندرية يتوفر فيها كل مقومات السياحة والفسح كثيرة ولجميع الميزانيات .
الحجز عن طريق المكاتب السياحية أوفر لكم خاصة وأن المصريين يتمتعوا بأسعار مميزة . فلا تتردد عن السؤال في أكثر من مكتب في وسط البلد بالقاهرة وأطلب منهم يعملوا لك جدول وقارن بين العروض وتعالى إستشيرنا وأحنا نعطيك رأينا في الأسعار و الفنادق وباخرة الكروز .
اتمنى أكون ساعدتك ولو بالقليل . ولا تقلق كل مشكلة ولها حل مع التخطيط الجيد ممكن الميزانية تكفيك أو تحتاج تزود مبلغ قليل عليها وتقضي أحلى شهر عسل . مش مهم المكان المهم جو التوافق والألفة بينك وبين العروسة هو اللي هيخلي أي مكان تروحوا له جنة في عيونكم
وفقكم الله وجعلها زيجة مباركة سعيدة