- طبعا رحلتنا كانت جدة _ باريس _ جنيف _جدة
- وتم الوصول في باريس يوم 18 مارس الي 24 مارس
بسم الله وعلئ بركة الله احبتي اخواني واخواتي اعضاء وزوار منتدئ العرب المسافرون ان شاء الله سوف نكمل رحلتنا اللتي بدأناها في البوابة الفرنسية علئ هذا الرابط
https://artravelers.com/p/re/898850 طبعا رحلتنا كانت جدة _ باريس _ جنيف _جدة
وتم الوصول في باريس يوم 18 مارس الي 24 مارس
طبعا زي ما قلنا لكم اخر حاجة انه سوينا تشيك اوت من الهوتيل حق باريس وتوجهنا علئ محطة القطار وقصينا التذاكر عن طريق الموقع في نفس يوم السفر ب 370 يورو 2 كبار 2 صغار درجة سياحية طبعا مشي القطار الساعة 12 و10 دقايق بعد 3 ساعات ونص وصلنا جنيف طبعا ركبنا قطار ثاني رحنا علئ المطار حق جنيف عشان كنت ابغئ استاجر سيارة وكنت مرسول لواحد في افيس اللي في المطار المهم وصلنا المطار ورحنا عند تاجير السيارات ,,,,
كانت عندي مشكلة في الفيزا كارت حقي قبل ما نسافر فرنسا بيومين قلت ياولد جرب الفيزا حقك مع اني اعرف انها تمام وكانت من النوع اللي مسبوق الدفع يعني الفلوس اللي فيها حقي مو حق البنك فا يوم جيت ابغئ اشتري فيها من محل في جدة جاء اللي في المحل قال كم الرقم السري قولت والله مدري انا اخبرها من دون رقم ,, قال لازم رقم سري مع اني يوم كنت احجز بها في بوكينق ما كان يطلب رقم سري المهم رحت ثاني يوم البنك قال خلاص نسوي لك طلب ويجيك الرقم السري بعد اسبوع عن طريق الفيدكس قولت انا مسافر بكره قال مافي غير هذا ,,
المهم قمت اخذت بطاقة اخوي واخذت الرقم السري حقة ووصلت عند صاحبنا حق تاجير السيارات وما حصلتة وسألت علية قالوا مشي انتهئ دوامة الساعة 3 العصر وحنا كنا تقريبا الساعة 4 ونص المهم قولت ابغئ سيارة قالت اعطيني الرخصة وبطاقة الفيزا اعطيتها الرخصة حقي وبطاقت اخوي وما تكلمت ,,, شوية قالت انته خالد قولت لا انا اخوه
قالت خالد فين قولت في جدة ارض الزين
قالت طيب ياحبيبي ماينفع لازم يكون موجود قولت انا اخوه واعرف الرقم السري حق البطاقة ,, قالت انا اصلن ما ابغئ الرقم السري بس لازم يكون موجود ,,
قولت يعني انتي ماتبغين الرقم السري ,,, قالت ايوه ,,, قمت عطيتها البطاقة حقي واخذتها وقالت خلاص كيذا امورك تمام التمام وهذا مفتاح السيارة توكل علئ الله ...
وركبنا الباص ورحنا عن مواقف السيارات وشغلنا القارمن وتوكلنا علئ الله حطينا احداثيات منطقة مونتروا وكانت وجهتنا علئ فندق ايدن هوتيل مقابل البحيرة اخذنا غرفة كبيرة حق 4 اشخاص مع الافطار مده 6 ايام ب 6500 ريال
تقريبا المسافة من المطار الي مونتروا ساعة ونص والسيارة حسبوها علينا اليوم ب 100 فرنك مع التامين الشامل وكل شي ,, ذحين ننزل لكم صور الطريق من المطار الي مونتروا
