بسم الله الرحمن الرحيم
السلام عليكم ورحمة الله وبركاته
كيف حالكم اخواني واخواتي الأعضاء والزوار ..؟ ان شاء الله كلكم طيبين و ب أتم الصحة والعافية 3>حبيت أطرح لكم تجربتي مع الشركة اللي أشتغل فيها والغرفة التجارية .. من ناحية استخراج الفيزا ..
وأخص بالذكر : فيزا الشنقن عن طريق السفارة الفرنسية ..
لأن كان من ضمن شروطهم .. إحضار تعريف بالراتب والوظيفة من جهة العمل .. وشرط أن يكون مختوم من الغرفة التجارية ..
وما أدري إذا أي سفارة ثانية تطلب هالطلب ..
و لأني والله تمرمرت مرمره مايعلم فيها إلّا الله .. من كثر الرّوحه والجيّه .. ف ماودّي أحد ياكل الفيلم اللي أنا أكلته ..
المهم نجي للسالفه .. وسامحوني على الإطالة ..
رحت أخذت التعريف بالراتب من الشركة .. ومكتوب فيه إن انا موظف عند الشركة من تاريخ كذا و فيه الراتب والمسمى الوظيفي .. يعني مثل ما طلبوا بالضبط ..
طبعاً مع تقدّم التقنية .. أغلب الشركات حطّت نظام جديد :
يتيح لك طباعة التعريف وأنت جالس بمكتبك من غير ما تروح ل شئون الموظفين .. ويطلع لك من الطابعة مختوم وجاهز ..
المهم .. بعد ما طبعته .. أخذته و هو مختوم مثل ختم شئون الموظفين بالضبط .. و رحت للغرفة التجارية ..
أخذت رقم وجلست أنتظر دوري ..
شوي و جا رقمي .. ورحت للموظف .. وأعطيته التعريف وقلت له أبي ختم منكم علشان أبي أودّي التعريف للسفارة الفرنسية ..
جلس يناظر بالتعريف .. بعدين قال : هذا مطبوع عن طريق الطابعة..!!!
قلت له : إيه .. وين المشكلة ..؟
قال : هذا الختم اللي بالطابعة غير مقبول عندنا .. أرجع للشركة .. و جيب لنا تعريف مختوم من شئون الموظفين شخصيّاً ..
و آخذ تعريفي المسكين وأرجع للشركة اللي اشتغل فيها .. وأدخل على شئون الموظفين وأعلمهم السالفة ..
وقلت لهم : سووا لي واحد جديد وأختموه أنتم بيدكم .. أو أختموا لي على هذا وخلوني أمشي ..
قال واحد من الموظفين : هذا تعريف مطبوع من نظام الشركة والختم اللي عليه معتمد .. و كل البنوك مُعتمدته والقطاعات الحكومية ..
قلت له : طيب هذاك ردّني ..؟.. إذا رجعت له وقلت له كلامك هذا وردّني مره ثانيه .. وش اسوي ..؟
قال : أدخل على مديرهم وان شاء الله راح يمشي أمورك ..
و أرجع للغرفة التجارية و أقول للموظف نفس كلام خوينا اللي بالشركة ..
قال : انا قايل لك من قبل لا تجيني إلا بختم من الموظف نفسه ..!
قلت له : طيب دام السالفة كذا .. أنا أبي أقابل المدير ..
قال : أدخل عليه وماراح يقول لك غير الكلام اللي علمتك ..
وصدق الرجال .. دخلت على المدير وعلمته السالفة ..
وقال : كثير موظفين شركات يجونّا بنفس التعريف اللي معك ونردّهم ..
حنا مانقبل تعريف مطبوع ومختوم من الطابعة إلّا من شركة وحدة بالمملكة .. وهي شركة أرامكو ..
قلت له : طيب و سابك ..؟ ..
قال : حتى سابك ما نقبلها ..
حنّا نقبل من أرامكو الطريقة هذي بس لأنهم الشركة الوحيدة اللي تواصلوا معنا وأعتمدنا ختمهم هذا ..
وسحبت تعريفي اللي تشحّط بالشموس قصدي اللي تشحطّت أنا بالشموس .. ورجعت للشركة ..
وعلّمت شئون الموظفين بالسالفة مره ثانيه .. وانهبل الموظف يقول مستحيل ومدري ايش ..
قلت ..: أقول أختم لي وخلصني والله ماني ناقص عوار راس زيادة ..
قال : هذا الختم ماتقدر تاخذه إلى عن طريق العلاقات الحكومية بالشركة ..!!
و أدربي راسي وأروح عند العلاقات الحكومية وأعلمهم السالفة وقلت يرحم والديكم أختموا لي هالختم اللي مرمرني رايح جاي وخلوني أخلص ..
جا موظف منهم وختم لي على التعريف حقي اللي مطبوع ومختوم من الطابعة و وقّع وكتب أسمه ..
أخذت التعريف وانا مستانس بعد هالتعب كلّه وقلت ان شاء الله انها بتعدّي على خير .. بس باقي يختم لي موظف الغرفة التجارية وخلاص ..
المهم .. وصلت الغرفة التجارية .. وأخذت رقم وأنتظرت .. جا دوري ورحت للموظف ..
وشاف التعريف وقال : كذا أوكي .. قلت : الحمدلله ..
شوي و هو يطقطق بالكمبيوتر حقّه ..
إلّا يقول ..: معليش أخوي عبدالعزيز .. الموظف اللي خاتم و موقّع لك .. توقيعه غير معتمد عندنا ..!!
قلت ..: وشلون يعني بعد هالتعب كلّه وتقولّي توقيعه غير معتمد..!!!! .. شوف حل يمين ولا يسار الله يرضى عليك ..
قال : مافي حل غير إنك ترجع شركتك وتجيب لنا توقيع موظف يكون توقيعه معتمد عندنا ..
قلت : ياليل ما أطولك :""(
تو جيت بطلع من الغرفة التجارية .. و جات على بالي فكرة .. ورجعت للموظف ..
قلت له : ممكن تعطيني أسماء الموظفين اللي في شركتي .. اللي توقيعهم معتمد عندكم ..
لأن مابي أرجع مره ثانيه ولّا ترا بلاها سفره :&