لاس فيجاس المسافرون العرب

أكتشف العالم بين يديك المسافرون العرب أكبر موقع سياحي في الخليج و الوطن العربي ، يحتوى على أكبر محتوى سياحي 350 ألف استفسار و نصائح عن السفر و السياحة, 50 ألف تقرير سياحي للمسافرون العرب حول العالم و أكثر من 50 ألف من الاماكن السياحية و انشطة وفعاليات سياحية ومراكز تسوق وفنادق، المسافرون العرب هو دليل المسافر العربي قبل السفر و اثناء الرحلة. artravelers.com ..
أصيل العود
17-11-2022 - 03:31 am
سلام عليكم
طلب الله يسلمكم ويتلخص في الاتي
عدد الاشخاص
2 شباب
الخبرة
اول مره نزور امريكا
الميزانية
لكل واحد غير تذكرة السفر 1000 دينار كويتي
المدة: 20 يوم الاجمالي
الفعلي 18يوم
تاريخ السفر
  1. 2014

المطلوب :
نبي جدول حلو يوضح فيه عدد الولايات اللي نقدر نغطيه بشكل مريح ويكون فيه كل شي يهمنا كشباب من تمشي وتسوق وبحر وترفيه واشدد على ترفيهي نبي مدن العاب حلوه وقويه والعاب خطره العمر واحد
ايضا نبي نصيحتكم عن شركة استئجار سياره لتنقلاتنا مع الاحداثيات لاننا بنشتري من الكويت جارمن وفيه خريطة امريكا
صاحبي يبي من ضمن الجدول مدينة لاس فيغاس
وسؤال اخير ويهمني انا شخصيا شلون الامان في امريكا
ويهمني ايضا شلون الاجواء في شهر ميلادي 5 في امريكا


التعليقات (9)
aziz20012001
aziz20012001
حياك الله اخويالميزانية للشخصين 2000 دينار يعني 7000 دولار ،،، تقسيم 18 يوم يعني كل يوم 388 دولار ------------------
8دولار يوميا ماتكفي لشخصين للسكن وإيجار سياره وبانزين وأكل وشرب وتذاكر ملاهي وغيرها
اتوقع تحتاجون 1500 دينار كل واحد
هل اعمارك فوق 25 عشان ايجار السياره ؟

أصيل العود
أصيل العود
aziz20012001
هلا اخوي عزيز ومشكور على سرعة الرد والله احنا الله يسلمك فوق 25 ان شاء الله
الميزانية راح نرفعها الى 1500 لكل واحد مافي مشكله حسب ما اقترحت
الشغله الثانيه نبيك تضبطنا اخوي عزيز في جدول رائع تدري ^_^

aziz20012001
aziz20012001
18 يوم وصاحبك يبي فيقاس
ممكن نيويورك ليلتين وبعدين طيران 5 ساعات لفيقاس 4 ليالي ومنها طيران 5 ساعات لميامي 3 ليالي ومنها بالسياره 4 ساعات لاورلاندو 7 ليالي ومنها طيران لنيويورك ليله
او
لوس انجلس( جنوب ) 4 ليالي ومنها بالسياره ساعتين لسان دييغو ليلتين ومنها بالسياره 5 ساعات للاس فيقاس 5 ليالي ومنها بالسياره الي لوس انجلس ( شمال ) 7 ليالي

أصيل العود
أصيل العود
اخوي عزيز
عملت شوية بحث شرايك بهذي
نيويورك New York
لوس انجلوس Los Angeles
سان فرانسسكو San Francisco
لاس فيغاس Les Vegas
كافي اعتقد
انا راح هناك ابي اروح لجميع الاماكن الترفيهيه والالعاب الخطره زي الافعوانايات لاني سمعت امريكا فيها مدن العاب قويه حيل
هل اجد هذي الامور في الولايات اللي انا حطيتها
اما خطتنا كالتالي
شوف طال عمرك احنا نفكر نحجز تذكره ذهاب لشخصين الى نيويورك ونقعد فيها 4 ايام ومن ثم الى لوس انجلوس5 ايام ونحجز سياره حق لوس انجلوس وفرانسسكو5ايام وفيغاس 4ايام
شرايك بتقسيم الوقت
عاد هني مربط الفرس شرايك باللي حطيتهم هالولايات وهل في دايركت من لوانجلوس الى الكويت ولا لازم نرجع لنيويورك ونحجز هناك

أصيل العود
أصيل العود
aziz20012001
اي صاحبي يبي فيغاس وانا ابي فيغاس بعد

aziz20012001
aziz20012001
اورلاندو المدينة الاولي بالعالم بمدن الملاهي ، وبشهر 4 و 5 جوها جدا حلو ويمها 4 ساعات بالسياره ميامي و ميامي حلوه للشباب ، بحر وتمشي
سان فرانسيسكو بعيده و للشباب موذاك الزود
نيويورك حلوه لاكن السكن فيها غالي ( صعب تحصلون فندق اقل من 100 دينار بالليلة )
فيقاس حيل تصلح للشباب
لوس انجلس تحتاج علي الاقل اسبوع
المدن اللي انصحكم فيها نيويورك ، ميامي ، اورلاندو ، لاس فيقاس ، لوس انجلس
المشكلة انهم بعاد عن بعض ، وعندكم بس 18 يوم فلازم تختارون 4 مدن بالكثير ولازم طيران داخلي
نصيحه
نيويورك ليلتين وبعدين طيران 5 ساعات لفيقاس 4 ليالي ومنها طيران 5 ساعات لميامي 3 ليالي ومنها بالسياره 4 ساعات لاورلاندو 7 ليالي ومنها طيران لنيويورك ليله
يعني هذي الأربع مدن ، خلني اشوف طيران دولي اذا ممكن ترجعون الكويت من مدينه اخري مو نيويورك

أصيل العود
أصيل العود
aziz20012001
طيب بارك الله فيك اخوي
الحين اللي باللون الاحمر في ردك انت الغيت لوس انجلوس هل يعني ماتصلح للشباب ولا نقدر ندخل بالجدول
وشي ثاني سمعت ان ميامي خطره ولا عادي يعني
وهل المدن اللي رشحتها امنه يعني لو طولنا السهر عادي

aziz20012001
aziz20012001
لوس انجلس حلوه لاكن ماعندكم وقت كافى . اذا بس 18 يوم فبالكثير 4 مدن
اذا حابين فممكن تلغون نيويورك وتروحون بدالها لوس انجلس
اذا حصلت سعر مناسب للتذكره فافضل شى انكم تطيرون من الكويت الى نيويورك ومنها طيران لاورلاندو ومنها بالسيارة لميامى ومنها طيران للاس فيقاس ومنها للكويت
بالنسبه للامان ... امان للسهر الى الساعه 3 بالليل... بعدها مو امان
اضحك معاك.... ميامى وباقى المدن امان لاتحاتى ...احس ان ميامى يمكن تكون الاكثر وناسه لشباب معاهم سيارة ..حلوة وبحر وتمشى
https://www.youtube.com/watch?v=vC2549MMo-w
شوف الفيديوات عن ميامى
https://www.youtube.com/watch?v=E1wDrjlWKHw

أصيل العود
أصيل العود
aziz20012001
بارك الله فيك تعبناك معنا
طيب شوف طال عمرك شرايك كذا
كويت - لوس انجلس- لاس فيغاس - اورلاندو- ميامي- كويت
كم تعتقد لكل ولاية نخصصلها يوم


خصم يصل إلى 25%