ماليزيا المسافرون العرب

أكتشف العالم بين يديك المسافرون العرب أكبر موقع سياحي في الخليج و الوطن العربي ، يحتوى على أكبر محتوى سياحي 350 ألف استفسار و نصائح عن السفر و السياحة, 50 ألف تقرير سياحي للمسافرون العرب حول العالم و أكثر من 50 ألف من الاماكن السياحية و انشطة وفعاليات سياحية ومراكز تسوق وفنادق، المسافرون العرب هو دليل المسافر العربي قبل السفر و اثناء الرحلة. artravelers.com ..
عذبة الملامح
03-12-2022 - 11:09 pm
  1. عدد المسافرين 6 افراد 3 كبار و3 أطفال

  2. الراعي الرسمي لهذه الرحلة والقائد ( عذبة الملامح )

  3. بسم الله ابدأ التقرير


السلام عليكم ورحمة الله وبركاته
اول مره اكتب تقرير مفصل وإن شاء الله ينول إعجابكم هدفي هو الإستفادة وسأتجاوز أي نقاط او اماكن تم ذكرها في تقارير آخرى واحب اوضح لاخواني واخواتي اعضاء المنتدى ان ما اكتبه هنا يعبر عن وجهة نظري الشخصية
في البداية اتوجه بالشكر الى شموخ عتيبية وكريستالة ووافي بزمن جافي وعاشق بينانج والكثير الكثير من رواد هذا المنتدى ومشرفيه وتقريري هذا كرد جميل للمنتدى
سبق لي السفر عام 2001 وكانت ماليزيا اقرب للخيال منها للواقع كنت اشعر انني في دولة بعيدة عنا جداً مثل اليابان او الفلبين ولكن مع مرور الزمن وكثرت السائحين عرفت أن ماليزيا قد تنضم في يوم من الأيام لمجلس التعاون وبصراحة كنت مترددة لسفر اليها هذا العام لأنني سمعت ان تعاملهم تغير وانا بطبعي لا أحب الجدال والمراوغة ولكن لم يكن في بالي خيار افضل لذلك قلت لامانع من التجربة لكي اقارن بين 2001 و2013
السفر بتاريخ 1 أكتوبر والعودة 16 أكتوبر من تاريخ 14 الى 16 تم التوقف في كولمبو
الخطوط الناقلة السيريلانكية ( الرياض – كولمبو – كوالالمبور – كولمبو -الرياض )

عدد المسافرين 6 افراد 3 كبار و3 أطفال

قيمة التذكرة للكبار بدون إقامة في سيريلانكا 2300 ريال ومع الاقامة لمدة يومين في سيريلانكا 2700 ريال
والأطفال 2100 بدون اقامة في سيريلانكا و2300 بإقامة والغريب في الأمر أنه بعد حجز التذاكر بأسبوع بلغني موظف الحجز في المكتب أن سعر التذكرة إنخفض يعني لو آخرت حجزي كان رح ينزل في كل تذكرة ثلاثمائة ريال فالتذاكر صايرة مثل الأسهم يوم طالعه ويوم نازلة
الحجز تم عن طريق مكتب ×××××××××وكان قمة في الأخلاق ضبط مواعيد الحجز في اوقات دخول وخروج ممتازة وقص لنا البوردينق قبل السفر ب24 ساعة وتأثر عندما نزلت أسعار التذاكر وبلغني بذلك وحاول يسترد التذاكر ويشتريها مره آخرى ولكنه وجد أن الغرامة على إلغاء التذكرة ستكون موازية بعد ذلك للشراء
اما الفنادق فكانت من الأستاذ محمد سويلم ايضاً قمة في الأخلاق ولي معرفة سابقة به فجميع سفرياتي من هذا المكتب وللعلم اقارن بين أسعارهم وأسعار بوكينج وأجد انهما واحد بل في فندق كولمبو وجدت أن المكتب أرخص .
خط سير الرحلة (سلانجور يومين – بينانج 5 ايام – كوالالمبور5 ايام – كولمبو يومين )
الفنادق ( صن واي لاقون – شانقريلا جولدن ساندز – تريدرز – الريتزكالريتون – جراند حياة – سينامون جراند )
وسأوضح السبب في الانتقال الكثير بين فنادق كوالالمبور

الراعي الرسمي لهذه الرحلة والقائد ( عذبة الملامح )

بسم الله ابدأ التقرير

الرحلة الساعة 4 العصر بتوقيت الرياض تم الوصول الى مطار الملك خالد الساعة 2 وذلك لأن المكتب ضبط البوردينق على رحلة كولمبو والبوردينق كذلك من كولمبو الى كوالالمبور وصلنا كولمبو 9.30 بتوقيت الرياض مدة الرحلة خمس ساعات ونص وكان الترانزيت ساعة وهذا أكبر خطأ انصح الجميع بأخذ ترانزيت ساعتين لأن فيه احتمال لو تأخرت الرحلة الأولى سيلحقها تأخير لرحلة الترانزيت خرجنا من الطائرة على اساس نرتاح قليلاً ولكن تفاجأنا بمجرد خروجنا من الطائرة بأنهم يعلنون النداء الأخير على رحلة كوالالمبور والحمدلله لحقنا على الطيارة ولا أعلم هل طيارتنا الأولى هي التي تأخرت ام أن الثانية تقدمت المهم ركبنا الطائرة والتعب متملكنا ووصلنا كوالالمبور الساعة 8 الصباح بتوقيت كوالا.
خرجنا من الطائرة ولانعرف طريق تختيم الجوازات كنت اذكر اننا نركب الترام لكن لا أعرف اين مكانه فرأيت اجنبي كان معنا في الطائرة يسير بثقة فقلت لنذهب خلفه فالأجانب أكثر معرفة ودراية ( حصل موقف مضحك اثناء سيرنا خلفه )
من سافر لكوالا يعرف المسافة الطويلة من خروجة من الطائرة الى ان ينهي الاجراءات المهم نحن نسير خلف الاجنبي فأخطأ الطريق ثم عاد ونحن خلفه فأدركت أنه في هذه اللحضة عرف اننا نتبعه فركبنا الترام خلفه ووصلنا للتختيم ووقفنا في نفس مسارة >>> نشبة حنا
بعد ماختم التفت علي وقال ( مامعي شناتي لاتلحئوني خلاص انا رح اطلع من المطار بعد ماتختموا روحوا هونيك و استلموا شناتيكن ) انا دخن وجهي كنت احسبه خواجة طلع لبناني حتى كلامه لاتلحئوني حسيت اننا غثيثين ههه
طبعاً مسكت ضحكتي الين راح وشكرته وبعد ماراح التفت على خواتي الاميتين ضحك ويقولون تروعنا لما تكلم عربي عموماً الله يجزاه خير على التوجيه ماقصر .
بعدها استلمنا الشنط وطلعنا على كاونتر التاكسي ونشوف التسعيرات قلنا لها صن واي لاقون قالت 164 رينجت قلنا ليه قالت انتوا 6 وورتنا الجدول قلن الجدول هذا ل8 اشخاص وحنا معنا طفلتين صغار مره خلينا نطلع في التاكسي لاربع اشخاص قالت لا ضيق عليكم قلنا حنا نتحمل المهم ان نفسها خايسه لأبعد حد وتكلمنا من طرف خشمها وتقول لاتجادلون ومره مكشره لدرجة اني قلت الله يستر لايكونون الماليزيين تغيروا وكلهم على شاكلتها قالت اختي طنشيها وبناخذ تاكسي من برا شافنا ماليزي وحنا تاركين كاونتر التاكسي ومتوجهين للبوابة قالنا خذوا من الكاونتر مايصلح تاخذون من برا المطار كل اللي برا المطار ( علي بابا ) يعني حرامية طبعاً فهمنا من كلامه انه يخوفنا طنشناه وطلعنا اسقبلنا صيني قالنا اوديكم ب 250 رينجت طارت عيونا وكنا مره تعبانين ومرهقين قلت لأختي خلاص برجع للكاونتر داخل المطار وباخذ السيارة الكبيرة وامرنا لله المهم رجعت ومارحت جهة المكشرة لما رحت لثانية طلعت فلوسي وعلى طول قلت عطيني سيارة لفندق كذا الا اشوف المكشرة جلست تكلمها فترة طويلة يعني خلوني واقفة كثير وعرفت انه مماطلة منهم لاني ماوافقت من الاول طبعًا انقهرت وسكت ( ياغريب خلك أديب ) قصت لي الفاتورة وقالت بوابة ثلاثة صارت بوابة ثلاثة بعيدة عنا رحنا لها لما طلعنا بوابة ثلاثة قالنا مسئول التاكسي لا انتوا بوابة 7 اثاري بوابة سبعة كانت قريبة مننا مره وما احط بذمتي شكله انتقام منها ومن صديقتها جاني احباط وقلت خلاص ماليزيا تغيرت وخربت وماعادت مثل اول يعني هذا موقف سخيف اللي سوته لكن ما أقول الاحسبي الله ونعم الوكيل اذا كانت متقصدة تمرمطنا
وللعلم التكت او الفاتورة مكتوب عليه رقم البوابة لكن غلطتي اني سألتها وصدقتها وانصح اي مسافر لماليزيا ياخذ سيارة من الكاونتر مباشرة ومايجادل
المهم دخلنا تقريباً الفندق الساعة 10 الصباح وكنا خايفين مايدخلونا لأن الوقت بدري لكن الحمدلله استقبالهم كان مره حلو قالوا انتظروا نص ساعه في لاونج اللوبي الين نجهز الغرف وكانت غرفتين كونكت
واحضروا لنا ضيافة عصير برتقال .
كان مطل الغرف جميل على الألعاب المائية والفندق حلو جداً جداً جداً مره عجبني وماكان عندهم ضغط لأننا سافرنا قبل اجازة الحج بأسبوع .
دخلنا الغرف ويجينا موظفين نزلوا الشنط وواحد منهم جلس يقول كل اللي بالغرفة هدية مننا لكم القهوة هدية والشاهي هدية
والموية هدية وانا ماسكة نفسي على الاخر طبعاً عارفه انه يبي فلوس لكن هالاشكال والله لويموت ما اعطيه وانا مطنشة ويروح يدخل غرفة اختي ونفس الكلام ردده قالت شكرا تعبانين بنام ومارح نستخدم شيء انا ودي اني قايلة له ايش للي هدية انا مستأجرة الفندق ودافع فلوس وكل الفنادق تحط قهوة وشاي وموية من ضمن الغرف لكن ارجع واقول ( ياغريب خلك أديب ) واصلا تملكنا التعب ونمنا الى الساعة 4 العصر وكان مخططي لهذا اليوم قضائه في حديقة الماينز وسوق الماينز
استيقضنا في الوقت المحدد وخرجنا من الفندق الساعة 5 العصر وبحثنا عن تاكسي بالساعه المهم وجدت مبالغة في الاسعار مع العلم بأننا نبحث عن التاكسي الحمراء وهي الأرخص .
الذي لم يعجبني في الموضوع حين استوقف تاكسي واتناقش معه واذا لم يعجبني السعر اجد انه يزعل ويقول مقدم لك افضل سعر ع العلم انني حين لايعجبني السعر اشكره واقوله خلاص ببحث عن تاكسي ثاني وواحد ثاني جلس يضحك ويقول بوقف جنبكم عارف بتروحون معي مارح تلقون واحد بالسعر اللي عطيتكم لا اخفيكم هذاك اليوم كرهت نفسي وقلت ايش اللي جابني ماليزيا والكل يقولي ماليزيا تغيرت وصارت مثل بعض الدول العربية ياكلونك بلسانهم المهم وجدنا سائق طيب قال بوديكم ومارح انتظركم الانتظار انتوا بتضررون منه ليه تحاسبوني وانا ما اشتغلت فعجبني كلامه المهم شددت عليه يرجع علينا وشرطت عليه اعطيه ثلث المبلغ فقط وفي حال عودته يأخذ باقي المبلغ ووافق الذاهاب كان ب 40 رينجت والعودة ب 50 رينجت على اساس اننا بنتأخر ومارح نلقى تكاسي .
المهم لما رحنا نسأل عن الحديقة قالوا الحديقة قفلت من سنه هنا احنا انصدمنا صدمة فظيعه لان هدفنا هو الحديقة وليس السوق قالوا ماعندكم الا جولة في البحيرة والتسوق في مول الماينز
طبعاً السواق را ح وانقهرنا ان السوق مايسوى ابد قلنا خلاص بنتأقلم مع الوضع وبنتغدا لأننا كنا مره جوعانين وبناخذ جولة بالقارب
تغدينا في ماكدونالدز وبصراحة عجبني احسه لذيذ اكثر من ماكدونالدز الرياض وبعد الغداء بدأ وقت جولتنا في القارب طبعاً فيه سعرين للجولة جولة قصيرة نسيت سعرها لكن ماتستفيدون منها وجولة طويلة تمر على معالم مثل منتجع الخيول الذهبي وقصر ازرق اخذنا الطويلة اعتقد ان الكبار ب 28 رينجت والاطفال 18 والصغيرة اللي عمرها سنتين مجاناً الجولة كانت جميلة وخاصة ان وقتها قبل الغروب وكان معنا عائلة ماليزية لطيفة وعرسان من السعودية تقريباً مدة الجولة40 دقيقة
لما نزلنا اتصلنا على السواق وقلنا له تعال مالقينا الحديقة وقال اصلا انا مستغرب وانتوا تقولون حديقة وانا قلت لكم ما اعرف الا السوق
درنا في السوق وصرفنا فلوس من الصرافة وماشرينا شيء السوق لايستحق الزيارة ولا حتى الجولة بالقارب تستحق الزيارة يعني كنسلوا هذا الجزء من البرنامج من رحلتكم القادمة .
وصل السواق عندنا 7.30 وقلنا لها نزلنا عند سوق البيرمد اللي جنب فندقنا وبصراحة كان سوق رائع جداً وفيه مطاعم رهيبه دخلنا دونات جي كو اللي قرأت عنها في المنتدى انها ألذ دونات وطلبنا وكثرنا >>> طبع السعوديين
سيء وطلبنا كذلك كراميل ماكياتو وكابتشينو وقهوة جي كو الخاصة وكنا نسأل الموظفة من أول مادخلنا ايش أفضل نكهة دونات وترد وهي مكشرة وتقول كلهم للأسف اول مادخلنا كنا نبتسم واقولها بمراره للأسف يقولون ماليزيا بلد الابتسامة والله طول هذاك اليوم مالقيت الانكد وتكشير وحنا اللي نبتسم الله يجعله أجر لنا المهم رجعنا نسألها عن مكونات القهوة الخاصة وتقول ما أدري لو علي طلعت من المحل لكن اخواتي مايحبون كذا يحبون تكمل الموضوع وتستمتع باللحضة بس انا ما اشوف فيه أي متعه وحده تقابلني بتكشيرة وهي المستفيدة مني دفعنا اكثر من 80 رينقت على دونات وتكشر السالفة لم تنتهي الى هذا الحد طلبت بنتي ايس موكا واشرنا على الصورة اللي هو في علبة شفافة وعليه كريمة الا تحط لنا في كوب تبع القهوة الحارة تفاهمت معها بهدوء قلت لها ماعمر الايس موكا ينحط بهالكأس ووين الكريمة قالت ماقالتوا لي واخذتها بكل تكبر وبكل دفاشة كبته من الكأس الورقي في الكأس البلاستيك الشفاف لدرجة انه انكب منه قلت طيب والكريمة قالت هذا بدون انا ولعت وارتفع ضغطي وكرهت اليوم اللي جيت فيه وجلست اتذكر لندن وتعاملهم الراقي وندمت جداً جداً اني جيت طبعا ماقلت لها ولاكلمة ومازلت متمسكة بمبدأ ( ياغريب خلك أديب ) وتركته عندها ولاهمها كأننا ذابحين احد من اهلها طبعاً انا من الغيض ماتقهويت وانتظرت خواتي يخلصون وهم اصلاً تنكدوا لكن ساكتين وطلعنا من المحل وانا اغلي غلي . واحلف مية يمين اني ماعد ارجع لهذا البلد ( بلاد التكشيرة )
لفينا بالسوق شوي وبعدها رجعنا للفندق طبعاً مشي ونمنا وبهذا انتهى اليوم الأول اللي كله تكشيرات ونفس خايسة .
اليوم الثاني
قررت أنا واخواتي اننا مانطلع من الفندق قالوا مانبي جولة بترجايا يمكن تطلع سيئة مثل حديقة الماينز ونتنكد ويضيع وقتنا ويعصبونا التكاسي والفندق جميل ورائع خلنا نقضي اليوم فيه
بصراحة انبسطت بهذا القرار لأني كنت بحاجة ريلاكس تعبت من الاستفزازات اللي شفتها في اليوم الأول
نزلنا الساعة 8 الصباح وأفطرنا وكان الفطور رائع جداً ولذيذ وخدمتهم ممتازة بعدها رحنا المسبح تقريباً الساعة 11 فرحوا الصغار بالمسبح بس مشكلة مويتهم بارة بزيادة لأن فيها شلال يصب من فوق فكانت الموية صاقعة خاصة اننا بشهر اكتوبر لو كان بشهر يوليو او اغسطس كان معقول
المهم انبسطنا على البسين وتعرفنا على عائلة سعودية وعلى كويتية والكويتين بصراحة رائعين جداً جداً انا من اول احب اهل الكويت وفي هذي الرحلة حبيتهم زود اجتماعيين اكثر من السعوديين او بالأصح ماعندهم مشكلة انهم يتعرفون عليك اما السعوديين يضعون حواجز ومن الصعب الدخول معهم اما الكويتيات بمجرد ما اقول لهم مرحبا كيف حالكم الا يرحبون ويسهلون ويسألون كم لك من يوم هنا ؟ وتبدأ السوالف
طبعاً انا اعبر عن وجهة نظري ولاتنسون اني سعودية وما اقول كل السعوديين مو اجتماعيين او عندهم فوبيا التعارف والدليل اني تعرفت على عائلة سعودية من جدة ( جدة غير ) وسبحان الله وانا اكتب التقرير اتصلت تطمن علينا اذا وصلنا او لا لأن طيارتها قبلنا بثلاثة ايام وهي دكتورة فاضلة من جامعة عبدالعزيز المهم كان اليوم الثاني ممتع وهاديء ومريح للأعصاب طلعنا من المسبح الساعة 2 الظهر وغيرنا ورحنا تمشينا بالفندق ودخلنا جهة الفلل كانت رائعة وصورنا عندها كأنك في عالم آخر انصح كل من راح فندق صن واي لاقون روحوا من عند الفلل اللي ورا الشلال وبتلاقون عالم آخر جميل كأنك في تايلاند بعدها طلعنا للحديقة المائية وانصح الذي لايحب اللعب انه مايدخلها للأسف احنا مانحب نلعب وبناتي همهم المسبح فجالسين ينقون علي خلينا نرجع مسبح الفندق واحنا طالعين من الحديقة مطرت الساعة 5 العصر ودخلنا مكتب ايرولاين لحجز تذاكر للعودة من بينانج الى كوالالمبور وحجزنا موعد يوم الاربعاء 9 اكتوبر وكنا نبي المقاعد الاولى لان اطلالتها رائعة وللاسف كانت محجوزة انصح كل من يركب الباص ان ياخذ المقاعد الاولى فالاطلالة والمنظر خيال من الامام
اخذنا 6 مقاعد خلف الاولى وعمر سنتين محسوبة له التذكرة أي تدفع حسابها الا اذا كنت بتتنازل عن كرسيه وبتخليه على رجولك والسعر مايفرق الكبير مثل الصغير اعتقد كان السعر 68 رينجت
رجعنا بعدها للمسبح وكان بارد جداً جداً لان الشمس مختفيه بسبب الامطار وحسيت ان الصغار تعبوا بعد هذه السباحة .
الساعة 8 بالليل رحنا لسوق البيرمد وتعشينا في مطعم فيش ماركت مونهاتن كان روعة وتعاملهم حلو اخذنا صحن كبير مشكل مقلي وصحن ثاني فيلية سمك ومكرونة بالجمبري انصح في هذا المطعم لمحبي البحري .
وانتهى يومنا الثاني ولله الحمد


التعليقات (9)
طارق عنايات
طارق عنايات
الحمد لله على سلامتكم
ما شاء الله نشيطة جداً بتنزيل التقرير
بس وين الصور
الصور تزين الموضوع
شكرًا لك متابع معك

طارق عنايات
طارق عنايات
سؤال هل قصدك الحديقة المائية ( صن واي لاغون )

عذبة الملامح
عذبة الملامح
  1. اليوم الثالث


اليوم الثالث

استيقضنا مبكراً الساعة 7 ونزلنا للأفطار الساعة 8 ورتبنا شنطنا وطلعنا المطار الساعة عشرة وهذه كانت غلطة مني لم احسبها مضبوط كان وقت اقلاع الطائرة 1.30 يعني طلعنا بدري مره المفروض نطلع الساعة 11 وقت اكثر منطقية عموماً وصلنا الساعة 10.45 دقيقة للمطار الدولي لان تذاكرنا الى بينانج عن طريق الخطوط الماليزية كنت بحجز عن طريق آير آسيا لكن المكتب قال مانتعامل الا مع طيران ماليزيا قلت يالله مافرقت كثير بالسعر كان سعر الذهاب فقط 190 ريال لكل راكب حتى الأطفال نفس السعر
بعد ماقطعنا البوردينق كانت الساعة 11.10 يعني لسى بدري بدري على الرحلة والصالة الداخلية اقل محلات من الصالات الدولية مر الوقت بطيء لكنه غير سيء وجاني انتقاد من اخواتي اني ما اعرف اخطط للرحلة طبعاً لكاعة وطول الوقت يقولون لو تاركتنا نستمتع بالفندق كان أفضل من جيتنا للمطار على الفاضي مره ثانية بنشيك على وقت الرحلة قبل لاتقودينا لها ومن هالكلام ههه
من سوء الحظ تأخرت الرحلة نصف ساعة اي تم الاقلاع الساعة 2 الظهر وهذا الشيء ماحبيته في الخطوط الماليزية تأخير بدون اعتذار او توضيح السبب
حتى الخطوط توقعتها احلا وارقى من كذا جداً عادية ومافيها شاشات وضيافتهم كانت كيس مكسرات فقط
الطريق من كوالا لبينانج رهيب اللي تحتك شجر وبحر سبحان الخالق ما أعظمة
مدة الرحلة 50 دقيقة بالضبط نزلنا المطار واستلمنا الشنط بسرعة وطلعنا على كاونتر التاكسي طبعاً ماجادلنا ولاناقشنا قالوا فان كبير ب 148 قلنا اوكي وركبنا ورحنا الى فندق شانقريلا جولدن ساندز
الطريق الى الفندق ممتع جداً وتشعر بأنك في الأرياف مختلف كلياً عن طريق كوالا وكان جزء من الطريق تشوف فيه جبال وضباب روعة بمعنى الكلمة
الطريق طويل حدود 45 دقيقة دخلنا الفندق وكان حجزنا على الغرف الاكزكتف المطلة على البحر ببلكونة وللعلم الغرف الأقل من ذلك اعتقد انها الديلوكس بدون بلكونة وبدون رشاش ماء في الحمام اكرمكم الله فأنتبهوا لهذه النقطة
ارى ان من الأفضل وخاصة على البحر ان يكون في الغرفة بلكونة للتهوية ونشر الملابس بعد السباحة التشيك ان كان بطيء عندهم وزحمة مره وقالوا ياتاخذون غرفتين مواجهة للبحر مباشرة ولكنها ليست كونكت او تاخذون كونكت واطلالتها جانبية طبعا انقهرنا وخاصة انه موضح في الفوتشر ان غرفنا مواجهة مباشرة للبحر قالوا راحت اللي كنا حاجزينها لكم تأخرتوا بالدخول طبعاً سكتنا واخذنا الاطلالة الجانبية أن الكونكت جداُ مهم لنا والا سنفقد متعة السفر الجماعي
بعد نص ساعة تقريبا دخلنا الغرف وريحنا شوي ونزلت الصغار للمسبح وقضينا اليوم في استكشاف الفندق والساعة 8 طلعنا نتعشى في ماكدونالدز وللعلم ماكدونالدز مقابل مباشرة للفندق وموقع الفندق جداً ممتاز كنت محتارة بينه وبين بارك رويال لكن الاستاذ محمد سويلم المسئول عن حجز الفنادق نصحني بقولدن ساندز وفي سفري الأول كان حجزي على شانقريلا راساسانق وكنت اشوف قولدن ساندز فتطمنت لهذا الفندق
للأمانة فندق بارك رويال ليس جيد وحتى موقعه ليس جيد زرت الدكتورة وفاء اللي تعرفت عليها في فندق صن واي لاقون وكانت تسكن في بارك رويال المسابح والاطلالة في قولدن افضل من بارك اما اللوبي فبارك افضل من رويال واشرح
اما الغرف قولدن ساندز غرفة حجمها عادي ولكن اثاثها نظيف وبلكونتها افضل اما بارك غرفة اكبر ولكن اثاثه قديم ولكم الاختيار
اما شانقريلا راساسانق فيتميز بالفخامة وبدون مبالغة سكانه اجانب وانا اعشق الاجانب لسبب وهو التحرر من فضول العرب دخلناه في اخر يوم لنا لأجدد ذكريات 2001 حينما سكنت فيه اسوء مافيه وجود الاشجار الكثيفة التي تجعله مقسم لكنه فخم جداً وفيه مسابح كثيرة ومتعددة وانصح بالسكن فيه لمن لايحب الاختلاط مع العرب ذكرني بزيارتي 2001 كان عدد العرب محدود جدا وانا استمتع بقلة العرب وخاصة الخليجيين
اكمل معكم اليوم الثالث بعد العشاء في ماكدونالدز اخذنا لفه على سوق الليل او السوق الصيني وبصراحة تغير 180 درجة عن زيارتي الاولى وتفاجأت بكلام البياعة ( تعالي ياجميلة - ارحبوا - يالله حيوه ) تعجبت من هذه الكلمات وعرفت ان ماليزيا ليست ماليزيا وشعرت بأنني في البطحاء
طبعاً غش وتلاعب في الاسعار اخذنا اشياء بسيطة جداً اقلام ومظلة هذا اللي اتذكره وبعدها رجعنا للفندق وانتهى يومنا بسلام ولله الحمد

عذبة الملامح
عذبة الملامح
اهلا طارق عنايات
واشكرك على الرد السريع كذلك
لو مانزلت تقريري بدري ثق تماما بأنه لن يرى النور أنت عارف الرجع بعد السفر يكون الواحد متعب ومرهق فمتمددة على السرير وقايمة بدري واشرب القهوة العربية لي اسبوعين ماشربتها وجلست اكتب
اما من ناحية الصور فأنا عجازة مره بحاول احارب هذا الكسل وانزلها
ايه الحديقة المائية اقصد فيها المدينة المائية اللي جنب الفندق
واي سؤال انا حاضرة
تحياتي

شموخ عتيبة
شموخ عتيبة
وعليكم السلام ورحمة الله وبركاته ..
الحمد لله على سلامتكم عزيزتي ومشكورة على كلامك الطيب في حق أعضاء المنتدى كلك ذوق يالغالية ..
ويعطيكِ العافية على تقريرك المفصل باختصار وذكر تجربتك بإيجابياتها وسلبياتها ..
وبالنسبة للتكشيرة بصراحة الداء هذا انتشر للأسف في ماليزيا الفترة الأخيرة لكن للأمانة مو الكل
ونقدر نتغلب عليها بشوية حكمة أو تغاضي وأحيانا أجبر اللي أمامي انو يبتسم بأسلوبي في التعامل
إلا إذا كانت الحالة مستعصية ( ف الطناش ) أفضل حل
وفندق جراند حياة فخامة وسحر لا يقاوم ومافيه إلا عيب واحد وهو حركة المصاعد !
وحبيت أذكرك انو قوانين المنتدى تمنع ذكر أسماء مكاتب سياحية أو التطرق لها بأي حال
موفقة عزيزتي ..
أختك .. شموخ

عاشق بينانج
عاشق بينانج
الحمدلله على السلامة اختي وبانتظار تكملة التقرير
وبيني وبينك حاجز على ماليزيا وخفت من كلامك انها تغيرت شكلي اروح لسنغافورا ولا بالي من كوالا

وافي بزمن جافي
وافي بزمن جافي
أهلا وسهلاً أختي الكريمة ...
الحمد لله على السلامة ونجاح الرحلة ...
وأشكرك على ثنائك ووفائك للمنتدى وأعضائه الكرام
وكل التحية على ذكر التجربة والتفاصيل ... وبأذن الله يستفيد منها الجميع
ربي يوفقكم في الدنيا والأخرة ... تحياتي

فيصل
فيصل
وعليكم السلام ورحمه الله وبركاته
شكرا للتقرير
وعادي تعلموا اللهجه ولا تستغربي شيء منهم

عذبة الملامح
عذبة الملامح
شموخ عتيبية ياهلا وسهلا فيك
اللي اعرفه ان قوانين المنتدى تسمح بالنشر اذا كتبنا تقرير كامل لذلك كتبت الاسماء لانهم فعلا يستحقون الاشادة بهم
اما تقريري فأنا اعتبره مفصل جداً>>>>> وحده عجازة ههه
عاشق بينانج هلا ومرحبا
غير لسنغفاورة افضل خاصة انك دائما تروح لماليزيا وبالي كذلك جميلة
التكشيرة أكثر ماوجدتها بسلانجور اما بكوالا تغير الوضع لكن عن نفسي زرت ماليزيا الآن مرتين اعتبرها كفاية مره وما افكر اروح لها
وافي بزمن جافي
بصراحة مره اشكرك جداً جداً كل ما امشي مكان او اركب المونوريل اتذكر توجيهاتك
فيصل
اشكرك على مداخلتك بس هم تعلموا اللهجة واستغلوها استغلال سيء ماليزيا بدأت فيها السياحة بعد سنة 2000 وانهبلوا
لندن من ايام الستينات والعالم تروح لها سياحة ولا فكروا يغيرون تعاملهم او يقتبسون كلماتنا العربية للاستغلال بالعكس يعاملونك عادي جداً
عموماً ماليزيا الى الان ليست سيئة ولكنها في طريقها الى الانحدار
لو يعملوا لها السعوديين مقاطعة خمس سنوات بس كان ترجع مثل الاول وافضل
تقبلوا جميعاً فائق احترامي


خصم يصل إلى 25%