حياك الله
الله يحفظ ويسعد لك الأهل والذرية
ورى ما تضيفها في الجواز ترى ما تأخذ وقت ؟ وريح بالك
والمنفذ ممكن يدخلك إذا كان المسؤل أو موظف الإجراءات ( سمح )

الله يحييك ويعافيك يا سعود ومشكور على إهتمامك
والله الحقيقه اني مشغول جدا ولا عندي وقت للإضافه عاد على مشاكل زحمه الجوازات هاليومين يضيق الواحد ,,
وانا مسافر الأربعاء إن شاءالله و إن ما أفادني أحد المجربين من الإخوه هنا ولا غامرت و توكلت على الله .

في الخدمة يالغالي
إذا كان معك أولاد غير الرضيعة ف بإذن الله أمروك تياسير
وإذا كنت انت والأهل والرضيعة ف الله ييسر لك الموظف السمح
وتروح وترجع بالسلامة يالغالي

الله يسلمك يا أبو سعود ,,,
للعلم والإفاده لمن يمر الموضوع , اللي حصل يا إخوان
أني غامرت ورحت في رحله استجمام نهاية اسبوع بعد إرهاق وتعب العمل والضغوطات , لكن حصل ما لا يحمد عقباه وتم الرفض من قبل الجوازات
وطبعا دخلت في أخذ ورد ورحت للضابط وكلمته شخصيا ومنا ومنا الفزعه لكن لا أمل !!! ,, الوكاد أني تورطت الله المستعان
وبعد التعب والمشاوره والإرهاق رجعت كلي أمل في الله برحله سعيده بصحبه الزوجه وبنتي حفظنا الله وإياكم وقضيت ذاك الليله في الأحساء بعد تعب الرجوع في نوم عميق
والحمدلله حصلت شقه نظيفه ارتحت فيها وحصل ما حصل والحمدلله أولا وأخيرا ورجعنا بالسلامه .
وحجزي بالدوحه راح بلا رجعه لكن العوض على الله والرازق ربي . الله يرزقنا واياكم
وإن شاءالله اني أقدر أعوض المها وأمها برحلة أحلا وأجمل في قادم الأيام.
فالإنتباه يا أخوتي الكرام من الخطأ اللي وقعت به , ودمتم سالمين

الحمد لله على السلامة ومعوض خير
انا قبل كم سنة وصلت البطحا من الرياض ولا انتبهت ان جواز ام العيال منتهي ورجعت للأحساء علشان اجدد الجواز وواجهت تعنت من موظفي الجوازات في الهفوف يقولون لازم دفتر العائلة
وتركت عائلتي في فندق في الأحساء ورجعت للرياض واخذت دفتر العائلة ورجعت للحسا وجددت الجواز وسافرنا والحمد لله
لازم الواحد ينتبه مرة ومرات

بيض الله وجهك على إدراج التنبيه
ولعل في الأمر خيره .. وإن شاء الله تعوضونها بزيارة قادمة
دمت بحفظ الرحمن