- بس قلت تدري اليوم مشتهي جلد شكلي مبطي عنه خ
السلام عليكم ورحمة الله وبركاته
امس الجمعه 17 رمضان كان عندنا مشوار للرياض وقلت خل اشوف مطعم نفطر فيه قلنا ماريز واثرنا نعرفه اكثر من اهله(زين بس نبي غيره ) والبحصلي مجربينه كثير (حلو بعد) وشامي حليو بس زحمه وضيق مكان البوفيه
وادور في النت والا ماش عجزت القى وادور في تويتر والقى مطعم وكوفي اسمه كريولو قلت نجرب او لا اخاف يطلع نكبه ويجلدوني عيالي تفطرنا في كوفي
بس قلت تدري اليوم مشتهي جلد شكلي مبطي عنه خ
المهم وارسلهم في تويتر وانا عارف انهم ماراح يردون ومادريت الا ردوا بسرعه وضبطوا الحجز ويقولون انهم قدام متجر الهلال على التحلية المهم ونتشوف لمتجر الهلال وللمطعم على التحلية وحنا جايين من طريق الملك فهد ونلقى المتجر يمين وهم يسار ونرجع مع اخر اشارة ونشوف حقين المطعم والطباخ برا واقفين قلنا افا شكل الطبخه احترقت ونوقف وندخل وماصورنا برا لان كنا متأخرين شوي ويوم دخلت قالوا انت راعي تويتر حسيت بيقبضون علي
ويودوني للجلسة وكانوا جدا جدا جدا ودودين وخدومين وتحس انك راعي المطعم وانه يوم الرواتب من كثر ما يحوفون بك ويفرحون بك ويتبوسمون لك
كن مافيه الا انت في المطعم
يبدوا لي ان المطعم عائلات بس
وفيه بارتشنات للي يبي واللي مايبي يعلمنا وراه مايبي
هذا جالس يحوق في شي
المكان جدا جدا جدا مرتب ونظيف والعاملين جدا ودودين ماقد شفت في السعودية بدون مبالغة مثلهم في كثر الضحك ويفرحون اذا طلبت منهم شي يركضون لك ركض
نظامهم في القهوه يعطونك كوب قهوه (البني الصغير ) قهوتهم جدا لذيذة بس لو يزودون ترمس لان دورت بدين وصارت مخلصه زايضا يعطونك كوب عصير برتقال طازج
الشوربة يوم نجيهم كانت نوع واحد (خضار ) بس الصدق مميزة ( ترا والله العظيم حسيت اني انصب من كثر المدح بس هذي الحقيقة )
الحلا والسلطات والفاكهة موجود بأنوع متعددة مدري كم نوع بس جد تحتار ودك تزط كلش
ومرتبين مره يعني مثلا ام علي موب حاطينه في سخان وكل واحد يغرف في صحنه لالالا حاطينها من الاساس في صحون صغيره وصافينها في سخان عشان ماتبرد وتعال خذ صحن وتفاهم معه
بعض الصور مسحوبه بالعذر والسموحة
واتذكر كان فيه رز وسلطات ومكرونة بلونيز ودجاج بالخضار وحبار بالطريقة التايلندية ولحم مدري بإيش وسبوسة وسبرينغ رول وكبه
السعر والتقييم
سعر البوفيه 140 للشخص والاطفال مجانا ومعنا طفل سبع سنوات ماحسبوه
الاكل 10/10
المكان 10/10
العاملين 10/10
بالنسبة لي انا شخصيا ابكرر الفطور عندهم مرة ثانية ان شاء الله
هذا معرفهم في تويتر
https://twitter.com/CriolloMe
تجربه جميله .. ان شاء الله نجربه بعد العيد ..
الفطور مستحيل خارج المنزل ..
يعطيك العافيه .