الرياض المسافرون العرب

أكتشف العالم بين يديك المسافرون العرب أكبر موقع سياحي في الخليج و الوطن العربي ، يحتوى على أكبر محتوى سياحي 350 ألف استفسار و نصائح عن السفر و السياحة, 50 ألف تقرير سياحي للمسافرون العرب حول العالم و أكثر من 50 ألف من الاماكن السياحية و انشطة وفعاليات سياحية ومراكز تسوق وفنادق، المسافرون العرب هو دليل المسافر العربي قبل السفر و اثناء الرحلة. artravelers.com ..
fahdalm
22-11-2022 - 08:43 pm
مهم
كان عندنا موعد امس انا والعائلة
وكل اوراقنا سليمه وحسب المطلوب
طلع لنا شي ما كان في الحسبان
ان المرافق في الجواز يجب ان لايتعدى عمره 15 سنة
ورفضوا استلام الاوراق
وقالوا لازم جواز مستقل لكل من يبلغ عمره 15 سنه اثناء التقديم لطلب الفيزا
والحين في مرمطة زحمة المركز الوحيد في الرياض لاصدار الجوازات في الوشم
والزحمة والانفاس الله لا يوريكم مكروه
رقمي 770
حسبي الله على مكتب التأشيرات الاوربيه
المشكلة ان داخل موقع التأشيرات ولا أحد قال عن هذي الملاحظة بخصوص العمر.
ما أقول الا الله يخلف علينا
اصعب تأشيرة على السعوديين حالياً هي الشنغن
أصعب من الامريكية والبريطانية
ما أدري ليش هالمعاملة الجافة واحنا رايحين ندعم سياحتهم.
بغيت انبه الجميع ودمتم.


تأشيرة
التعليقات (9)
daayem1
daayem1
لان اللي يستقبلك بالشباك ويستلم اوراقك كلهم وافدين من هونيك من هيديك الضيعات وانواع التطفيش يبونك تروح لمكاتب السياحه علشان يستنفع ابناء جلدتهم او على الاقل يفشون غلهم بصراحه البلد لازم تتنظف الى متى وحنا ماكول مذموم ؟؟؟!!!!!!!!

daayem1
daayem1
اجل لو لحقت عليهم يوم كان مكتبهم على طريق الملك فهد شقه في عمار ولو تشوف الطقاق والصيحه والفوضى اتذكر دخلت مره وكان مزحوم الساعه 9 توه فاتح وكاتبين لسته طويله عريضه المهم قلت بكره ابجي بدري علشان اسجل اسمي الساعه 7 وانا مسنتر حتى العماره اللي فيها الشقه السيكورتي ما يدخلك قلت له وين اللي يسجلون اسمائهم علشان مكتب السفاره قال تحصلهم بالكوفي دخلت الكوفي قلت وين اللي يسجل الاسماء قام معقب من احد المكاتب وجاب لي ورقه طلع ترتيبي 70 خ قلت معصي لابوك لابو من جابك الخمسين هذولا وينهم متى جو قال من بدري قلت وش غير الساعه 7 قال بعضهم من الساعه4 خ قلت انا اليوم جيت وبخلص اموري لكن سجل ولد عمي بكره الصباح واعتبره اول واحد جاء ههه قلت اقولك خل عني الاستهبال هذولا ربعك المعقبين وحقين المكاتب ومن وكلك اصلا تسوي ورقه وتكتب الاسماء ودام الشغل فوضى بل ورقتك واشرب مويتها وامعط لي ورقه واطلب كوفي واتكي قلت الورقه عندي وانا ابن البلد وملكف بتنظيم الفوضى هذي اللي يبي يدخل للسفار ه يجي يسجل اسمه واحقاقا للحق ما راح اسجل اسمي قبل اي واحد موجود طمر الزول وقال داخل على الله ثم عليك ياراجل خلي الامور تمشي واللي تبيه نسويه قلت ابغى اسمي بعد الموجودين هذولا عددهم 10 انا ترتيب 11 غيرها لا تكلمني قال ولا يهمك ترتيبك 11 وطمر وجاب لي كوفي المهم يوم جلسنا ساعه قالوا ترى فيه مصري جالس يكتب اسامي هناك عند مدخل العماره خ ونتطامر طلعت كني منهم ونهجم على المصري ونمزع ورقته قلت تبي تسجل سجل هنا المهم ما صدقت انتهي والحين مكتب ام الحمام يعتبر دلع وفخامه ههه ومواعيد صحيح انه ملعوب في المواعيد من حقين المكاتب ومعارف المكتب ومواعيد وهميه مخزنينها حقين المكاتب علشان كذا الموعد ياخذ بالسفاره شهرين ولو تروح لمكتب سياحي لقيت عنده موعد من بكره لانه مدخل اسماء وهميه والمعقب مسلك اموره عند المكتب ويدخلون وانت يالسعودي تمشي على النظام غصب وتجلس في اخر الطابور والله لو مفتكين منهم كان تحصل الموعد ما ياخذ بالكثير اسبوع او اسبوعين في الزحمه بس يبون يستغلونك هالمكاتب ويطفشونك بالمواعيد علشان ترجع لهم في الاخير ويضحك عليك الجواز 1000 ريال حتى الطفل مجاننا زياخذون 1000 ريال ؟؟؟؟؟؟؟؟!!!!!!!!!!1 ويا بلادي واصلي

fahdalm
fahdalm
صدقت
يبدوا انها مؤامرة مكاتب التعقيب لاحباطنا
ارجو ان يصل صوتنا الى المعنيين بالشئون القنصلية الاوربيه
اشكر اثرائك للموضوع

ss,,i
ss,,i
فعلا صارت مره صعبه احنا مقدمين عددنا 9 كلنا طلعت في خمس ايام وامي للحين ماطلعت كملت 10 ايام اليوم هذا غير انهم سوو لنا ازمه عشان ولد خالتي الي عمره اقل من 18 يقولون لازم ابوه يحضر ويوقع مع انه بيسافر مع امه واختي نفس وضعه بتسافر مع انها بس بدون ابوها وماقالو شي!! ماعرف ليش علقو على الولد بس?

aburefan05
aburefan05
السلام عليكم ورحمة الله وبركاته
والله انك صدقت انا اول مارحت للسفاره بالخبر ماحد معطيني وجه طلبت موعد من الأستقبال وبدون نفس قال لي خذ ورقه وفيها الموقع واحجز لك رقم بكل سهوله وانا سفرتي في اغسطس بعدها سكرت الابواب في وجهي وانا نازل سألت شخص وقلت له فيه احد هنا يخلص لي الفيزا قال لي نعم فيه مكتب وكله من الجنسية الأسيويه وشكلهم متعاملين مع الموظفين الي بالشنقن بكل سهوله خلصني في نفس اليوم مقابل 3 الآف ريال دفعتها وانا اضحك موحرام ياناس ياريت احد من المسؤلين يشوف لنا حل انذلينا والله ماسوت علينا هاالسفره.

آخـــرفـــرصــة
آخـــرفـــرصــة
طيب ليه ما تحجزون موعد من النت ؟
اذا تنتظر لين يقرب موعد السفر لا تلوم اللي يستغلك
افضل حل كل واحد يروح موقع السفارة على النت و يقدم شكوى
بالوضع اللي صاير و راح يردون عليك
لو زادت الشكاوى اضمن لكم الوضع يتغير

انسان ولهان
انسان ولهان
يا اخوان الواحد يجب ان يسأل قبل ان يذهب
وشروط عمر الجواز ليست من السفارات بل هي من وزارة الداخلية السعودية حيث يجب على الابناء استخراج بطاقة هوية وطنية
ابومعن

najlasaleh
najlasaleh
aburefan05
غلطان اخوي مفروض اخذت موعد vip
3000ريال
هذا الي مخليهم يسوون هذي التجاوزات
عيبنا السعوديين خاصه عجلين
ما ادري يمكن الحر هو السبب
لكن لاحظت قله الي عندهم قدره تحمل
والله لما رحت المكتب انهم بهذلوني
وبشكل متعمد وواضح
ويدورون ويلفون مع اني جايبه كل اوراقي
بس يوم شافني ملزمه وجالسه ماعندي نيه اطلع لاني كنت عنده امس بموعد
وقالي ناقص اوراق رجعت لهم من بكره لاني مالقيت موعد واستهبل الباكستاني كثير عشان
يخلصها لي لكن دخلت على المدير ووقع لي انها تمشي
وخلصها لي الباكستاني والله انه كان يحاول يستفزني كل دقيقه يدق بالتلفون يسولف ولا يترك الاوراق ويسولف مع الي جنبه
ومجرد مايدخلون اصحاب المكاتب السياحيه
بدقيقه يخلصونهم
لكن تحملت وجلست لحد ماخلصتهم
ولا اعطيهم الدبل
انا احق فيها
الحين لو ياخذون مبلغ معقول كان اقول الله يرزقهم بيسهلون علي الموضوع الله يرزقهم
لكن انهم يستنزفون جيوبنا بهذي الطريقه
فهذا يدل اننا عجازين ولاعندنا صبر
وهالشي هو الي طمع هالاشكال

fahdalm
fahdalm
الا تعقيد ما له داعي...
احنا رايحين سياحه ولا شحاذه؟
وليش نتقابل بهالمعامله الغير لائقه ليش؟
انا ودي اعرف كم يصرف الخليجيين في اوروبا كل سنه.
عشان اضمنها الشكوى اللي بكتبها للسفاره.
الخلاصة:
ألا يستحق السائحين الخليجيين العرب معاملة أفضل من مكاتب التأشيرات الأوروبية في الخليج العربي؟
ودمتم.
.


خصم يصل إلى 25%