- السلام عليكم.. ريكي هدا جدول اسطنبول
- اليوم الاول: ((منطقة السلطان احمد))
- 3-التكاسي انتبه منهم نصابين بعضهم ركز معاهم
السلام عليكم ورحمة الله وبركاته
طلبني صاحبي جدول لاسطنبول لمدة 7 ايام و سويتلو هوا وحبيت اشاركو معاكم
السلام عليكم.. ريكي هدا جدول اسطنبول
اليوم الاول: ((منطقة السلطان احمد))
فيها قصر الخلافة العثمانية ((top kapi)) وفيها متحف ايا صوفيا اللي كان كنيسة بعدين سار مسجد وبعدين متحف..وفيها مسجد السلطان احمد او المسجد الازرق يسمو..وفيها خزانات الموية ايام البيزنطيين تنشاف كمان دي وفيها عاد مطاعم وكل شي .. شوف هدا اليوم تقيل ولازم تصحو من بدري يعني عشرة بالكتير تخرجو من الفندق.. ترتيب الاشياء..((توب كابي..بعدين تريحو في المسجد وتصلو..بعدين ايا صوفيا والخزانات..بعدين غدا..وبعدها اللي يبا يرجع الفندق واللي يبا يروح المول سينما ولا حاجة..
اليوم التاني: قصر دولما بهجة..القصر اللي مات فيه اتاتورك يميزو عن القصر حق اليوم اللي قبلو انو افخم وبني على تلاتة عصور مختلفة .. وتخلصو منو تاخدو السفينة يا شنب وعلى جزيرة الاميرات وتركبو الحنطور وتتحنطروا وبعدين غدا هناك في الجزيرة معنها المطاعم غالية لكن اجلسو في مطعم من اللي واجهتو عالبحر وتنبسطو .. بعدين ترجعو بالبوت على مكان ما جيتو هناك في منطقة جنبها اسمها اورتا كوي قهاوي عالبحر وشي نضيف اجلسو شويتين كدا وكدا اليوم اكتمل ان شاء الله .. حاولو لمن تطلعو البوت تاخدو البوت السريع هوا اغلى شوية بس اسرع وانضف مليون مرة..مشكلتو رحلاتو قليل فخلوها تساهيل .. وهدا اليوم برضو لازملو صحيان بدري شوية..
اليوم التالت .. عندك تقسيم وشارع الاستقلال شارع كلو اسواق ومهرجين وعازفين موسيقى وجو حلو وهيصة تلفلفو هناك وتتغدو وبعدين عندكم في نهاية شارع الاستقلال في برج غلطة رهيب دا لازم تطلعو .. بعدين تطلعو على ((mini turk)) هدي مجسمات ومعالم تركيا كلها بشكل مصغر..
اليوم الرابع .. عندك ملاهي جديدة دوبها الاسبوع اللي فات فتحت كبيرة وشي زي ديزني لاند .. via land.. لازم تروحوها طبعا وهيا تقفل الساعة سبعة المغرب ما عدا الويك اند تقفل تسعة .. وتفتح عشرة..
اليوم الخامس .. ميناء امينونو طبعا هوا عالبحر والمنطقة يعني حلوة ما فيها شي كتير.. بس انو فيها السوق المصري ((مكسرات .. تذكارات .. فازات .. بهارات الليالي.. زي كدا)) وعندك فيها مسجد برضو كبير وكدا تدخلو تصلو في ركعتين .. وبعدين يا سيدي على جبل العرايس (( camlica)) هدي تلة مرتفعة وتبينلك اسطنبول كلها منظر خرافي الصراحة .. حلاوتها تخلوها يوم السبت او الاحد عشان تكون مليانة عرسان بالفساتين والبدل منظرهم حلو يعني..)
اليوم السادس.. يكون للبانوراما اللي هيا عبارة عن وصف 3d وصور وكدا عن فتح اسطنبول panorama 1453 وبعدها مول اسمو مرمرة فورم marmara forum هوا مول كبير وفيلو كمان الاكواريوم .. بعد ماتخلصو من المول على الحديقة اللي هيا فلوريا حاولو توصلوها قبل الغروب بشويتين .. وانتبهو من الرجعة لانو التكاسي مو كتير فلازم تكونو مزبطين واحد .. حديقة كبيرة زي الهايد بارك وكمان عالبحر يعني احسن من الهايد بارك هع هع
اليوم السابع .. في منطقة ابو ايوب الانصاري المسجد والقبر اللي مدفون فيه رضي الله عنه .. ومن جنب المسجد في تلفريك يطلعك على مقهى يطل على اسطنبول .. ولمن تنزلو في عندكم اختيار انو تروحو شارع بغداد begdat cadessi او تروحو مول via port outlet طبعا الحلو فيي المحلين هدي انو شارع بغداد فخم مررة يسمو الشانز حق اسطنبول وانا شفت فيه فخامة ممكن اكتر من الشانزليزيه لكن الشانز يخي ارضياتهم رهيبة )))
وفيا بورت برضو سوق جديد وفخم واوت لت فاللي يعجبكم ..
ملاحظات عامة :1-انا ما كتبتلكم عن المولات كتير ولا عن القهاوي .. لكن كل يوم في الليل بعد المشورة ممكن ترجعو الفندق واللي يحب ينزل تاني ينزل المولات كتيرة الافضل هيا : istinye park ,, gevahir mall ,, marmara forum
القهاوي .. عندك في بكر كوي و اورتا كوي bakir koy,, orta koy مطاعم وقهاوي نضيفة كلها وفخمة اورتا كوي عالبحر وبكر كوي افخم فانتو اللي يريحكم .
2- اهم شي يكون عندكم 20 دولار على كل جواز لمن توصلو المطار عشان الفيزا .. ماياخدوها الا بالدولار او اليورو 15 يورو عالجواز ما ياخدو اي عملة تانية انتبه!!!
3-التكاسي انتبه منهم نصابين بعضهم ركز معاهم
4- المطاعم اللي في الاماكن السياحية طبعا حتكون اغلى من غيرها لكن ازا حبيتو تقعدو اهم شي لا تطلب الا وانتا شايف السعر من المنيو لا يقلك مافي ومافي حيسخلك في الفاتورة بعدين..ولمن يجيك الحساب شيك عالفاتورة ياما زودوا علينا طلبات ولا غلو سعر حاجة .. لكن خويك ذيب ههه ما تمشي .. فانتبه..
5- تقريبا الاشياء اللي حطيتلكم هيا كتيرة والجدول ممكن يكون متعب نوعا ما .. بس قلت عشان امليلكم اليوم .. لكن ازا تحبو تلغو بعض الاشياء فعوافي او تغيرو المواعيد .. عموما الايام التلاتة الاخيرة مو مرة تتعب..
6- توب كابي يقفل يوم التلوت..وايا صوفيا الاتنين .. انتبهو لدا الشي لانهم في نفس اليوم .. دولما بهجة يقفل اتنين وخميس وكلهم التلاتة تقريبن يقفلو الساعة 5
7- جبل العرايس احلى شي انو تطلعو سبت او احد عشان تشوفو الافراح وكدا
8-في الباص السياحي اللي يسوي سيتي تور..ماكتبلك هوا لانو انتو انتو قيدكم رحتو اهم الاشياء المهم ازا تحبو تطلعو تلاقو في منطقة سلطان احمد قدام ايا صوفيا والتزاكر من نفس المكان..
اجازة سعيدة ،،،
