مراكش المسافرون العرب

أكتشف العالم بين يديك المسافرون العرب أكبر موقع سياحي في الخليج و الوطن العربي ، يحتوى على أكبر محتوى سياحي 350 ألف استفسار و نصائح عن السفر و السياحة, 50 ألف تقرير سياحي للمسافرون العرب حول العالم و أكثر من 50 ألف من الاماكن السياحية و انشطة وفعاليات سياحية ومراكز تسوق وفنادق، المسافرون العرب هو دليل المسافر العربي قبل السفر و اثناء الرحلة. artravelers.com ..
بآقي مغترب ...
17-12-2022 - 11:25 pm
  1. نبداء باسم الله ...

  2. وصف مراكش


السلام عليكم ....
انا عضو جديد بالمنتدى >>> قل قسم ههه
قصدي يعني اول مره اكتب موضوع بالمنتدى عن رحلة سفر .. فاتمنى عدم التجريح وعدم النقد الهادم >> حاس ان تقريره فاشل خ
الصور مو كل الاماكن صورتها لاني وقت ما كنت بالمغرب ما كنت اتوقع اني راح احط تقرير في المنتدى وبالتالي ما حرصت بشكل كبير على التصوير .... فاعذروني
ثاني شي انا شخص نساي وانسى كل شي وفي اشياء نسيت اسماها وغيره فاتمنى ايضا تعذروني >>> تقرير فاشل ههه

نبداء باسم الله ...

في احد الليالي الشتوية شديدة البرد في احدى استراحة بريدة ( القصيم ) كنا نشرب حليب زنجبيل واقترح علينا احد الشباب سفرة الى المغرب نغير جو ونستانس ونشوف ديرة غير ديرتنا ( مع العلم اننا اول مره نروح للمغرب كلنا ) وقال لنا احد الشباب نجرب وما راح نخسر شي ... فقال احد الشباب حكمته الشهيره اللي لن انساها ما حييت( الحياة عبارة عن سلسلة متسلسلة من التجارب ) وقررنا تكون رحلتنا الى مراكش احد مدن المغرب الشقيقة .
فقالنا على خير وكنا اربع شباب ( 24/24/24/23 ) لحد يقول وش هذي ههه هذي اعمارنا
رحلتنا كانت على الخطوط القطرية ( القصيم – الدوحة – كاز) والعكس في العودة وكانت اذا ما خاب ضني نهاية شهر يناير او بداية شهر فبراير تقريبا يعني .. مالكم في الطويلة
المهم هذي معلومات عن مراكش او يسمونا مراكش الحمراء او مراكش النخيل او مدينة النخيل
مراكش هي ثالث أكبر مدينة http://www.hayah.cc/forum/redirector.php?url=%68%74%74%70%3a%2f%2f%61%72%2e%77%69%6b%69%70%65%64%69%61%2e%6f%72%67%2f%77%69%6b%69%2f%25%44%38%25%41%37%25%44%39%25%38%34%25%44%38%25%41%33%25%44%39%25%38%35%25%44%38%25%41%37%25%44%38%25%42%32%25%44%39%25%38%41%25%44%38%25%42%41 كلمة تامورت أو أمور التي تعني البلاد كثيرا في تسمية البلدان والمدن.وما زال كثير من العرب يطلقون على المغرب ككل اسم مراكش

وصف مراكش

وصفت مراكش بأنها المدينة الحمراء، الفسيحة الأرجاء، الجامعة بين حر وظل ظليل وثلج ونخيل، عاصمة دولة المرابطين والموحدين والسعديين، قال فيها صاحب وفيات الأعيان: مراكش http://www.hayah.cc/forum/t26998.html مدينة عظيمة بناها الإمام يوسف وهي قاعدة بلاد المغرب وقطرها ومركزها وقطبها، فسيحة الأرجاء، صحيحة الهواء، بسيطة الساحة ومستطيلة المساحة، كثيرة المساجد، عظيمة المشاهد، جمعت بين عذوبة الماء، واعتدال الهواء، وطيب التربة، وحسن الثمرة، وسعة الحرث، وعظيم بركته.
هذي صورة ساحة الفنا في مراكش ساحة مشهورة جداا هناك
وهذي منارة الكتيبة في مراكش ايضا
هذي هي الحلقة الاولى من رحلتنا بعد قليل باذن الله بنزل الحلقة الثانية من الرحلة الشبابية الى الاراضي المغاربية بس ابي تجاوب وتفاعل ...


التعليقات (9)
بآقي مغترب ...
بآقي مغترب ...
  1. وهذي صورة طيارتنا يوم نقلع >> ماهوب كذوب ههه


الحلقة الثانية
بسم بالله اجتمعنا احنا الشباب بالاستراحة قبل نروح المطار عشان ناخذ ( رز ابو كاس
) ومعلبات وغيره من الادوية عشان سمعنا ( ان الادوية هناك غاليه جدا في المغرب )
مطار القصيم طبعا مثل ما تعرفون مطار صغير وكل شي صغير اول ما وقفنا عشان يتاكد من جوازتنا موظف الجوازات قال يا شباب ( اللي ماعنده اجازه خارجية يطلع من الحين مو فاضيين نحرجه ويحرجنا من البداية اقولها لكم ) هنا شعرنا بالخوف مع اننا مالنا دخل واصلا حنا مو موظفين ههه بس حسينا برعب
هذي صورة للمطار القصيم
المهم رحنا وقعدنا بالوفية او كافتيرا او مدري وش اسميها ههه المهم مافي شي يفتح النفس يؤكل واخذنا ماء ( موية ) وانتظرنا رحلتنا اللي بتاخذنا من القصيم للمغرب الشقيق
شوي ولا ينادون ع رحلتنا
ونجي البوابة بس الغريب ما اشوف أي طيارة انا ومستغرب وين الطيارة المهم تاكدوا من اوراقنا ثم طلعنا قالوا تشوفون الطيارة هذيك اللي باخر المطار قالوا روحوا لها ( مشي على الاقدام )
واركبوها وتوديكم للمغرب ههه ... ياولد عدل بدل مشوار قالوا هذا اللي عندنا
المهم ونركب الطيارة ونقلع من القصيم متجهين لقطر ونمشي ونمشي >> ماعنده خبره في كتابة تقرير ههه

وهذي صورة طيارتنا يوم نقلع >> ماهوب كذوب ههه

وصلنا مطار الدوحة وجانا باص واخذنا وكل مكان بالمطار يعتذرون يقولون اسفين على المطار لانه قديم ومن هالكلام ... وحنا مبسوطين مطار حلوو ويعتذرون ههه مطار القصيم بعد التطوير وكل شي ما يجي ولا خمسه بالميه من مطار الدوحة القديم
هذي صورة لمطار الدوحة القديمم
ونقعد ساعتين ونركب الطيارة اللي رايحة للمغرب تقريبا المشوار سبع او ثمان ساعات تعبنا تعبً شديداً من الرحلة وننزل في مطار محمد الخامس الساعه يمكن ثلاث العصر تقريبا
الحلقة القادمة قصتنا في مطار محمد الخامس والبخشيش وانتظارنا بالمطار لمدة تتجاوز ست ساعات
انتظرونا

ماريوت13
ماريوت13
السلام عليكم
الحمدلله على السلامه والتقرير مشوق منذ البدايه
متابع

سلمان الآحمدي
سلمان الآحمدي
هلا والله ..... تقريرك عاجبنب من البداية ...احب ذكرالتفاصيل .......... وبساطة السلوب مع روح الفكاهة ..........
اسمحلي بمداخلة ......انا زي اخوك الكبير ( جينا في القروشة )
حسب ما سمعت انه ممنوع المشي في المطار دوليا واتذكر مرة في الامارات الطيارة بينها وبيننا عشر امتار لكن رغم كدة ركبونا باص ..

بآقي مغترب ...
بآقي مغترب ...
ماريوت13 ... يشرفني متابعتك يالغالي
سلمان الاحمدي ... ههه ياخي وش اسوي خلونا نمشي اصلا استغربت منهم بس ما كنت اعرف هالمعلومة شرفني مرورك يالغالي ...

بآقي مغترب ...
بآقي مغترب ...
  1. قلت : انا مادري مكتوب بالعربي وكتبت الاجابة بالعربي

  2. وقعدت واقف >>> متعوب عليها هالكلمه ههه

  3. طبعا انا استمريت بالوقوف ( اخاف اجلس ع أي كرسي ويقولون ليش جلست )


الحلقة الثالثة
بعد ما وصلنا مطار محمد الخامس الساعه 3 عصرا تقريبا كان الجو غائم ومطر جو رايق يعجبك
وكان في مجموعة شباب من الكويت قدامنا وكانوا يقولون لنا اذا وصلنا موظفين الجوازات المغاربة عطوهم بخشيش وريحوا راسكم .... وحنا مسوين فيها ذيابه قلنا ليش نعطيهم وحنا نظاميين ( وليتنا ما فكرنا بهالشي )
تقدم لنا موظف جوازات وقبل نوقف طابور قالنا تبون اساعدكم عن الزحمة وقلنا له يعطيك العافيه ( ما كنا نعرف معناها بالمغربي )
ونوقف طابور وكنت انا اول واحد من الشباب الاربعة لين وصلت موظف الجوازات ( وانتم تعرفون انهم يعطونك ورقة مكتوب عليها اسمك مكان اقامتك وتاريخ ميلادك ... الخ ) طبعا حنا كتبناها وحنا بالطيارة وكل شي تمام
لما وصلت للموظف
قال : ليش تكتب معلوماتك بالعربي ؟
قلت : لان السؤال مكتوب بالعربي ؟
قال : بس لازم تكتب بالانجليزي ؟

قلت : انا مادري مكتوب بالعربي وكتبت الاجابة بالعربي

بعد كذا تغير وجهه وعصب وقعد يشخبط بالاوراق ثم ختم الجواز وعطاني اياه ومشيت
عقبها وقفت عند موظف جوازات اخر انتظر اخوياي الموظف هذا يتاكد ان كل المسافرين ختموا جوازتهم يعني بس يشيك طبعا انا كنت واقف جنبه وبعض المسافرين الاجانب لما يعطونه الجواز ويتاكد يقول لهم تفضلوا يجوني ويعطوني الجواز ههه انا مالي دخل ويعصب الموظف علي يقول خربت شغلنا قلت وش اسوي انتظر اصحابي يخلصون من الجوازات ... واتفاجى انهم طولوا... كل ركاب الرحلة طلعوا بقى فقط اخوياي وموظف الجوازات فقط الصالة خاليه .... وش اسوي وش اسوي وش اسوي ههه
قلت للموظف اللي كنت واقف عنده بدخل بشوف اصحابي قال لا ممنوع قلت يمكن عندهم مشكلة قلت عشان كذا ودي ادخل اتاكد ورفض قال ممنوع
بعدين راح هو يتاكد من الموضوع ... طلع ان صاحبي اللي كان وراي اسمه مشتبه فيه ومطلوب للامن المغربي وان هذا تشابهه اسماء وفهمت من كلامه ان اخوياي الثانين ( دهنوا السير ) وانه بالكثير نص ساعه وراح يطلعون كلهم

وقعدت واقف >>> متعوب عليها هالكلمه ههه

استمريت واقفا لمدة تتجاوز الساعتين وبعدين طلعوا اخوياي ورحنا نشتري بطاقة شريحة جوال عشان الواتس اب والاتصالات وغيره ورحنا اتصالات المغرب وحنا في معمة الاسئله والاستفسارات التي كانت تتوالى على موظف الاتصالات >> لغة فصحة ههه
وحسينا ان موظف الاتصالات مو يمنا يعني منشغل باله في شي خارج المحل ونلتفت ورا ونلقى (امن المطار يدورون بالصاله كنهم يدورون شخص ) وحنا بحسن نية طلعنا نشوف الوضع .... شوي ونلقى عسكري ياشر على صاحبنا اللي كان قبل شوي عندهم ويقول هذا هو وياخذونه وانا اقول وش السالفة وليش ويلتفت علي ضابطهم ويقول لما نخلص منه نرجعه قلت طيب متى تخلصون قال ممكن ساعه ساعتين يمكن يوم يومين متى ما خلصنا نرجعه
في هذه اللحظه كنت تعبان جداا كم لنا ما نمنا واللي زاد القهر ( ان صاحبنا اللي اخذوه ماعندنا وسيلة اتصال نتصل فيه ) تحس كان عصابة جت واخذت صاحبك منك واختفت
وين صاحبنا يا ترى .... ؟ هل هو في المطار خارج المطار وين راح وين ذهب كيف استطيع التواصل معه ؟...
نخاف نروح ندوره ويجي يدورنا بنفس المكان اللي كنا فيه ونضيع عن بعض ...اتفقنا كل واحد يدور في مكان بالمطار وانا ومعي الشناط اكون عند محل الاتصالات انتظر صاحبي يمكن يجي ....

طبعا انا استمريت بالوقوف ( اخاف اجلس ع أي كرسي ويقولون ليش جلست )

ادري بعضكم يقول انك تكبر الموضوع هذي اول سفره لي خارج الخليج وصراحه اللي شفناه اول ما نزلنا خلانا نكره شي اسمه مغرب حتى وانا واقف انتظر صاحبي خمسين الف شخص اللي سواق واللي يبي ياجر سيارة واللي واللي .......
وغير كذا مادري وش يقولون وفوق هذا ماني يمهم انا افكر في صديقي الاسير
>>> حلووه اسير في حرب حنا ههه
المهم هذي صورة لي وانا واقف بغيت انكسر وانا واقف ههه طبعا الصورة للناس اللي قدامي
المهم بعد فتره يمكن ثلاث ساعات جا صاحبنا واتضح لنا انه رشهم كلهم رش ( اغدق عليهم بالمال من ضابط الى جندي الى كل واحد ) وقاموا باسوا راسه واعتذروا منه والخ .......... وان اللي صار لنا كله عشان ياخذون فلوسنا والمشكلة فضحونا بين الناس ههه كل المطار عرفونا على سالفتنا
في الحلقة القادمة ... وين رحنا ومتى وصلنا ووش حجزنا ووين في مراكش طبعا ....؟

قـاصـد
قـاصـد
حمدلله على سلامتكم و ماشاء الله على خويكم عرف كيف يتصرف معهم مع أن السالفة كلها نصب و إستغلال لكن ما ينلام دامها أول سفرة لكم
متابعين معك واصل يا بطل

محسن58
محسن58
يا هلا باهل القصيم
يا رجل ترا انت تقول قصايد و انت ما تدري
( وانا انسان نساي ) هذي ما يجبونها
و الله امتاع و ابداع و روقان
هذا مطار المغرب يا ناس شوي رفع صوت
ترا فيه سفاره ترا فيه خبزا و خبزا بلان
اطلبوا المسوولين شدوا في الكلام شوي
كلها حركات خرافيه لازم تحكي كلمتين مغربي
عشان يحسو انك تعرف
واصل و الله رائع

سلمان الآحمدي
سلمان الآحمدي
سلامات الف سلامة والله يالحبيب ....لا حولة ولا قوة الا بالله
انا اقراء واتذكر اول كلامك انكم كلكم اول مرة ترحو ع المغرب .... واقول كيف مشتبه فيه .... سلامات والله ما ادري ايش اقولك لكن عاد الحمدلله غمة وعدت

حزين الضماير
حزين الضماير
حمدالله على سلامتكم
اسلوبك الرائع هو اللي حللى التقرير
واصل متابعينك


خصم يصل إلى 25%