روي ات المسافرون العرب

أكتشف العالم بين يديك المسافرون العرب أكبر موقع سياحي في الخليج و الوطن العربي ، يحتوى على أكبر محتوى سياحي 350 ألف استفسار و نصائح عن السفر و السياحة, 50 ألف تقرير سياحي للمسافرون العرب حول العالم و أكثر من 50 ألف من الاماكن السياحية و انشطة وفعاليات سياحية ومراكز تسوق وفنادق، المسافرون العرب هو دليل المسافر العربي قبل السفر و اثناء الرحلة. artravelers.com ..
احلى من العقد
12-12-2022 - 07:47 am
سفرة لم يتم التخطيط لها
ولا التفكير فيها
ولم تخطر في البال ولا على الخاطر
نعم احب البحر
احب الجزر
احب اسيا
لكن كانت بالنسبه لي غائبة عن تفكيري لان اعرف ان صعب تحقيقها على الاقل في هذه الفتره
في يوم من الايام
كلمتنى خالتي وقالت شوفي لنا حجوزات لتركيا
وفجأه وبدون تخطيط سابق
ردت قالت لي شوفي لنا في بوكت
وليش ماتجون معانا
تعالو نروح كلنا جماعه نستانس
طبعا
انا ماصدقت خبر ووافقت حتى قبل مااشاور اهلي خ
عقب تذكرت لازم اشاورهم
والحمدالله الامور تسهلت والاهل وافقو
وخلاص كلها كم يوم ونطير الى بوكت
رتبنا الحجوزات
واخترنا فندق كانت ساكنته خالتي وعائلتها من قبل ومدحت لي اياه وطبعا مافي وقت للبحث
وجاء موعد السفر
وطرنا الى بوكت بالخطوط القطرية دايركت الى بوكت مروراً بكوالالمبور والتوقف لمدة ساعة واحدة بدون النزول من الطائرة ...
بدت ملامح بوكت تبين بين الغيم والبحر جزر خضراء رائعة الشكل

ونزلت الطيارة في مطار بوكت ...

خلصنا الاجراءات بسلاسه وخذنا الشنط وتوجهنا للباب عشان ندور تاكسي وشفنا شركات عند الباب توصل الى الفندق يا إما بمواصلات خاصه او بمواصلات مشتركه (( باص)) وكان عددنا كبير
ومافي سيارة حاليا خاصه فقلنا بنروح بالباص المشترك وسعر الشخص 180 بات (( مايعادل 19 ريال قطري))
ركبنا الباص و حظنا كان حلو بنفس اللحظه الي ركبنا فيها الباص حرك على طول وكان في واحد اجنبي قاعد بالكرسي الي جدامي وقال انتو محظوظين اول ماجيتو مشى الباص انا صار لي ناطر ربع ساعة ...
بعد مامشى الباص وعبرنا شوارع وطرقات توقف الباص عند محل تابع لشركة سياحيه هي نفسها الي أجرنا منها الباص المشترك الي راكبينه حاليا
وقالو لنا شخص واحد من كل قروب ينزل عشان ناخذ معلومات الفندق الي تبون تروحون له
نزلت انا من قروبنا لان الاوراق كانت عندي وانا مسويه الحجوزات
واستقبلوني داخل وخذو عنوان الفندق وقامو يعرضون علي عروض سياحيه
عجبني عرض للجزر وطبعا انا ماعرف الاسعار برع شلون بس قررت احجز لبكره من عندهم
ودفعت لهم مقدم سعر 1300 بات (( يعادل 140 ريال تقريبا )) لشخص واحد و الباقي بندفعه لهم بكره قبل مانروح للرحله .. وطبعا هم راح يمرون علينا الفندق ياخذونا ...
وعقبها ركبت الباص وكان الكل ينطرني والبعض كان يتحلطم اني وايد تأخرت داخل
الاجنبي الي قالي انتو محظوظين يقول ان هالشركة ماتعتبر ارخص شركه وكان ممكن نلقى خيار ارخص اذا دورنا في الشركات الي في الباتونق .. بس الوقت ضيق واحنا نبي نروح بكره للرحلة فمافي وقت للبحث ...
المهم
وصلنا الفندق ...
حجزنا كان في فندق اسمه
Le Flora Resort
موقعه على شاطئ الباتونق مباشرة على الشاطئ بدون مايفصل بينه وبين البحر شارع
وحوله محلات مساج ومطاعم و مغاسل واسواق وشارع حي وجميل جدا جدا جدا
يعني بختصار الجهه الاماميه للفندق هي على شارع حي والجهه الخلفيه مباشرة على الشاطئ الرائع

يمين الفندق مطعم ماكدونلدز ويساره ستاربكس

وامامه مباشره شارع جميل ياخذكم الى فندق كي ومنه الى شوارع متفرعه حيه جدا

وهاي واجهة الفندق من الخارج

دخلنا الفندق .. وكان الاستقبال مفتوح ومكشوف

والموظفين كانو وايد بشوشين ورحبو فينا وقالو لنا ساديكا مادري شنو يعني بس اعتقد مرحبا وقالو لنا تفضلو جلسو هنا واحنا بنجيب لكم الاوراق وكل شي لين عندكم

الفندق يصنف بأنه ذو 5 نجوم ... لمعرفة المزيد عن الفندق وعن الرحلة تابعو الجزء القادم


التعليقات (9)
حسن الحمادي1
حسن الحمادي1
الف الحمد لله على سلامتكم
و نشكرك آختنا الغالية آحلي من العقد على تقديم هذة المقدمة الجميلة .
منتظرين منكم الصور الحلوه لرحلتكم و أهم المعلومات التي تساعد السائح العربي الى بوكت .
تقبلي تحياتي """

F.A.H.D
F.A.H.D
الحمدلله على سلامتكم خبيرتنا القديرة..
احياناً تكون الرحلات السريعة غير المخطط لها من اجمل الرحلات..
بإنتظارك..
تحياتي وتمنياتي لك بالتوفيق.

هداوه
هداوه
الف الحمدالله ع السلامه
تولهت عليج وع تقاريرج
كان خاطري أكون وياج هاي الرحله
انتي تروحين من قطر وأنا آييج من الامارات
وايد متشوقه أعرف التفاصيل لأنه بوكيت من مخططاتي بس متى الله أعلم

FuNnY GiRL
FuNnY GiRL
هلا هلا بصديقتنا احلى من العقد واخيرا بنشوف تقرير جديد منج
الكل يمدح بوكت متشوقه اشوف اشلون التقرير بيطلع من يدج وكيف بنشوف بوكت
منتظرين باقي التقرير بكل شوق

احلى من العقد
احلى من العقد
حسن الحمادي1 الف الحمد لله على سلامتكم
و نشكرك آختنا الغالية آحلي من العقد على تقديم هذة المقدمة الجميلة .
منتظرين منكم الصور الحلوه لرحلتكم و أهم المعلومات التي تساعد السائح العربي الى بوكت .
تقبلي تحياتي """

وفاااء
وفاااء
ماشاء الله بدايه حلوه
وانا اقرأحسيت اني مستعجله خ تأثرت وانت تقولين رحله سريعه
ننتظر البقيه لاتتأخرين

احلى من العقد
احلى من العقد
  1. توجد 3 انواع للغرف

  2. النوع الرابع .. فيلا بغرفة نوم واحده مع مسبح خاص.


مرحبا جميعاً
شلونكم ان شاء الله بخير
بصراحه دام ان عندي وقت بكمل التقرير وان شاء الله اقدر اكمله بسرعه
لاني اخاف انشغل عقب ومااحب اتأخر عليكم احس ينقطع حبل افكاري
المهم
اخر شي وصلنا له ان احنا دخلنا الرسبشن وقعدونا على الكراسي الي راويتكم اياها
وقدمولنا اطواق الياسمين وعصير انناس بارد ومنعش يبرد عالقلب وفوطه بارده منعشه

بعد ماخلصنا اجرائات الشيك ان اخذنا موظف الى غرفتنا ..وقبل مااكمل خلوني اقولكم انواع الغرف

توجد 3 انواع للغرف

النوع الاول وهو الارخص .. غرفة تطل على المسبح وفيها بلكونه بالطابق الثاني
النوع الثاني الاغلى من الاول .. غرفة مباشرة على المسبح وفيها شكل ماتقولون بلكونه عليها كراسي شيزلو عالمسبح وتقدرون تطبون بحمام السباحه مباشرة وهالغرفة بالطابق الارضي وجزء من المجموعه كان ساكن بهالغرفه وهي غرفة واسعه .((الليله ب 961 ريال قطري ))
النوع الثالث .. غرفة بالدور الثاني بإطلالة على الشاطئ والبحر وهاي كانت غرفتي وهي اغلى من الغرف الي فوق سعر الغرفة ((الليله ب 1259 ريال قطري ))

النوع الرابع .. فيلا بغرفة نوم واحده مع مسبح خاص.

النوع الخامس .. فيلا بغرفتين نوم مع مسبح خاص (( اعتقد هالخيار موجود اذا انا مب غلطانه))شكل ماقلت لكم ان غرفتي كانت من النوع الثالث والي تقع في الدور الثاني وهي غرفة باطالاله مباشره على الشاطئ كنت متخيله انام عالسرير وافتح الستاره واشوف البحر جدامي لان الطوفه كلها قزاز واشوف الشروق او الغروف والمنظر الخلاب ... المهم
رحنا ورا الموظفه الي بتراوينا غرفتنا وركبنا السلم وراها
وكانت تعرفنا على مرافق الفندق

ووصلنا الغرفة ..

وافتحت الباب واول شي لما شفت الغرفة فرحت وعجبتني
و دخلنا الغرفة وكانت واسعه وشرحه وأول مالتفت يمين الا القى الجاكوزي جمب الطوفه ومافي طوفه تستره عن الغرفة

يعني عندي خيار من اثنين يا اما اطرد اختي واخذ راحتي بالجاكوزي
او اني اطب في الجاكوزي بكامل ملابسي خ
وهاي المكتب وعنده في باب اعتقد بلكونه تطل عالشاطئ بس تصدقون اني ماخذت بالي من الباب الا الحين كنت مصدومه من الجاكوزي والحمام

نظرة اخرى على الجاكوزي وتلاحظون ان الي يفصل الجاكوزي او الحمام بالاصح عن الغرفة عباره عن خزانه او ارفف صغيره وقصيره

وهاي السرير .. واذكر اني طلبت سريرين ف الغرفة بس ردو علي بإيميل اعتذار ان هم ماعندهم سريرين منفصلين في كل الغرف لكن الموظفة قالت لي ان احنا عوضناكم وعطيناكم لحافين و 4 مخدات منفصله وكان خيار جيد وفكره ممتازه

وهاي المغاسل و ادوات الحمام والفرشاه والمعجون وشغلهم مرتب

وهاي الميني بار وكان مجانا الجمل بما حمل كل الي فيه مجاني وفوقه غلاية ماي وشاي وقهوه وحليب وسكر وكوفي ميت وكل يوم فوق ال6 غراش ماء مجانا وطبق فواكه ..

مستعدين للمفاجئة ..
شوفو الحمام

الجاكوزي والشاور و المرحاض وانتو بكرامه مفتوحين عالبحري لاطوفه تستر ولا ستاره تفصل ولا حتى بارتشن وفوق هاي كله مافي شطاف او هوز للغسيل والمغاسل بعيده جداً انصدمت صدمت حياتي
وقمت اقول للموظفة
How >>How can i use the toilite
HOw How How Hooooowwww
قمت انابح هاو و هاو خخ
قامت اعتذرت لي وقالت كل الغرف الي تطل على البحر بهالطريقه سوري
قلت لها ماقدر شلون استخدم الحمام
جيبي لي بارتشن او اي شي يستر
الموضوع صعب
وكان يوجد امامنا حلين لا ثالث لهم
الحل الاول يا إما اختي تطردني برع الغرفة عشان تستخدم الحمام ..
او انها
تراويني درس عملي عن طريقة استخدام الحمام
الموظفة حست ان قلبي الصغير لايتحمل هالحمام
وقالت لي دقيقه بتصل اسأل اذا في امكانيه نبدل الغرفة
واجرت اتصال وعقب قالت اوكي عندنا غرفة فاضية بس انتظرو 10 دقائق في الاستقبال لين يجهزونها لكم ..
ونزلنا الاستقبال ننتظر الغرفة الجديده تجهز ..
في الجزء القادم .. تفاصيل الغرفة الجديدة ...

سوسو الصغيرة
سوسو الصغيرة
اولا : الحمد الله على السلامة
ثانيا: مستحيل عواش تحجزين في الفندق و ما شفتي الغرف ... الصراحة الغرفة تحفه ... اغلب زوار بوكيت من الاجانب و خبرج الاجانب كل شي فري عندهم ...
اما الاستقبال حلو و مرتب و كل فنادق بوكيت جذيه ...
حلو موقع الفندق و اهم شي ماك وستاربكس ...
ابا اعرف شو سويتي في الغرفة بسرعه كملي الله يرضى عليج ...

هداوه
هداوه
ابا اشوف الغرفه الثانيه مب قادره أصبر
الصراحه تصاميمهم عجيبه وخايسه
يعني أغلب اللي يسكنون الغرفه يكونون 2 ولو حتى حرمه وريلها لابد من الخصوصيه
هذا حمام مب مطبخ
عواش
ترا ماعجبتني الغرفه ولو انها غاليه ماحسيت فيها فحامه
وياليتج صورتي الفيلا ام مسبح خاص
هاي اباها


خصم يصل إلى 25%