- طبعا أنت محتار ذحين كيف تروح روما أو مسافر على رحلة داخليه ,,,
السلام عليكم ورحمة الله وبركاته ,,,
إلى كل زائري إيطاليا أحببت أساعدكم بهالمعلومات وبالأخص إلي حيكون إنطلاقة جدولة من روما.
النزول مطار ليوناردو دافنشي الدولي
طبعا أول ماتنزل من الطائرة راح تمشي إجباري لبوابة نحو قطار صغير ينقلك إلى المبنى من هناك تصطف طابور جهة لمواطني الإتحاد الأوروبي(شعار الاتحاد الاوروبي ) والجهة الأخرى لجميع الجنسيات .
بعد ماتختم تتجه لشاشات العفش وتشوف إسم رحلتك وين وتستنى بالسير وحمدالله ع السلامه ,,
طبعا أنت محتار ذحين كيف تروح روما أو مسافر على رحلة داخليه ,,,
اذا انت مسافر على رحله داخليه طبعا مكتوب بالتذكرة رقم التيرمنل وهو مبنى الركاب الي منه تقص اجراءات الصعود والعفش أول شئ شوف تذكرتك لما توصل روما من بلدك انت بأي ترمنل نازل وتأكد بالرجعه تعرف ترمنل الإياب .
عكس الدخول بالزبط الخروج ترا تطلع قطار صغير يوديك المنطقه المخصصه لحرفك بالبوردينق بعد شحن العفش وتختيمة الخروج
مثال : TERMINAL2 يعني مبنى الركاب رقم 2 وقس على ذلك TERMINAL 1,,,
مثلا مكتوب بالبوردينق H5 معناته تروح تعدي التفتيش الداخلي وتشوف اللوحات الحروف مع حروف ثانيه عليك بحرفك ورقم بوابة الطائره تمشي معاها والارقام بالارض
البوابة H رقم 5 لان بيكون في H 6,7 وحروف وارقام ثانيه للمسافرين الاخرين
معروف السعوديين ع باله الناس كلها راجعه معاه
مو شغلك حرفك ورقمك وخل الناس بحالها
مطار كبير ومنظم
وتستمتع بكل مكان فيه محلات ماركات ودورات مياه حاجه حلوه
حبيبي ترا مو مطار سعودي تقول كل ماوصلت نقطه ع بالك قربت الطياره بتشتري وبعدين بتقعد طفشان لين نداء الصعود كل جزء من المطار مولات ومحلات لين تتوكل على الله
الذهاب إلى روما
بعد اتاخذ عفشك توكل على الله بتحصل سيارات اجره ومكاتب باصات وانت بكيفك
واذا تبغى القطار روح قص التذكره على روما سنتر قولهم ROMA CENTAR
طبعا روما سنتر هي محطة ( TERMINI ) (تيرمني ) المحطه منها انطلاقات للمدن الثانية بايطاليا انت تنزل وتحصل ارشادات ولوحات المترو الازرق B والبرتقالي A
( طبعا انت شوف فندقك باي منطقه واذا نزلت عند المترو شوف موجود باي مكن من اللوحتين مكتوب ع الجنبات وواضحه واطلع
أنتبه لاغراضك المترو اذا زحمه
( النشل بخفة وبفن ماتحس بشئ خلك ذيب عين عليك وعين على الي معك وهم العكس)
خاصة بنات او شباب أو اطفال انتبهلهم
طبعا المترو اي محطه بيوقف فيها بيسوي ندا ومكتوب بالشاشه اسمها .
انت انتبه لفوق باب مدخل المترو فيه لوحه بالمناطق الي يروحها واعرف منطقتك
يابو الشباب لو عديت محطتك لاتخاف اقعد بالمترو لين يرجع بنفس الاتجاه وانزل بمحطتك
اللون الأزرق بعض محطاته الكولسيوم منطقه تاريخيه وحضارة مملكتهم وبه متسولين ورسامين بطرق جميله يسلونك ونسيت المحطات الثانية المعذرة.
واللون البرتقالي محطاته :ساحة اسبانيا وإسمها بالمترو ( SPAGNA) مشهوره بالمدرجات الاسبانيه وشوارع للماركات العالمية ومعروضاتها وفنادقها تتسوق وتنبسط بها او تتمشى تتفرج بساحاتها على الرقص واسلوب الشحاذه الراقي .
(بربريني) قريبه على ساحة اسبانيا لو بتروحها مشي لاتطلع مترو لها ,,
(أوتيفيانو) منطقة الفاتيكان ينزلك بأولها وتمشي مع شارع جميل وبه محلات لين سور الفاتيكان .
( ليبانتاو ) هاذي برضه منطقة قريبه على ساحة الفاتيكان وانت اختار تنزل باي محطه .
فهمت ياعزيزي المترو بداخل المدينه لونين بس ازرق وبرتقالي.
منطقة TERMINI
نقطة التقاء المترو الازرق والبرتقالي اذا كنت ناوي تروح اسم منطقه معين مو في خط سيرك فيها تنزل بهالمحطه وتروح الجهه الثانيه وتطلع المترو يوديك لهدفك
المنطقه بها مطاعم حلال وطيبه الاسعار,
معلومه تمشي من تيرمني للكولسيوم شارع رهيب يوديك لها برجولك وقريب .
بالأخير
ماتعرف تسوي جدول أو شئ يالغالي
اعرف المنطق باسمائها واطلع بالمترو لها وانبسط واذا مره اطلع المترو وانزل كله مره بمحطه اكتشف وارجع للمترو وروح للي بعدها وسلامتك
بالأخير أتمنى دعوه طيبه بالشفاء لوالدتي الله يحفظها .
دمتم سالمين
