- طبعا كان برنامجي كما يلي :
- وأفاموسا يالإخواني هذي حكايتها حكاية .......
- إرتحت شوي وقلت .. يالله دامها برخيص شبتطلع !! .....
- عرض السفاري :
السلام عليكم ورحمة الله وبركاته ....
وصلت قبل أسبوع بحمد الله من ماليزيا بعد قضاء 19 ليلة ... كانت رائعة بنسبة 80% ..... وال20% الباقي بقول لكم وين راحت :112:
طبعا كان برنامجي كما يلي :
- ليلتين في سنوي لاقون - سيلانجور
- 4 ليالي في هوليدي إن - بيننج
- 4 ليالي في لنكاوي لاقون - لنكاوي
- ليلتين في منتجع أفاموسا (الله لايعيده ) :112:
- 7 ليالي في فندق رينسانس - كوالالمبور
وأفاموسا يالإخواني هذي حكايتها حكاية .......
بإعتبار أني مغرم بالطيران .... وسمعت أن في هذا المنتجع طيران شراعي .... بحوالي (100 رينجت ) قررت أني أسأل عنه ..... لكن ماحصلت معلومات كفاية عنه ... سواء عن طريق تجارب الاعضاء أو عن طريق بعض الاقارب اللي عندهم خبرة ....... كل اللي قرأته كان دون تجربة ... بأنه رائع وفيه أنشطة وعروض و ..... ولمن سألت عن سعر الغرف فيه قال لي المكتب بحوالي 240 رينجت :shocking: ...... بصراحة السعر كان مفاجأة ... وقررت للأسف حجز ليلتين فيه ..... خصوصا وان دعايات المنتجع مغرقة الدنيا .
طبعا نزلت الى مطار كوالالمبور ... وأخذت تاكسي الى أفاموسا ب180 رينجت ...... وبأعتبار ان المنتجع خارج البلد ...
- وقفت في قرية قريبة من أفاموسا ... وطلبت من بيتزاهت ..... وسألت الموضف عن توصيل الطلبات ... فقال لي نوصل بس مانقدر نوصل لأفاموسا ...... طيب معقولة ماتوصلون لفنادق .....
- وصلت الى المنتجع ..... ونزلت الشنط لأني ماحصلت أحد ينزلهم لي .
- لمن دخلت الرسيبشن .. لقيت طابور طوييل .... والدنيا حوسة تقول كأنك ببقالة . حاولت بس أستفسر غرفتي في أي مبني , ويرد على بنفس شينة .. أوقف في الطابور بعدين أجاوبك
- سويت الشيك إن ... طيب وين اللي ينقل العفش ؟؟؟؟ مافيه ومرة ثانية أشيل العفش الى الغرفة .
- الغرفة اللهم ياكافي قذرة ... مافيها صندوق أمانات ... قفل البلكونة مكسور .... تطل على مكان مبنى تحت الانشاء .
- كلمت الريسبشن وقالو لي عندهم صندوق أمانات تحت .... طبعا حطيت فلوسي والجوازات فيه ... وتخيل كل مرة دور لك موضف يطلع نعاك ويفتح كذا باب .. علشان تفتح صندوقك وتاخذ اللي تبي وترجع الباقي .
إرتحت شوي وقلت .. يالله دامها برخيص شبتطلع !! .....
- توجهت للوتر وورلد - الحديقة المائية - ... حديقة متهالكة .... تصدقون حتى الالعاب الخطرة مافي عليها حارس !!!!! بركها قديمة والعابها أقدم ....
- طلعت وقلت بدخل السينما اللي عندهم ... ولمن سألت قالو السينما داخل مدينة الكاوبوي ... علشان تدخل مدينة الكاوبوي حوالي 50 رينجت لمشاهدة العروض أو 60 رينجت للعروض + الالعاب ......
- دخلت بعد ماأخذت البكج تبع بو 60 .... انا والمدام .. ودخلنا الى عرض الهنود الحمر ..... فكرت عندهم سالفة طلع العرض عبارة عن 3 هنود بنفخون في النار (يحط في ثمه بنزين وينفخ على النار ) وبس .
- خلص عرضهم الماصخ .... وتوجهت الى عرض الكاوبوي ...... مافيه زود ,,, كأنك جالس في دعاية للمنتجع ... وفي الختام شوية طراطيع على العاب نارية ...... (هذي بلعناها )
- خلال العرض تدخل راقصات بلباس الرقص العربي .... وهز وسط ..... تخيل الاحراج بجانب المدام ( كان بنام ذاك اليوم على الرصيف :biggrin: .... وتخيل إحراج اناس اللي معاهم أطفالهم .....
- توجهنا بعدها للألعاب ...... إكتشفت أن العابها للأطفال الا ماندر ... ومافيها شي مميز .. وقليلة .... وأحلى شي اللي أهو التصويب ... بفلوس
- بعدها توجهت للسينما ... الا عروضهم مخلصة ... وطبعا إدفع لتدخل
- بغيت أصور بجانب الافعى أو الببغاء أو النمر .... .... ممنووع . لازم تدفع 11 رينقت علشان يصورونك ويعطونك الصورة ... ونفسهم الله بالخير شينة كأنك تشحت من عندهم
- رجعت الفندق ..... وإكتشفت إختفاء جوالي اللي كنت تركته في جيب البنطلون ... وقلبت الغرفة فوق تحت ماحصلته وعندي شك 90% أن أحد سرقة من داخل الغرفة لكن بما أن الجوال رخيص - متخذ إحتياط - وعلشان ال10% قلت حرام أحد ينظلم .... عند ربك ماتضيع
- طلعت ثاني يوم للفطور ... قالو لي توجه لقرية الكاوبوي .... فطورهم الله يكرم النعمة أهوه والقلة واحد ..... المكان قذر , في مسرح كأنك في مدرسة .
- وأنا طالع من بعد الفطور سألت عن الطيران الشراعي قالو لي ب180 رينجت والوزن لازم 75 كجم أو أقل
عرض السفاري :
- عرض الفيلة مالحقت عليه من الاول بس لحقت على الفيلة وهي تسوي مساج .... وفيها كمن منظر ماودي أقولها
- التوير بقرب الفيلة ممنوع الا إذا إشتريت رسمة من اللي رسمهم الفيل -(نصب عيني عينك ) -
- عرض الحيوانات ....... مقبول نوعا ما ... ولو انه دون المستوى
- نفس الحكاية في التصوير مع الطيور ....
- دخلنا السفاري .... السواق مستعجل حده مدري شوراه ... واللي يعلق نص نايم ..... والحيوانات ماقيه ذاك الزود ...
- عرض الحيوانات لا جديد .....
- عرض الكاوبوي قالو لنا أنه أحسن عرض ... وأنتضرنا في الحر ساعة ونص ... للأسف طلع عرض إستهبال وقلة حيا .... قصتهم إثنين كاوبوي يتصارعون على هندية حمرا ... وتمثيلهم بوس ومحاولة إعتداء وطبعا نص الجماهير ... أطفال
- طبعا أنا وصلت عندي لين ال H وقررت أصل في الغرفة أرتاح لين ثاني يوم الصباح علشان آخذ تاكسي واتوكل على الله ..... قبل لاأدخل الغرفة سألت الرسيبشن عن التاكسي .. قال لي 350 رينجت بينما يوم أتصلت على صاحبنا راعي التاكسي اللي جابني قال لي ب220 رينجت
طبعا حمدت الله الف مرة على مرور هذين اليومين العصيبين ..... واللي أهم من أسوأ أيام السفرة ... وأقسمت ماعاد أطب هذا المنتجع ,,, وأنصح العير بعدم الذهاب اليه ....
طبعا هذا عن تجربة شخصية ورأي شخصي .... أحد الاقارب أيضا إستأجر فلة ... ويقول لي الوضع هناك سيئ جدا ... والمنتجع قذر .... .
- المنتجع مستهلك جدا ..... وينقصه الفخامة والنضافة .
- أسعار المنتجع مبالغ فيها جدا.
- أسوأ شي وقت تحس أنهم يبون يبتزونك بأي صورة .
هذي النصيحة الاخوية لكم إخواني ....... أتمنى أن لاتقعو في تجربة مثل هذي التجربة ولا تغركم الاعلانات ... وأتمنى لكم رحلة موفقة .... .
ووسع صدرك , الدنيا تجارب .