Faisal Amreeka
04-12-2022 - 01:43 pm
السلام عليكم و رحمه الله و بركاته
اول مشاركه لي ف المنتدى اللي افادني وايد ..
تقرير رحلتي ف اوروبا ف شتا 2011.
التقرير بيكون صور اكثر عن كلام .. اسمحولي ناسي اسعار وايد اشيا لاني ما كنت مفكر انزل تقرير.
خلوني ابدا
الخطوط الناقله
طيران الاتحاد.
اخترت طيران الاتحاد لانه يطير من بوظبي. ويبعد عن بيتنا 10 دقايق.
مسار الرحله كان : بوظبي - ميونخ - باريس - بوظبي.
سعر التذكره ل 4 اشخاص : 16000 درهم.
الشخص ب 4000 درهم. اعتقد السعر كان جيد لان حجزنا قبل السفر ب اسبوع. ما كنا مخططين للسفر.
المسافرين : انا ، و اخوي ، و خواتي الثنتين.
الفيزا : كنا مسوينها قبل سنه من السفر، لاننا كنا بنسير المانيا و عقب استوت ظروف. و هذا كان سبب دخولنا اوروبا من المانيا. ولا نحن ما كنا نبا نروح المانيا.
المدن اللي زرناها : ميونخ ليلتين - لوزيرن 3 ليالي - جنيف 3 ليالي - ديزني 3 ليالي - باريس 3 ليالي.
السفر كان من تاريخ 17 ديسمبر 2011 - و الرجعه 31 ديسمبر 2011
سبب الرحله : التسوق و شوفه اوروبا ف الشتا
اعذروني عالاغلاط ف الكلام .. كيبوردي انجليزي
.
.
.
.
ترقبو الجزء الاول
.
.
جيكنا ع شنطنا و التذاكر و الجوازات. و انتبهنا ان بنوصل المانيا الساعه 6 الفير.
و اكيد كلكم تدرون ان الجيك ان الساعه 2 او 3. قررنا ان يوم نوصل نكلم الفندق ان نبا نحجز الليله اللي قبلها عشان نقدر نرقد اول ما نوصل.
وصلنا مطار بوظبي الدولي الساعه 1 و ربع. وقت الاقلاع كان الساعه 2 و 10 بعد منتصف الليل.
ركبنا الطياره و عطونا 4 كراسي عدال بعض . و الرحله كانت متعبه لان الكابتن الصراحه ما يعرف يسوق. كنا راقدين و فجآه يسوي فينا تشقلبات ههه
.
.
وصلنا مطار ميونخ الساعه 6 الفير. خلصنا ختم الجوازات بكل سهوله و سلاسه و شلينا شنطنا و ركبنا تكسي ميني فان .
حبيت انوه ع نقطه : انا كنت مفكر احجز سياره ب سايق عشان يوصلونا من المطار للفندق ، كان السعر 140 يورو، بس ما حجزت لان السعر كان غالي .
سعر التكسي لين الفندق 60 يورو تقريبا.
كان حجزنا في فندق Hotel Regent
حجزنا غرفتين - ليلتين ب سعر 420 يورو.
احلى مافي الفندق مكانه .. مشي لين المارين بلاتز اقل من 10 دقائق
و محطه القطار مقابله الفندق.
وصلنا الفندق و قلنا لهم ان نبا غرفه ع اساس ان الجك ان اليوم اللي قبله ، قالو ان ما عندهم اي غرف فاضيه. و نحن كنا تعبانين.
حطينا الشنط عندهم و ركبنا تكسي و قلنا له يودينا المارينبلاتز نتريق
بعض الصور من اللوبي
وصلنا عند مكان قريب من المارين ، فيه سوق السبت يبيعون فيه خضار و فواكه و خبز وايد حلو .
بعض الصور من الساحه ، ماعرف شو اسمها
هذا ريوقنا
شوفو التفاح عجيب .
تمينا نمشي لين ما وصلنا المارين . نحن خذنا تكسي لان ما كنا ندري ان المارين قريب.
درجه الحراره كانت تحت الصفر. ههه كانا ندخل المحلات عشان نحس ب دفا
انصح الشباب يروحون هالمحل Hirmer
محل رجالي 3 طوابق و عندهم تشكيله متنوعه
هالمحل كله عطورات و عندهم اشيا حصريه بس ف المانيا و سويسرا و اعتقد النمسا
Douglas
و طبعا ال department store الغني عن التعريف
oberpollinger
كله عندهم ماركات نفس : لوي فويتون ، ديور و فندي
تسوقنا في هالمحل لين الساعه 2 الظهر .. التاكس فري اوفس ف طابق المفروشات
و تغدينا هناك ف اخر طابق شي بوفيه ، الاكل وايد شهي انصحكم فيه
بعد ما خلصنا ردينا الفندق و غرفتنا كانت جاهزه و غطنا في سبات عميق ..
انتهى -