مرحبا اخوي
امريكا بلد رائع للدراسه
لكن فيه صعوبه من ناحية القبول
لذلك راح اذكرلك شتسوي
---
اولا تدرس خريطة
امريكا وتقرا عنها وتعرف ولاياتها وتعرف المدن داخل الولايه الواحدة
لان
امريكا قارة ( ولاية تكساس اكبر من
بريطانيا العظمى بمرتين وولاية
كاليفورنيا اكبر من
اليابان بشي بسيط )
هذي ولايتين فقط فما بالك بالباقي؟
وكل ولايه تضم مدن كثيره منها الكبير ومنها المتوسط ومنها الصغير
فـ لو تقول رشحولي مدينه كأنك تقول انا بدرس في الشرق الاوسط ورشحولي مدينه
او بدرس في قارة
اوروبا ورشحولي مدينه !!
عشان جذي ولاعليك امر تصفح هالموضوع
https://travel.maktoob.com/vb/travel687479/
صحيح انه سياحي لكن يعطيك اساس للامر
كذلك اقرا في ويكبيديا عن الولايات المتحدة
عن كل ولايه والمدن الي فيها
وابحث عن كل مدينه في قوقل
بتطلع لك قائمه بمنتديات سواء في
العرب المسافرون او منتديات اخرى
الهدف منه هو زيادة معرفة لك عن الولايات ويسهل عليك الاختيار
هذا مايخص اختيار الموقع
---
افضل معاهد للغه هي التابعه للجامعات
الطاقم في غالبه حاصل على ماجستير ودكتوراه بتدريس اللغه الانجليزيه + طرق التدريس متقدمه ومبتكره + تقييم لعملهم مستمر
هذا بعض المعاهد يعني مب كلها
لان في معاهد يكون مستواها اقل وماعندها المواصفات اللي قلتلك عنها
عموما
هذا موقع لجهه رسميه تعترف بمعاهد الجامعات واغلبها قوي الى قوي جداً
UCIEP: Best accredited English language study in the US
انت من خلال بحثك عن الولايات والمدن تشوف احتياجاتك
تبي بارده ، حاره ، غاليه ، رخيصه ، المواصلات باصات وقطارات او سياره خاصه فيك
الديره قاره فيها كل اللي تبي
ومثل ماقلتلك من كبر حجم الدوله صعبه نرشحلك والسبب مايصير نختار ديرة مب جايه على بالك
تحدد الولايه وان اشاء نساعدك بالامر
----
بخصوص القبول الجامعي
اصعب قبول هو بالجامعات الامريكيه
طلباتهم كثيرة
والسبب ان دول الخليج تعترف بجامعات معينه لها شروط وعليها منافسه
فـ تلقى هم الطالب انه يلقى قبول
يمكن تقرا ان الطلاب يبحثون عن قبول مشروط
وهو انك تستحصل على قبول للماستر بشرط انك تنهي اخر مستوى بالمعهد
وهذا الامر صعب جداً .. ممكن كان بالسابق لكن الان صعب ولايُعتد عليه
المهم
اعطيك البنود العريضه اللي تطلبها الجامعات الامريكيه
١- معدل للبكالوريوس يكون من ٣ فما فوق من ٤
(( عندكم في السعوديه النظام من ٥ ، يعني لازم تعادل شهادتك ))
وهذا يكون عن طريق شركه اسمها
World Education Services - International Education Intelligence
ترسل لهم افادة التخرج الاصليه مع كشف الدرجات بظرف خاص بالجامعه ومغلق من الجامعه
تدفع الرسوم وترسل لهم
حسب ماهو مذكور بموقعهم
يقومون بمعادلة الشهادة الى ٤
الحلو فيها ان اي رسوب باي مادة يشيلونه من المعدل
فـ يرتفع معدلك
٢- رسائل توصيه من دكاترة القسم اللي درست فيه يثنون عليك ويرشحونك لدراسة الماستر
بواقع رسالتين الى ثلاث رسائل
واذا تعمل اخد رسالة توصيه من مسؤول العمل عشان يزيد فرص قبولك
٣- درجة التوفل تكون مب اقل من ٥٥٠ الى ٥٧٠ او ايلس ( امتحان اللغه البريطاني ) من ٦ ونص الى ٧
٤- درجة امتحان الجيمات وهو امتحان خاص بالتخصصات الاداريه وهو امتحان مب سهل يبيله دراسه وجهد مايقل عن ٣ شهور وله معاهد خاصه فيه
٥- رساله منك باللغة الانجليزيه موجهه الى الكليه اللي بتدرس فيها تبين لهم ليش بتدرس التخصص وليش بالذات بهالجامعه
وهذا امره سهل
----
مثل ماقلت ان القبول يبيله تعب تجهيز اوراق
لكنه مب صعب وتقدر بإذن الله تنجزه
----
تمنياتي لك التوفيق
