الكويت المسافرون العرب

أكتشف العالم بين يديك المسافرون العرب أكبر موقع سياحي في الخليج و الوطن العربي ، يحتوى على أكبر محتوى سياحي 350 ألف استفسار و نصائح عن السفر و السياحة, 50 ألف تقرير سياحي للمسافرون العرب حول العالم و أكثر من 50 ألف من الاماكن السياحية و انشطة وفعاليات سياحية ومراكز تسوق وفنادق، المسافرون العرب هو دليل المسافر العربي قبل السفر و اثناء الرحلة. artravelers.com ..
توبليرون
12-12-2022 - 08:24 pm
السلام عليكم اخواني وخواتي الاعزاء اعضاء منتدانا الرائع
اول قولو ما شاءالله
في يوم عزيز على قلبنا و لظروف ووجود الوالدة والخالة بالمستشفى وبعد رجوعي من المستشفى
قررنا نروح نتعشى ولتغيير جو بس المهم طلعنا باتجاه الفنطاس وقلنا نقرر اي مطعم نتعشى بالطريق
ولان ابو العيال يفضل المطاعم العربية وعند تقاطع المجمعات في العقيلة شفت لوحة على السوق لمطعم تنورين
فقلت لابوحسين اشرايك نشوف المطعم اذا نظيف بنقعد وقفنا بالمواقف
هذه المواقف من الامام احنا وقفنا بالخلف بعدين اقول لكم ليش انا مصورة هني

ونزلنل ودخلنا من جهة السوق ولما صعدنا للمطعم والا ريحة شيشة قلت لا ريحة شيشة ما احبها ولا يقول الجرسون تعالوا في قسم للعوائل
واعتقد بعد في كباين المهم لقينا المطعم فاضي جهة العوائل قلت لابو حسين اشرايك نطلب قال نطلب
وطلبنا والحمدلله كان وصول الطلبات سريع وخدمة حلوة
خل نشوف الصور ونشوف شنو طلباتنا
المقبلات وصلت

ورق العنب والحمص

خيار وطماط وزيتون وجزر ومخلل

الخبز الساخن

طبق الخشخاش لابو العيال

وطبقي عرايس بالجبنه

كتشب ومايونيز
طبقي مع سيد سيدهم البيبسي

جانب من الجلسات علشان تشوفون المكان

وهذا حاجز من الحواجز الموجودة بالمطعم

المهم الأكل كان جدا لذيذ وفريش طازج
واعطيه 10 على 10 .........يمكن لاننا كنا جواعه حييل ومن زمان مو طالعين عجبني المطعم
بس لولا الشيشة مع ان ما شمينا ريحتها واحنا بمكانا ابداا
السعر طلع تقريبا 13 دينار
لحظة ما خلصت .........
الحين نبي نطلع من المطعم نزلنا من نفس المصعد اللي صعدنا فيه
نزلنا على السوق والا كل الانوار والمحلات مسكرة ولا محل فاتح
رحنا جهة الباب والا الباب ما يفتح مقفول ....رحنا الباب الثاني بابا صغير تحت درج راح ابو العيال شافه لقاه نفس الشي مقفول
لفينا يمين شمال ما في ابواب
قررنا نصعد المصعد ونرجع المطعم لان فيه العمال وبعض الناس
صعدنا المصعد والا بعد ضغطة الزر الا يوقف المصعد فينا
بس الحمدلله اشتغل بسرعه وصعدنا وسالنا هناك عن باب الخروج والا ياخذنا العامل لمصعد اخر خاص بالمطعم
طلعنا منه للجهة الثانية من السوق وطلعنا نبي نرجع لسيارتنا بالخلف والا ما في بابا من العمارة والا العمارات الثانية يفتح للجهة الثانية ولا ممر
يعني لازم تلف العمارات كلها وتروح لسيارتك
وطبعا ام الحلوين عندها لياقة كبيرة..........قلت له ما اقدر امشي تعبانه اصلا قال اوقفي هني وانا رايح
وانا وقفت والمواقف ما فيها احد وايد يعني الا من بعض العمال والبائعين ينظفون محلاتهم
وانا اصور يعني اعتقد الريايل بيقولون اشفيها هذه بنص الليل واقفة بهالمكان وتصور خ
ان بعض الظن اثم يا جماعة
المهم هذه الصور لمواقف البيرق الخلفية امام مطعم تنورين والاسواق الشعبية

وهذه تجربة حلوة لي ولابو العيال والحمدلله على كل سنة قضيناها مع بعض على الحلوة والحلوة ان شاءالله مافي مر
يعطيكم العافية وان شاءالله



التعليقات (8)
بوحميـــــــــد
بوحميـــــــــد
ماشاء الله تبارك الله
عليكم بالعافيه
وربي يسعدكم دنيا وآخره ياام يوسف

Usas
Usas
خوش مطعم , بس اللي يغث موضوع ان بعض المطاعم تسمح بالشيشة داخل المطعم الغير مكشوف اساسا
تقبلي تحياتي

توبليرون
توبليرون
بوحميد
مشكور اخوي بوخالد
ويعافيك ربي ويسعدك دوم
اسعدني مرورك العطر

توبليرون
توبليرون
Usas
تسلم اخوي يوسس
والحمدلله كانت الريحة بعيدة عنا ويمكن كانت صوب الشبابيك بالجهة الثانية
اما صوبنا ما شمينا ريحة للشيشة ابد
اسعدني مرورك العطر

ابوحمد.
ابوحمد.
ماشاء الله
الله يعطيج العافيه ام يوسف
وبالعافيه عليكم
الله لايفرقكم

توبليرون
توبليرون
mr.q8
تسلم مشرفنا والله يخلي لك ام العيال
ويرزقكم بر العيال
يشرفني مرورك الكريم

ارمـــ ARMANI ـــاني
ارمـــ ARMANI ـــاني
يعطيك العافيه اختي توبليرون
وهناء وعافيه عليكم
ياسلام على البيبسي
والموقف اللي صار لكم ذكرني ببرنامج ياباني قديم اسم الحصن او الدهليز

انتبهوا من هالاثنين مايخلونكم تطلعون ههه

يارب يشافي والدتك ويحفظها لكم وتفرحون فيها وبسلامتها
وجعل ايامك انتي وبو حسين افراح وسعادته والله يخليكم لبعض ولايفرق بينكم
ومشكورة على احلى تقرير الحين الواحد سهران وجيعان من وين ياكل خ
اخوك : https://artravelers.com

فيصل
فيصل
ماشاءلله تبارك الرحمن
عاد الا اني متعشي واروح ادور لي مخرج


خصم يصل إلى 25%