- ببدأ تقريري بلوسان الجميله
- هذه المدينة الساحره ببحيرتها الجميله واسواقها ومبانيها الجميله
السلام عليكم يا جميلين
اشلونكم
راح اكتب لكم في هالتقرير مقتطفات من سويسرا وركزت على الاماكن الجديده فقط الي ماكتبت عنها من قبل و راح يكون التركيز على قرية بادراكاز الرائعة ..
ببدأ تقريري بلوسان الجميله
هذه المدينة الساحره ببحيرتها الجميله واسواقها ومبانيها الجميله
سكنت في فندق الموفنبيك وبالنسبه لي هو الخيار رقم 1 في لوسان حيث موقعه الرائع جدام البحيره وبجانب المترو وكلكم عارفين اني اعتمد في تنقلاتي على المواصلات العامه فبالنسبه لي وجوده بجانب الميترو ميزه جدا جدا رائعه هذا اضافتاً الى الخدمه الرائعه والغرف الجميله والمريحه والواسعه للاسف ماصورت وايد في لوسان نفسها بعتبار اني كتبت عنها من قبل بس حتى قبل ماصورت فيها عدل .. كل مااملك من صور راح اعرضه عليكم ...
يومنا اليوم جميل والجو رائع والسماء مغيمة اول شي سويناه قمنا من النوم وتمشينا عالبحيره وتناولنا الفطور في الكوفي شوب الموجود عالبحيره واطعمنا البط
بعد ما اصطبحنا عالبحيره .. ركبنا المترو الى محطة القطار وقصينا السويس باس وكانت وجهتنا الى بحيرة سانت ليونارد والي يميز هالبحيره انها احد اكبر البحيرات الموجوده تحت الارض في العالم
وهاي هي المحطه المطلوبه
وهاي خط الرحله انطلاقاً من لوسان ومدة الرحلة ساعة ونص
وصلنا لسانت ليونارد
واول ماتطلعون من محطة القطار تلقون خريطه كبيره للمكان زائد لوحات ارشاديه للوصول الى البحيره والتي كانت تعتبر قديما بحيره مقدسه
رحنا مشي للبحيره ومرينا بالبيوت وعبرنا الشارع و المكان كله حقول عنب للخمر حتى في البيوت زارعين عنب وشجر تفاح وورود القريه جدا جميل
كان شكل العنب والتفاح في حدائق البيوت وفي البساتين جدا جدا مغري كنا كلنا في خاطرنا نذوق منه بس قلنا مايجوز ناخذ بدون استإذان ومسوين فيها مؤدبين شوي الا اسمع امي تقول الله حلو شيره لفينا عليها الا انشوفها ماسكه عنقود عنب اسود وتاكله كلنا هجمنا عليها وخلصنا العنب وكان طعمه صج حلوو وشيره
وكملنا مشينا واحنا مستمتعين بالاجواء الجميله والطبيعه الرائعة حولنا
والبيوت كلها مجمله بهالبساتين
هاي لافته ثانيه تبين لنا مكان البحيره
تقريبا وصلنا لمدخل البحيره
وللوصول لمدخل البحيره لازم نصعد شوي مرتفع بسيط مب متعب
شوفو تحتنا بساتين العنب وسألنا اذا فيه بستان يسمح لنا صاحبه ان احنا ندخل برسوم ونقطف عنب وتفاح بس قالو لنا ان اصحاب هالبساتين مايرضون وان هالبساتين غير متاحه للناس وهي فقط لزراعة عنب الخمر
وهاي مدخل البحيره
استغرق المشي من محطة القطار الى مدخل البحيره بين 10 الى 15 دقيقه مب متذكره بالضبط كم ..
وهلا وسهلا
يوجد بالداخل مقهى صغير وسوبرماركت لبيع الوجبات الخفيفه والهدايه مثل الكشك و كراسي
وهاي هو السلم الي ياخذنا للبحيره
وهاي الاسعار والدخول يكون بمرافقة مرشد هو نفسه سواق المركب الي بياخذنا لفه لمدة 30 دقيقه على البحيره الموجوده تحت الارض
وحان موعد الجوله وحظر المرشد و قالنا تفضلو انزلو للبحيره ونزلنا والمركب الي على اليمين هو الي ركبناه احنا ومجموعه من السياحه كانو ينتظرون معانا
المكان للاسف مايصلح لذوي الاحتياجات الخاصه لان النزول للبحيره والصعود يكون بالسلم فراح يكون صعب عليهم ان شاء الله في المستقبل يسون لهم ممر او لفت خاص
وبدأنا الدخول والابحار تحت الارض وكل مادخلنا يصير المكان ابرد كانت درجة الحراره خارج البحيره يمكن 22 ولين نزلنا تحت بالسلم صارت يمكن 18 و كل شوي يصير المكان ابرد وحسب ماقال المرشد ان الحراره نزلت تحت ال 15 درجة
كل مادخلنا داخل زاد المكان رهبتاً و غموضاً والغريب في الموضوع انه في سمج في البحيره والماء تحسونه نقي جدا وشفاف لدرجة ان برغم الظلام الا ان السمك يبين تحت الماء .. وللعلم البحيره عميقه اكثر من 5 امتار
يوجد مركب غارق في البحيره والسباحه والغوص ممنوع بشده في البحيره والسبب وجود تماسيح
حطيت يدي في الماي وكان الماي بارد جدا وتحسونه نظييف
ومن اجل الامان تم تثبيت سقف المغاره بدعامات عشان حتى لو صار زلزال مايتهدم الكهف و هم يشكون ان تحت هالبحيره وبجانبها بحيرات اخرى تحت الارض و في اوقات من السنه لين يرتفع منسوب المياه تصير الزياره ممنوعه
وبهذا انتهت رحلتنا في البحيره الجميله والغامضه والي تعتبر اكبر بحيره تحت الارض في اوربا .. المكان بالداخل فيه رهبه وغموض .
زيارة البحيره كانت جميله و عجبني المكان وبالنسبه لنا عشان تجربه جميله . بالنسبه للرأي العام اختلفت الاراء في اراء كانت تشجع السياح على زيارة البحيره و في اراء اخرى تقول اذا كانت في طريقكم روحوها بس لاتتعنون ...
انا اترك لكم حرية الاختيار انكم تروحون او لاء
وللمزيد من المعلومات هاي الويب سايت مالهم
http://www.lac-souterrain.com/index_eng.html
ويشرفني اكون اول حد يرد على التقرير ويالبيه على لوزان خيار موفق انكم سكنتو فيها اما البحيره احس اتجيب الضيقه اخاف انا من هالسوالف غموض وقصه واصير فيها كونان ويطلع لي شي بسم الله
متابعه معاج يااحلى عش عش