Almatrodi
19-10-2022 - 01:38 am
أول شيء قبل ما أذكر التنبيه
أبي أقول لكم سياسة هالشركة الغريبة في الأسعار
أنا كنت حاجز قبل رمضان بفترة رحلة مباشرة من الرياض لنيويورك
والسعر 3700 ريال
مع نهاية شهر شوال صار فيه تغيير من عندهم
ألغوا رحلة الرياض وحولوها من جدة
وقالوا لي تبي المبلغ نرجعه لك ونكنسل الحجز
شيكت على الأسعار ولقيتها أغلى من السعر اللي اشتريت فيه
قلت لهم لا وخلونا على قردنا لا يجينا اللي أقرد منه
المهم قبل الرحلة بحوالي يومين أشيك على الأسعار
وأحصل نفس رحلتي ب 2788 ريال!!!!!!!!!!!!
وش هالسياسة الغريبة
واحد يشتري منك تذكرة قبل عدة أشهر يدفع أكثر
واحد يشتري تذكرة قبل الرحلة بكم يوم يدفع أقل
بالنسبة لي لاتعليق
هي كما هي حفظها الله كما عودتنا
المهم نجي للتحذير والتنبيه
عند التشييك على العفش في مطار الرياض طلبت استلامه في نيويورك
قال لي تم ووراني التاق حقه
على قولة إخواننا المصريين حطيت في بطني بطيخة صيفي
وقال لي البوردينق من جدة
قلت له تم
وصلت جدة وطلعت الصالة اللي فوق حقت المغادرة
ويجيني اتصال من جدة!!!!
أرد على الجوال وإذا الخطوط يقولون ترى شنطتك عندنا تحت ما استلمتها
كيف؟؟؟؟؟؟؟؟؟؟؟؟؟؟؟؟؟؟؟
رحت والله وأحصل شنطتي
بعد نقاش لقيت إنه في الأخير عقيم
أخذت الشنطة وطلعت لفوق وقصيت البوردينق وشحنت الشنطة
على طول بعدها رحت للصالة الدولية
ختمت الجواز
ورحت للتفتيش وبعد ما خلصت
تتوقعون إيش
يجيني اتصال ثاني
آلو.... تعال خذ شنطتك
ههه
قسم بالله توقعتها مزحة
رجعت والله لصالة القادمين الداخلية
والعسكري يقول لي أنت تلعب علي
لأنك قبل شوي آخذ شنطتك!
قلت له خلني أشوف
رحت والله وأحصل شنطتي عندهم
خير إن شاء الله يا ولد!!!!!!!!!!!
قال لي التاق اللي عليها خطأ
ارجعها اشحنها مرة ثالثة
قلت له أبشر طال عمرك
ما فيه شنط ثانية تبي شحن أوديها على طريقي؟
المهم وأنا طالع العكسري يطالع فيني وميت ضحك
أقول له صارت الدعوى مطارد جرابيع
طلعت وشحنت الشنطة مرة ثالثة
ويوم سألت عن السبب قال لي التاق الأول فيه خطأ
لأن ولأن ولأن ولأن ......
قلت له التاق طابعه زميلك قبل شوي
قال لي والله غريبة
وزاد الطين بلة إنه ما قدر يطبع التاق لأنه مسوى عليه هولد لأنه مطبوع
وما عرف كيف يفك الهولد
الحمد لله صار اللي جنبه فاهم وسواها
وانتهت المشكلة
طبعاً أنا ما تاكدت من إني راح أستلمها لين مسكتها في مطار نيويورك
تحياتي لكم جميعاً
وانتظروا تقريري عن شقة أشوفها حلوة بالنسبة لسعرها
والخطأ وارد سواء من شركة الطيران او من المطارات بكل العالم