بومنوة
08-12-2022 - 01:15 am
شكراً لهذا المنتدى المفيد
وشكر خاص جداً للأخ وافي بزمن جافي على ما قدمه من فائدة لي ولجميع اعضاء هذا المنتدى العريق
انا حاليا بجزيرة لنكاوي وتحديدا فندق لنكاوي لاقون في اللوبي عشان خدمة الانترنت موجودة مجانا في اللوبي فقط
للحين ما خلصنا من الرحلة باقي لنا يومين في لنكاوي وخمسة أيام بكوالالمبور
قعدنا ليلتين في سلنقور في الفندق الروعة صن واي ريزوت وكانت الغرفة مطلة على الملاهي
وحالياً قضينا ليلتين بلنكاوي وباقي لنا ليلتين .. الفندق حلو واكلهم طيب وفيه بعض الوزغ في بعض الممرات .. لكن داخل غرف الفندق مافيه ..
لقيت اخ من السعودية عنده مشكلة ومايعرف يتكلم انجليزي .. الاخ شرح لي مشكلته
وقال انه حاجز له فيلا الا انه ما عجبته وماعجبت زوجته لانها فيها وزغ ويقول حسب كلامه ان الوزغ يدخلون داخل الغرفة!!
ف طلب تحويله الى غرف الفندق وتم تحويله .. الا ان هناك فرق في السعر تقريبا رنجت على الليلة الواحدة.. وما يدري هل بيرجعون له الفرقيه او لا .. ف كلمت الريسبشن وكان معاي واحد ماليزي يتكلم عربي وساعدنا في الكلام .. وبلغونا الريسبشن بأن المدير راح يجي بعد اشوي وكلموه في السالفة .. وبعدها مشيت انا ..
المهم رحنا وايد اماكن سياحية .. بس بذكر لكم رحلات لنكاوي لانها رحلات رهيبة ..
اول يوم رحنا عالم تحت الماء .. وبعدها حديقة الفواكه الجميلة اللي ما توقعته بهالجمال .. وبعدها التلفريك الفضيع .. وبعدها شلالات الآبار السبعة الخيال
هذا اليوم جدا جدا جدا استانسنا وزوجتي وايد استانست ولو انه تعب اشوي .. لكن الوناسة غطت على كل شي ..
وانصح بزيارة الآبار السبعة لان طبيعتها شي خيال .. لدرجة اني صورت صور وما صدقت ان هذا طبيعي ههه
ثاني يوم اللي اهو اليوم المانغروف رحلة جميلة ومخيفة في نفس الوقت .. القارب كان ممتاز ويمشي بشويش عشان الاطفال اللي معانا.. فيها مناظر طبيعية روعة وخاصة البحر المفتوح يا الله
شي خلاب وخيالي .. وبالعكس رحلة المانغروف مافيها تعب نهائيا .. بس يجيك خوف غير طبيعي لما تدخل عند كهف الخفافيش ..
عموما ما اطول عليكم .. حبيت اقولكم رايي في هذا البلد العجيب ذو الطبيعة الخلابة والخيالية ..
بلد نظيف ونظامي .. شعب طيب جدا .. اكل طيب وما تتوهق مع الاكل نهائيا .. واسعاره معتدله
اكرر شكري الجزيل للاخ وافي بزمن جافي واقوله تراني ماشي على البرنامج اللي سويته لي واضفت له بعض التعديلات .. واشكر ادارة هذا المنتدى الرهيب والمفيد للمسافر العربي .. واشكر كل من افادني
اخوكم: بومنوة
الحمد لله على سلامة الوصول الى ماليزيا
و شكرا لك على اللفتة الكريمة اتجاه هذا المنتدى و مشمول شكرك الى خبيرنا الغالى وافى ( بوهلا )
الذى يستحق منا كل التقدير له و الثناء
لى تجربة فى الاقامة فى المنتجع الهادئ الجميل
هناك معطم شامى داخل محيط سور المنتجع و له قائمة طعام ( المانيو ) موجودة داخل الغرف ( اتصل نصل ) !
الحقيقة انا شفت ضيف صغير دخل علينا من فتحة المكيف و حاولت اكرمه لكن ما عطانى الفرصة هرب من حيث دخل !
حدثنا عن نوع الغرفة و هل كانت مناسب لعددكم
اتمنى اقامة سعيدة فى ربوع ماليزيا
اخوك الاسفار ( بوعبدالله )