- مدة السفرة اسبوعن من 26-8 الى 8-9
- يعني رحلة الله يعينا عليها
بسم الله الرحمن الرحيم
بداية احب اشكر هذا المنتدى الرائع بكافة اعضائه على المواضيع المميزه والمعلومات الوفيرة اللي كان لها كل الفضل بعد الله بكثير من المعلومات اللي استفدنا منها
مدة السفرة اسبوعن من 26-8 الى 8-9
كل سنة كنت اسافر لندن ولندن ومافي غير لندن بس انا احب لندن بالشتا اكثر من الصيف وكان التفكير هم في لندن بس قلت بغير واروح لمعشوقتي ليفربول اللي انا وبلا فخر احد اقدم المشجعين لزعيم انجلترا والمشكلة ما تقدر تروح ليفربول الا عن طريق العدو اللدود مانشستر
حجزت في بداية الصيف 5 تذاكر 2 كبار انا وام العيال الغالية واولادي الثلاث 10 سنين و8 و 3
يعني رحلة الله يعينا عليها
تم اختيار الخطوط الجوية القطرية لسمعتها الرائعة واسعارها المعقولة وترانزيتها مو طويل والحمدلله حصلت سعر زين لاني حجزت بدري من بداية الصيف وبالنسبة للفنادق راح نذكر ان شاءالله كل منطقة والفندق اللي سكناه وكانت كلها شقق فندقية بوسط السنتر
سبق اني زرت ليفربول ومانشستر بزياره سريعه لان ولدي الكبير يلعب في احدى الاكادميات بالكويت وكانت لنا رحلة بسنة 2011 لهالمناطق وزرناها زيارة سريعه وكنا نسكن بالريف فلم اتمتع بما شاهدته لضيق الوقت مع الوعد بالعودة يوما ما والحمدلله تحقق الحلم وعدنا والعود احمد
جا وقت السفر
تاريخ 25-8 مساءا الكل نايم والساعه وحده مساءا رن جرس المنبه والكل قام ولا كانه كان نايم سبحان الله ياريت هالنشاط نشوفه ايام الدوامات
كنت مواعد ولد اختي ضاري على شان يوصلنا للمطار والحمدلله جا عالوقت وسيارته كانت كبيرة وتشيل الخمس شنط اللي
توجهنا لمطار الكويت الدولي الحلو والصغير والمتواضع شلون مادري احب هالمطار بس زحمته لا تطاق خاصة بالمواقف
وصلنا للكاونتر واللي كان كل اللي رايحين للدوحة ترانزيت يعني محد رايح الدوحة وكانت طيارتنا الساعه خمس واربعين دقيقة والترانزيت 45 دقيقة فقط وكنت خايف ما الحق مثل ماصار معاي مره من المرات
استلمنا البوردينج وكنت حاجز الاماكن روحه ورده بكل الرحلات ومختار افضل الاماكن وهذي ميزه كبيرة بالقطرية ومجانا عكس البريتيش اللي لازم تدفع اذا بتختار مكانك الله يعز قطر والخليج كله
توجهنا الى صالة اللؤلؤة قبل لا نركب الطيارة وكلينا وجبة خفيفة ودخلت صالة التدخين اودع الزقاير لين نوصل مانشستر يعني بعد تقريبا 9 ساعات
ركبنا الطيارة العنابية متجهين الى دوحة الجميع ومنها الى مانشستر بحفظ الرحمن ورعايته وكانت طيارة صغيرة لقرب المسافة بين الكويت والدوحة بس الاهم انها نظيفة وخدمتها روعة وتطير على وقتها
واراكم على خير في الجزء الثاني
في امان الله
باين انه تقرير قوي
الى الامام
سجلني من المتابعين