السلام عليكم ورحمة الله وبركاته
مثل ما استفدت من هذا المنتدى وأعضائه الكرام في مجالات كثير
احب تستفيدون من التجربة اللى مريت فيها بس ما مرت علي
اللي صار كنت في تقسيم وابي ارجع لمنطقة السلطان احمد باخر شهر رمضان1433ه فقلت اخذ تكسي يوصلني
رحت للرصيف اللى قريب من التمثال ولقيت تكاسي مرصوصين ورى بعض وقفت بجمب تكسي وجاني واحد فقلتله ابي اروح السلطان احمد قال اوكي 50 ليره فكاسرته لين وافق 30ليره
تفاجأت انه يركبني في تكسي مو له والتاكسي فيه سواق ولما ركبت انا وزوجتي ورى قالي السواق
معليش اركب اخوي معنا انزله على الطريق وهو نفس الشخص اللى كلمني بالبداية فهمت انا ان اللى كلمني بالبداية يجيب زباين للتاكسي ويركب ببلاش فقلت لراعي التكسي نو بربلم يعني ما عندي مانع يركب اخوك
المهم مشينا لين وصلنا السلطان احمد من جهة الشرق جهة البحر البسفور وقال بنزلكم هنا عشان الزحمة والسلطان احمد قريب انا اعرف المنطقة زين ومشيت فيها اكثر من مره يوم قالي هذا الكلام بديت اشك قلت ما فيه مشكله نزلنا ولما نزلنا نزل اللى راكب قدام ونزل شنطتي من السيارة وحطيت زوجتي على الرصيف قريب مني والشنطة على ظهري طلعت 50 ليره ومتاكد انها خمسين ليره واعطيت السواق من الشباك الامامي للراكب وخويه نازل برى ولما اعطيت السواق المبلغ باسرع من لمح البصر رمى الخمسين ليره على يسارة عند حزام الامان حق السواق وطلع لي ورقة فئة خمسة ليره عيني عينك ويقولي ذس سمول مني بالبداية فكرته يردلي 5ليره فقلتله انا اتفقت مع صديقك على 30 ليره قال انت عطيتني خمسه ليره وانا اللى يجن جنوني قلت بصوت عالي انا عطيتك 50ليره وقلتله اطلع من السياره لانه لو طلع طاحت الخمسين بالشارع ولا رحت انا لبابه عشان ما يمديه يخبيها وصارخت عليه طلع من السياره وجاء خويه يقول وش المشكله وانقلب وجه السواق وطلع 20 ليره وعطاني وهو صاغر طلع حرامي ويبي يمشيها علي
بس استغرب من سرعه يده كيف يخبي الفلوس اللى عطيته ويطلع بدالها واللي يعرف الفلوس التركية
فئة الخمسين ليره نفس لون فئة الخمسة ليرة بس يختلف شوي الكبر
هذا اللى صارلي مع سواق التاكسي مع اني اتحشى ركوب التكاسي لغلائها ولكن اظطريت وبحاول ارفق لكم صورة للفلوس التركية فئة خمسين ليره وخمسة ليره
فهذي تجربه تستفيدون منها سواء لتركيا او غيرها
واعتقد اسبانيا فيها نصب بنفس الطريقة
كفانا الله وإياكم النصابين وشرورهم
وتقبلوا تحياتي واسف على الاطاله
هذه الصورة
