عليكم السلام ورحمة الله وبركاته
استطيع ان افيدك عن مدينة فانكوفر وطبعاً هي أجمل مدينة سياحية في كندا
السكن
عند ارغبة في السكن مع عائلة فهناك اختلاف بين العائلة والأخرى من حيث التعامل حسب مارواه الأخوه الذين سكنوا في الهوم ستاي
وتكلفة السكن مع عائلة 700 دولار لى 850 دولار تختلف حسب الوجبات اليومية والمكان .
السكن وسط لدينة
تكون مجاور للكثير من الخدمات ويتوفر فيها فنادق كثيرة ايجارها اليومي تقريباً 120 دولار مع التكس
حيث يمكن ايجاد شقة لمدة شهر من الطلاب المبتعثين الذين سيسافرون الى السعودية لمدة شهر ويعودون بمبلغ شهري 1000 الى 1300 دولار ربما اقل او اكثر بقليل والأقل اقرب من الكثير .
المعهد
تكلفة المعهد للشهر 800 - 1200 دولار والأقل سعراً ليس اقل قدرة او اسوء بل اكثرها لها امكانيات قوية واغلب المعاهد داخل تقع في الداون تاون (وسط المدينة )
الأمان
مدينة فانكوفر آمنة جداً ولا يوجد اي مضايقات , حتى النساء المتنقبات بها لا احد يضايقهم ما بالك بالرجل
اتمنى لك التوفيق

السماري .. الله يبيض وجهك كفيت ووفيت ..
وعندي أسالة لك ياشيخنا يومك رديت علي .. اببلشك
السكن المنفرد .. هل عندهم زي عندنا عماير كلها شقق
ام ان كل اللي عندهم عائلات تاجر شقق او غرف ..
يعني بمعنى طال عمرك انا ابغى اخذ لي شقه صغيرة
غرفه وصالة .. او استديو .. مستقل ماهو ببيت احد
بعمارة تكون كلها شقق .. ماهو ببيت المالك .. وش رايك ..
لاني صراحه عجزت لااتخيل نفسي داخل طالع على غرفة
بوسط بيت الناس
لي الله عنها
ترا والله عن جد مانستغني .. ومابيني وبينك الا المعروف
ودعوة بظهر الغيب

مساكم الله بالخير
اخوي المتفائل
نظام التأجير في هالدول يكون بعقد واغلبه يكون لمدة طويله شهور واطول
اقتراحي عليك تسكن مع عائله افضلك
او فندق رخيص يأجر بالاسبوع عشان مايطلع عليك غالي
تحياتي

اهلا بصاحبنا سترينجر
والله يابن الحلال .. السكن عند الفرنجه ماقبلت به ابد ..
لا العيشه مثلهم ولا الطبع طبعهم .. ولا حتى انت مرتاح بصلواتك ..
والصبح ابصلح قهوتي .. وابضبط التمر .. والفله قبل الدوام ..
وبلا خواجات بلاهم ..
(حنا عريبيا فيا كونتريس)
المهم ياطويل العمر اني لقيت موقع كندي يهتم بشغلة الشقق شهر وشهرين وكذا ..
بحاول اني القا فيه شقه صغيرة ..
اما الفندق فمشكله الفنادق انها نظام يومي .. وراح تكون غاليه اكيد ..
وان خربت طال عمرك .. سوينا اعلان عن روم ميت ..
ولقطت لي صيني .. وسكنت معه .. والصبيحه تلقاني ضابط الدله وعيون الصيني
تقل عيون بس
والله لاخليه يرجع للصيني (لحيه غانمه )

الله يسعدك ياصاحبي
شوف دام انت واصل الى كندا ، ترا والله بعيده البلاد
انا شوري عليك دام معزم على كندا ، انك تخليها الى امريكا ،،
الديره فيها كل اللي تبي من كل شي سكن و معيشه ومعاهد
وسفارتكم لها قنصليات في نيويورك بالشرق وهيوستن بالجنوب الاوسط ولوس انجلوس في الغرب
هذا غير السفاره في العاصمه
والمعاهد اكثر عدداً
والجو متباين فيه البارد وفيه الحار وفيه المعتدل
شاور عمرك وردلي خبر كانك تبي تحول على بلاد العم سام
تحياتي

اهلين ياعم .. والله يبن الحلال لا أخفيك سرا .. تراها متساوية
بمجرد اني اطير من مضارب بني يعرب .. فوين ماوجهت توجه ..
خصوصا وانني لن اذهب لاصحابي وان كان منهم احد هناك ..
ابغى اكون لوحدي حتى اصير بلبليشن ( اسم الفاعل من بلبل)
وفكرة كندا .. اتت لان تورنتو مشهورة عندنا بالعايلة .. من كثر الشله
هناك .. ويقولون ان فانكوفر خياليه .. فاتت الفكرة ..
وإلا فلست مربوطا بكندا نهائيا ...
ومن هذا المنطلق دام ظلك .. ان كانت امريكا تحقق لي -بحسب خبرتك-
اللغة الجيدة والسعر الاوفر .. او حتى الحياة الارخص في اي مدينة ..
فما عندي مانع ابد ..
(وبقولك سر قايله فوق ..
)
اني اول مابدأت للتخطيط فكرت بالهند لانها رخيصه بس اني قلت ياولد ماظنتي بالهند بتتعلم لغة .. وماهضمت الفكرة ..
وعيب علي وسط العٌربان اقول رايح للهند ..
واعتبرك اقنعت احدهم .. وهو في انتظار سوالفك .. الجميلة
شكلي حبيتك .. فان حبيتك طلبت سلف ..
(شفت وشلون المحبه غاليه )

المتفائل 112
الأمور ليست صعبة
اذا نويتوا بلغوني وسوف ابحث لكم عن معاهد و شقق مناسبة وان شاء الله الأضاع على مايرام
حيث يمكن ايضاً ان ابحث لكم عن شقة يكون صاحبها مبتعث وسيذهب الى السعودية لمدة شهر لزيارة اهله ثم يعود , وبهذا تكون تخلصت من شيء يسمى عقد
اي سؤال انا في الخدمة
اخوكم / عبدالله الاسمري

اخوي عبدالله الاسمري .. الطيب والمعروف ليس مستغربا من الكرام ..
جزاك الله خير على تعاونك ..
وانا لااخفيك انني ان شاء الله 90% جازم وكلمت كذا معهد علما اني ماراح اقدم من خلالهم
بس حبيت اعرف لمحه عن اسعارهم .. وكنت متوقع ان عندهم اسعار خاصه او ان لهم خصومات من المعاهد واكتشفت انهم يدخلون المواقع ويعطونك نفس السعر !!!!
عموما انا راح اكمل اجراءاتي بنفسي ..
وانا بجي ومنسق اجازاتي على دراسه بنتي واقدر اطلع من 11 اكتوبر يعني 25-11 هجري
والعودة ان شاء الله اول شهر واحد يعني على 20 نوفمبر تقريبا
فان كان احد من الشباب طالع هالفترة تكون سويت في معروف ..
لان وانا اخوك فيه فرق انك تروح تدور .. او لما تسافر تدري انك رايح مكان محدد ..
وانت لاتشغل نفسك .. على مهلك .. معنا وقت لسا .. ماودي والله اشغلك ..
شاكر ومقدر لك جهدك ومعروفك على راسي اخوي .. الله ييسر امرك

الله يسهل لك '
قبل المجيء الى فانكوفر اتصل علي او ارسل لي رساله قبلها بشهر كحد ادنى ''
التواصل هنا مع الأشخاص يتم بالرسائل عن طريق النت او رسائل هاتفية ،، من اجل اخذ موعد .
لأ اعدك ان كل شيء سيكون جاهز ومكتمل على الآخر ولكن اعدك ان ابذل قصار جهدي ،
سأحاول ان ارسل رقمي على الخاص ان امكن حيث ان مشاركتي قليلة ، واخشى ان لا استطيع ارسال رسالة خاصة وان لا يصل الرقم ..
ابلغني هنا عن المعاهد التي ترغب فيها ، حتى اذهب اليها واسأل عن مستواها و عن سعر الدراسة لديهم ..
وسوف ابحث لك في اكثر من معهد عن اسعار الدراسة لديهم لمدة شهر .
والسلام عليكم