سراييفو المسافرون العرب

أكتشف العالم بين يديك المسافرون العرب أكبر موقع سياحي في الخليج و الوطن العربي ، يحتوى على أكبر محتوى سياحي 350 ألف استفسار و نصائح عن السفر و السياحة, 50 ألف تقرير سياحي للمسافرون العرب حول العالم و أكثر من 50 ألف من الاماكن السياحية و انشطة وفعاليات سياحية ومراكز تسوق وفنادق، المسافرون العرب هو دليل المسافر العربي قبل السفر و اثناء الرحلة. artravelers.com ..
ThE PrOGraMmEr
13-12-2022 - 02:25 am
  1. اخواني...السلام عليكم ورحمة الله وبركاته

  2. وعلى الأرياف القريبة من سراييفو

  3. ومنطقيا...الارياف ابرد من المدينه نفسها سراييفو


بسم الله الرحمن الرحيم

اخواني...السلام عليكم ورحمة الله وبركاته

الصراحه انا ما عندي اي خبرة في كتابة التقارير....ولا حتى نسبة بسيطة من خبرة بعض الأعضاء عندنا في المنتدى هنا ما شاء الله عليهم ...
وانا اساسا ما كان عندي نية اني اكتب موضوع عن سفرتي للبوسنه...بحكم ان ما عندي معلومات كافيه للأعضاء ...لكن بعد ما تبيّن لي ان المواضيع اللي تتكلم عن البوسنه في هالقسم قليله....قلت ممكن تكون معلوماتي البسيطه هذي مفيده لأخواني هنا
وبحكم خبرتي...الشبه معدومه في الكتابه ...راح اخلي الموضوع كأنه سواليف في مجلس لأني بصراحه ما عندي خبره في هالمجال...عشان كذا اللي بيجي على بالي ابكتبه على طول..يعني بيكون فيه لخبطه وبعثره في المعلومات...تحملونا عاد
بعد ما اخلص الكلام والسواليف والقرق عليكم ... راح احط لكم الصور واعلق على كل وحده منها
راح اقتبس من بعض ردودي على الاعضاء...سواء بالرسائل الخاصه او في رد لي في احد المواضيع...وراح اطرحها مع رسالة الشخص نفسه اذا كانت عن طريق رساله خاصه....فأستأذن اصحاب الرسائل الخاصه..ابحط اسئلتكم هنا واجوبتي عليها..لعلها تفيد الأخوان هنا
فيه شغله بس احب انبه لها...الا وهي...اني للأسف ما اتذكر بعض اسماء الاماكن وبعض التفاصيل عن الرحله...بسبب ان الرحله صار لها سنتين الآن و ثانيا..اني ما كنت انا الشخص اللي مرتب الرحله...يعني كنت...بالعربي (ادربي راسي)
بسم الله نبدأ
الرحله كانت صيف عام 2004 والتخطيط من الأساس ما كان يشمل البوسنه ابدا...كان مقتصر على ايطاليا وكرواتيا والنمسا...لكن
سبحان الله جت فجأه كذا...وصارت احلى محطة في الرحلة كلها
زيارتي للبوسنة كانت مقتصرة على سراييفو(هي اكبر مدينه فيها وهي المشهوره...وعلى ما اعتقد هي العاصمه )

وعلى الأرياف القريبة من سراييفو

فيه نقطه بس احب انبه لها...انا ما انصح ان الواحد يسوّي رحلة كاملة ويخصصها للبوسنة ...لأنها بالكثير اسبوع او عشرة ايام كفاية ...يعني ممكن الواحد يزور البلدان القريبه منها...مثلا كرواتيا...ملاصقة لها...لأكن للأسف بلد فاصخ...وين ما تمشي تلاقي شواطيء عراة
المهم...انا اقصد ان الواحد يحاول انه يدخل معها في البرنامج شيء ثاني
البوسنة..وتحديدا مدينة سراييفو....بلد نهاري...يعني الليل...ما تلقى احد ابدا....بالكثير صلاة العشاء وكل شي مقفل وفيها هدوء في حياتي ما شفت مثله
عشان كذا الله لا يهينكم خلوا النوم الى العصر في ديرتكم وانسوه في البوسنة
بالنسبه للجو هناك...معتدل وحلو مره والامطار كثيره والجو غالبا ما يكون غائم....يعني اتوقع كانت درجة الحراره تتراوح ما بين 26 الى 30 او 32 بالكثير

ومنطقيا...الارياف ابرد من المدينه نفسها سراييفو

بشكل عام البلد رخيصه...او بالاصح اقل من رخيصه بشيء بسيط...الفندق هو الشيء الوحيد اللي كان سعره عادي...او شبه غالي....الفندق اللي كنت ساكن فيه هو الهوليداي ان...وكنت ماخذ غرفه شخصين...بسريرين مستقلين..كانت بحوالي 600 ريال سعودي
طبعا بدون فطور
الفندق خمس نجوم ويبدو لي انه افخم فندق في سراييفو لأنها اساسا ما فيها فنادق كثير
الديره عموما حلوه جدا...خصوصا للي يحب الطبيعه ويحب يجرّب اشياء جديده....لكن كلها طبيعه يعني ما فيها مراكز كبيره ولا ملاهي ولا اي شي من هالقبيل
بالنسبه للخطوط...انا رحت من الرياض لروما بالخطوط السعوديه ما اذكر صراحه بكم كانت لكن من روما لسراييفو بالنمساويه كانت ب 400 يورو تقريبا


التعليقات (8)
ThE PrOGraMmEr
ThE PrOGraMmEr
  1. المكان برضه ما خلى من وسائل ترفيه للأطفال....مراجيح..نطيطات...خيول


نجي الآن لجزء اللي انا احبه الا وهو الصور ... بسم الله نبدأ
هذي الصور لمسجد من المساجد الكبيره في البوسنه ....وهي في المنطقه اللي قلت لكم...سراييفو القديمه
هذي صور لمطعم بارك برينسيفا اللي قلت لكم عنه...طبعا الصوره الأولى ماخذها من الموقع اللي اعطيتكم فوق عن المطعم
لقطة حلوة لعدنان وهو يناقش اخوي....في نفس المطعم
لقطات من المطعم فوق الجبل....لمدينة سراييفو...اسف الصور ماهي واضحه مره
الصوره هذي من سراييفو القديمه اللي قلت لكم عنها..ولاحظوا ان المنطقه شعبيه شوي...وشوفوا الغيمه كيف
وهذي برضه من نفس المنطقه...ولاحظوا كيف الحمام والف على الناس وما فيه احد يزعجه....لكن ليس مع وجود ولد اختي النشبه ...شوفوه الصغير اللي جنبي (لابس كحلي ورا العربيه)...وانا ما شاء الله علي حبيب جالس أأكل الحمام من يدي الكريمه
لو تلاحظون وراي....مطعم الشاورما اللي قلت لكم عنه
الصوره هذي اخذتها وانا في الطريق بين البوسنه...واحد الارياف او الجبال ما اذكر والله...يعني هذي على الطاير في الطريق
صورة لولد اختي البثر...في الكوفي شوب اللي قلت لكم عنه
فيه شي منتشر كثير في البوسنه...الا وهو...مطاعم تقدم لحم مشوي بنفس الطريقه اللي يشوون فيها المطاعم البخاريه عندنا الدجاج...بالعربي دجاج شوّايه...لكن هذا لحم شوّايه
تفضلوا صورة الضحيه المسكينه
عدنان مع زوج اختي....ولحظة انقضاض على الضحيه المسكينه
احد ضحايا المطعم المعمرين
الصراحه المطاعم هذي لحمهم حلو مره...وغالبا هي تكون في مناطق برا المدينه شوي...يعني مثل الثمامه عندنا في الرياض
لكن مره من المرات طحنا في واحد من هالمطاعم كان مش ولابد
بحكم ان تقنلاتنا كانت كثيره ما بين المدن وما بين البوسنه وكرواتيا....فكنا نشوف مناظر في الطريق روعتها لا توصف وهالصور السابقه من ضمن هالمناظر...مثل طريق الرياض الدمام بالضبط ...الحمدلله على كل حال
صوره من احد المطاعم على الطريق بين سراييفو وكرواتيا
صورة لأخوي....في منطقه ما هي ملك لأحد لأنها بين كرواتيا والبوسنه....ما احد له كلمه علينا
صورة لأحد الشلالات...كان عند مطعم...فيه مزرعة سمك....يعني فريش...طازه...الحين يصيدها لك....ثلث ساعه على صحنك ...ولا تشيلون هم...هالنوع من المطاعم منتشر هناك يعني مهوب مطعم واحد بس
كان فيه مكان...صراحه انا اعتبره احلى مكان رحت له في البوسنه...كان زي المنتزه...كله انهار وشلالات وينابيع رايحه وينابيع جايه
وبط واشجار...يعني شي لا يوصف بصراحه...وحتى الصور ما توفيه حقه...والصور هنا عشان اعطيكم فكره...ولا اقدر احصر جمال هالمكان بكم صوره...ولا حتى شريط فيديو كامل...على كل حال...هالمنتزه كان يبعد تقريبا نص ساعه او 25 دقيقه عن سراييفو...وكان جنب جبل...بس وش اسمه ما ادري
تفضلوا الصور
المبرمج يشرب من ينابيع البوسنه العذبه ...الصراحه في حياتي ما شربت مويه احلى واطعم وابرد من هالمويه
باردة لدرجة انهم يستخدمونها في تبريد المشروبات مثل ما تشوفون في هالصوره
ثلاجات طبيعيه
لقطة حلوه...حبيت اشارككم فيها....كل شيء كوم...وصوت الشلالات كوم
المكان كان فيه بحيره...خياليه...والله ولا في الأحلام...وكان فيه تأجير قوارب تجديف بالأرجل في هالبحيره...صراحه روعه تمشي بين الشجر وتحتك حتى في المويه شجر...يمينك بطتين يسارك سمك المكان لا يوصف
انا رحت لهالمكان مرتين....والمره الأولى ما كنت اشوف اللي قدامي ب 4 متر.....مهوب غبار زي السعوديه:112: ...لا... ضباب
لكن المره اللي صورت فيها هي المره الثانيه...وما كان في ضباب ...كان الجو مشمس مثل ما تشوفون في الصور

المكان برضه ما خلى من وسائل ترفيه للأطفال....مراجيح..نطيطات...خيول

برضه بعد ما طلعنا من المحل...لقينا خيول تجر عربات...وركبناها ...صراحه روعه....تمشي بك وسط الغابات الجبليه ...وبين البيوت الريفيه...وكان سعرها رخيص...لكن عيبها الوحيد...الريحه...لأن المنطقه كلها خيول رايحه جايه...عشان كذا الريحه مره شينه من وصخ الخيول الله يكرمكم
صوره لواحد من الويكند هاوسز اللي قلت لكم عنها

صور لفندق الهوليداي ان اللي كنت ساكن فيه
صوره لسراييفو من احد الجبال.....والمنظر نفسه بالضبط اللي تشوفه من مطعم بارك برينسيفا
صوره ثانيه...احترافيه...طبعا مهوب انا اللي مصورها...بدري علي
وبكذا نوصل لختام تقريري المتواضع
اعذروني على بعثره وعدم ترتيب المعلومات...وبرضه على قلة المعلومات....المعذره على القصور....اتمنى اكون افدتكم ولو بالقليل...وانا تحت امركم...وأي اسئلة باللي اقدر عليه انا تحت امركم...
اشكركم على متابعة تقريري
في انتظار ردودكم...لا تفشلوني عاد
" سبحانك اللهم وبحمدك ، أشهد أن لا إله إلا أنت أستغفرك وأتوب إليك "

shabib
shabib
مشكور على هذا الجهد الرائع

shabib
shabib
مشكور على هذا الجهد الرائع

almubarak
almubarak
تصدق ان كتابه تقريرك بهذا الاسلوب أفضل مليون مرة لانة كتب بطريقة مبسطة ومرحة
بس بصراحة تقريرك -اقصد السوالف-روعة وشدني موضوعك وأكثر شي
واكلهم حلو مره....خصوصا اللحوم عندهم...واو..لأن الديره خضره..عشان كذا البقر هناك مبسوطين مره
وحرك القهوة مع السكر
اما الصور فهي في غاية الروعة والجمال وخاصة هذة الصورة سبحان الله الخالق

تقبل مني كل التقدير والاحترام
أخوك ،،،، مبارك

نغم الحياة
نغم الحياة
روعه
اكثر مما تصورت ,ماشالله عليك كفيت ووفيت
ولي عوده مع الأسئله بإذن الله

KABAYAN
KABAYAN
ما شاء الله تبارك الرحمن
جيت على الجرح و جبت لنا تقرير لا يستطيع ان يكتبه الا الكبار امثالك ،،،
حبيت اسألك يالغالي عن الامن هناك و المعيشة هل هي غالية و كيف التعامل على الحدود بينها و بين كرواتيا ،،،
و تقبل تحيات اخوك
كبيان

ThE PrOGraMmEr
ThE PrOGraMmEr
shabib
العفو اخوي....وشرفتني بمرورك وردك

ThE PrOGraMmEr
ThE PrOGraMmEr
almubarak
يشرفني اخوي ان اسلوبي البسيط....نال اعجابك
والروعه والجمال...جمال اخلاقك اخوي...


خصم يصل إلى 25%