- اقلكم اللي هذا اوله ينعاف تاليه بطلت باقعد ماني مسافر....
- قالو ابركها ساعة قر في بلدك احسن لك.
من العنوان ماعندي شي مفيد او مرتب مجرد ثرثرة فاللي عنده شغل يمشي احسن له طبعا اكتب اليوم لاني خلصت الانشطة المقررة لهذا اليوم بدري وما عندي شي فقلت اقرقر شوي على رؤوس العرب المسافرون.
قد يستغرب الكثير من العنوان هل في الصين سياحة
خصوصا وان معظم التقارير في المنتدى وغيره من المنتديات السياحية التي مررت بها كانت تتحدث عن التجارة وبالتالي كوانزو وشينزن وايوو وشلتها وبعض التقارير هنا او هناك عن السياحة.
الصين في خاطري من زمان وعندما سنحت لي فرصة وبدات اقرا عنها حقيقة كانت مشكلة اللغة عائقا كبيرا لي لاني كما قرات ان اكثر الشعب ميح عنجليز.
لما ابحرت اكثر وجدت شركات تقدم خدمات سياحية متكاملة لكن الخوف من النصب والاحتيال والصين من ما سمعنا وقرانا يكثر فيها النصب والاحتيال.
الموهم راسلت اكثر من شركة وبعد اخذ ورد وقع الاختيار على الشركة رقم واحد في تصنيف tripadvisor وذلك لانهم اعطوني افضل سعر.
اتذكر عندما علم بعض المعارف عن السفرة قالو لي رايح تتاجر انت ووجهك وبعضهم قال شد حيلك ترى بتصير غني اما الذين زارو الصين فكان كلامهم: اكيد كوانزو وشينزن, اما الاهل فالوالدة الله يطول في عمرها قالت ابغى دوا لركبي يقولو عندهم ادوية تصلح الرجول (جمع ارجل بالمكاوي) ولا تنسى مر على سوق كل شي هذا اللي يقولو عليه خ (يحليلك يام محمد الله يجعلني فدوة لرجليك) قال سوق كل شي قال قال النيل قال خ
ام علي قالت هالله هالله بكسوة العيد ووحدة من قريباتي قاعدة تجهز لعرسها قالت اعطيك الفلوس تشتري لي الجهاز من الصين, وعمتي قالت والله محنا مستحين منك المرة هذه مو كل سنة تروح الصين هالله هالله بالهدايا السنعة.
اقلكم اللي هذا اوله ينعاف تاليه بطلت باقعد ماني مسافر....
قالو ابركها ساعة قر في بلدك احسن لك.
الموهم فين وصلنا طبعا الشركة تامن الفندق والسيارة والقايد والدخول للفعاليات وتذاكر الطيران والقطار. وانت تختار المدن اللي تبغاها والمدة ودرجة الفنادق والفعاليات اللي تبغاها ورسالة منك ورسالة منهم وتعديل منك واقتراح منهم ومرنين جدا ويقدمو نصايح جيدة وسريعي التفاعل (حلوة سريعي هذي). طبعا الصين اول بلد اتعامل فيه بهذي الطريقة عادتي اسوي كل شي بنفسي من حجوزات وفنادق وفعاليات. لكن قلت ياولد البلد ماهي غالية كل مرة تتعب وتسوي كل شي, جرب هالمرة تقط فلوسك بالشمس وتقعد في الظل وتدلع نفسك شوي. اللهم لك الحمد كما ينبغي لجلال وجهك وعظيم سلطانك ماندمت على هذا الامر الى الان واسال الله بفضله ومنه ان يتمم علي نعمته ويحفظني وييسر امري ويردني سالما غانما وكل مسلم.
ماراح اقرقر كثير عن السياحة لكن ذكر كثير من الاخوة مشكلة الاكل طبعا ما كنت شايل كثير هم لاني احب البحري وماتفرق معي طريقة الطبخ بل بالعكس احب اغامر خصوصا في الاكل واحب اجرب اكلات اي بلد ازوره. طبعا ارسلت للشركة اني ما اكل الا حلال عشان يخبرو القايد. طبعا كنت متوقع مطاعم سمك لكني صدمت حقيقة بتوفر مطاعم للمسلمين
ما اقصد مطاعم عربية لا اقصد مطاعم صينية والادهى والاجمل ان اكلهم مختلف عن اكل الصينين نوعا ما وقريب من اكلنا نوعا ما يعني ما بين وبين اجمل من ذلك اكلهم لذيذ ماشاء الله. لم تنتهي دهشتي عندما علمت ان الصينين انفسهم يحبون مطاعم المسلمين ويحبون الاكل فيها, ولم تنتهي الدهشة عندما علمت ان مسلمي الصين لا يطيقون ذكر الخنزير مجرد ذكر فضلا عن اكله, ولم تنتهي الدهشة عندما امتدح لي القايد (وهو ليس مسلم طبعا) لحم ذبائح المسلمين وانه يعتبر من اللحوم ذات الجودة العالية بالنسبة لهم, ولم تنتهي الدهشة عندما رايت الكتابات العربية في هذه المطاعم, ولم تنتهي الدهشة عندما وجدت مطعما للمسلمين في نفس الفندق الذي اسكن فيه وهو 5 نجوم وعلى اهم شارع في الصين......
خلاص انت واياه وش تطالعون انتهت الدهشة فك خشتك انت واياه
الموهم راح احط بعض صور الاكل يمي يمي في المشاركة الجاية اذا اتحملت الصور بدون مشاكل
اشوفكم على خير
