كوالالمبور المسافرون العرب

أكتشف العالم بين يديك المسافرون العرب أكبر موقع سياحي في الخليج و الوطن العربي ، يحتوى على أكبر محتوى سياحي 350 ألف استفسار و نصائح عن السفر و السياحة, 50 ألف تقرير سياحي للمسافرون العرب حول العالم و أكثر من 50 ألف من الاماكن السياحية و انشطة وفعاليات سياحية ومراكز تسوق وفنادق، المسافرون العرب هو دليل المسافر العربي قبل السفر و اثناء الرحلة. artravelers.com ..
ليـلك
17-12-2022 - 09:38 pm
بسم الله الرحمن الرحيم
بالبداية احب اوجه كل شكري وتقديري لهالمنتدي الراقي
وعلى رأسهم المشرفين ... وكل من شارك بكتابة
تقريره واستفدت منه بدون ذكر اسماء لاني مو حابه
انسى مجهود شخص يستحق الشكر بهالمنتدي....
وطوال شهور مضت ... كنت اتابع كل التقارير بصمت
واسجل ملاحظاتي اللي راح احتاجها بسفرتي
المنتظره للحبيبه ماليزيا...
وجا الوقت اللي ارد لكم الجميل ... ولكن هالمره
بيكون شكري لكم بتقرير... عن سفرتي اللي الحمدلله
كانت ناجحه ومن اجمل ايام عمري... يعني الله يعينكم
لاني ناويه على الهذره وراح اقول لكم بالتفصيل
عن الفنادق الجديده اللي حجزنا فيها وبالاسعار
والصور.. هذا غير المواقف اللي صارت لنا
وكدرت خاطرنا .. ماراح اخلى شي واتمنى تستمتعوا
بالتقرير .....
وقبل ما ابتدي بالتفاصيل... احب اشكر الأخ وافي بزمن
جافي اللي ساعدني ... لاني اول مره اكتب تقرير
وماعندي خلفيه بمواقع تحميل الصور وبرامج الكتابه
على الصور ...فجزاّه الله كل خير ماقصر...
البدايه راح تكون بتاريخ السفر والعودة :
موعد سفرتنا ::
الاثنين 31 – اكتوبر - 2011
العوده ::
السبت 12 – نوفمبر - 2011
فكانت سفرتنا باجازة الحج ... واحنا قاصدين نروح
بالهوقت بالذات لان الرطوبه تكون خفيفه ...
وهالشهريكون موسم امطار في ماليزيا ..
والحمدلله توقيتنا كان رائع. . الامطاركانت كل يوم
واوقات تكون خفيفه وساعات ... لا والله قويه مره
وغزيره...
والشي الاهم ... انه مايكون فيه زحمة مصطافين مثل
الصيفيه ونقدر ناخذ راحتنا بكل مكان ... مع ان شفنا
عوائل سعوديه بس مو كثيرين اوقات نصادفهم حتى
الاجانب مره قليلين ...
وطبعا حجزنا على الخطوط السعودية قبل سفرتنا ب 7
شهور .. وحصلنا وقتها عرض تذاكر لشخصين
ب 3800 ريال ... وقصينا التذاكر على طول ....
وكمان الفنادق والطيران الداخلي كله قبل ب 7 شهور
حجزناها ... وهالشي اللي ساعدنا نلاقي اسعار تناسبنا
ومخفضه .
وعن طريق البوكينق حجزنا الفنادق .
وكان مخطط رحلتنا كالأتي ::
1) سيلانقور >> فندق امبيانا ,,,, يوم واحد
310,35 رنقت
2) لنكاوي >> villa molek ,,, فيلا يومين
0رنقت
3) لنكاوي >> bay view,,,, يوم واحد
1رنقت
4) بياننق >> royal penang ,,,, يوم واحد
6رنقت
5) الكاميرون هايلاند>>> فندق الكاميرون هايلاند,
, يومين 1164 رنقت
6) كوالالمبور >>some rest ampang ,,, اربع
ايام ب 1080رنقت
ومثل مو شايفين بعض الفنادق جديده ... ماسبق وشفت احد كاتب عنها ... وبصراحه اعتمدت في اختياري لها
على تعليقات الزوار لهالفنادق في موقع بوكينق .... وقلت
لزوجي هالشي .... وشاف الفنادق وعجبته ... وهالشي
طمني عشان لو طلعت الفنادق مو حلوه مايقول انتي
السبب ... راح يكون معاي وبيتحمل اختيارنا
ومالي دخل انا بس الحمدلله طلعت ممتازة الفنادق
وراح اكتب بالتفصيل كل شي عنها وعيوبها واكيد
بالصور كمان .
وفيه شي ثاني حابه اقوله لكم .. بخصوص الماسترد
كارد ... وقتها حجزنا كل الفنادق بالماسترد حقت اخوي
لان بطاقتنا تأخرت ماطلعت بسرعه ... وكنا خايفين
بصراحه من هالشي لان حجز الفنادق كان بأسم زوجي
والماسترد كانت بأسم اخوي ... وخفنا لايسبب هالشي لنا
مشكله لمن نوصل هناك .... بس الحمدلله كل الامور
كانت ميسره ولا سألونا اصلن ... لاننا كنا ندفع كاش وما
استخدمنا بطاقتنا خليناها معانا للأحتياط
اما الطيران الداخلي حجزنا على الاير اسيا::
1) من كوالالمبور الى لنكاوي ب321 رنقت .
2) من لنكاوي الى بياننق ب 240رنقت.
يعني 561 رنقت .. وماكان عندنا وزن زائد لانه اخترنا
وقت الحجز 20 كيلو وماتجاوزنا هالوزن .
مع ان زوجي كان حاب تكون روحتنا من لنكاوي
الى بياننق بالفيري بس ماعجبتني الفكره لاني ماشفت
احد مدح الفيري ...
وشفت تقارير فيها صور للفيري خوفتني زياده حشى
مو سفينه كأنها باص وعاد انا اخاف من البحر مووت
وبدت الافلام براسي والهواجيس ... لو غرقنا لاسمح
الله ما اعرف اسبح... واكيد فيه اسماك قرش و
مت خوف وانا بعدني ماسافرت ...وقعدت اقنع
زوجي انها ماتصلح وماهي مريحه ...
وطويله الرحله ومن هالكلام...
حتى اقتنع الله يسعده .... وحجزنا بالايراّسيا
وارتاح قلبي من البحر وهواجيسه...
وكلفتنا سفرتنا كلها بالفنادق والطيران الداخلي 18
الف ريال ...و للان مو مستوعبه حسيت صرفنا اكثر
بس ربي بارك لنا بهالفلوس وكفتنا وزود ...
ومرت الايام ووصلنا لليوم المحدد للسفر وكنا قبل
السفر بيومين حولنا الفلوس الى رنقت ...
وطبعنا حجز الفنادق وحطيت بكل ظرف حجز
كل فندق مع فلوسه وعملت حساب التأمين
0رنقت طبعا خارج حسبة الفندق .... وكمان جبت
الاوراق الصفرا الصغيره وكتبت فيها عنوان كل
فندق بالتفصيل مثل ماهو مكتوب بورقة الحجز
حتى رقم التليفون حطيته من باب الاحتياط
وسبحان الله احتجنا لبعض عناوين الفنادق لانها جديده
ومو كل التكاسي يعرفوها ..فنعطيهم الورقه ويعرفوا
المكان على طول ...
وهذي جوازاتنا مع الكروت الصفرا اللي استخدمتها
لعناوين الفنادق .
والحين ابرجع لموعد سفرنا ..
لكن قبل السفربكم اسبوع ارسلوا لنا الخطوط
السعوديه ايميل ان موعد اقلاع الرحله تأجل
وصار الاقلاع 11ونص بدال من الساعه 11 ليلا
فكنا خايفين لايصير شي ونكتشف بالمطار تاخر
الرحلة كم ساعه كمان ... بما ان هالشي صار لبعض
الناس وتأخرت رحلاتهم ساعات .
والحمدلله مشى الحال واقلعت الطياره بالوقت المحدد
وكانت الرحلة 8 ساعات و مره متعبه خصوصا للي
مايقدر ينام بالطياره مثلي ...
وزعوا لنا وجبات بالطياره وكانت الخدمه ممتازة
صراحه ماشفت فيهم شي ... انتقدهم عليه .
ووزعوا كروت دخول ماليزيا قبل وصولنا بكم ساعه بس
للأسف مالحقنا ناخذ كرت خلصت وقالوا لنا بالمطار
نعبي الكروت ... عاد ماباليد حيله ماعندنا الا نستنى
حتى ونوصل للمطار ونعبي الكروت .. ومرت الساعات
طويله علينا وحنا متلهفين نشوف ماليزيا
اللي الكثير يتكلم عنها وعن جمالها واخيراً
وصلنا وبدت معالم ماليزيا تبان .. يالله ما اجملها ..
مو متعودين على هالمناظر الخضراء والبحر اللي
لونه غير .. ياناس حتى البحر غير
مناظر روعه ومو مصدقين متى تهبط الطياره
ونشووف ماليزيا ....
وصلنا للمطار وكان بتوقيتهم على وحده بعد الظهر ... واعذروني ماقدرت
اصور شي من التعب والارهاق وبعدها
رحنا للكاونترات عشان
مطابقة الجوازات والبصمه
ومره كان زحمه جلسنا ساعتين حتى وجا
دورنا ...
وبصمنا واخذنا العفش ورحنا بعدها
لكاونترات التكاسي ..
واخذنا تاكسي ب 100 رنقت لفندق
امبيانا
ومرينا على السليكوم واخذنا شريحة ب
0رنقت ... وطلعنا من المطار
وماصورت بالبدايه لاني مو مصدقه
اني بماليزيا وكمان السواق
مره مسرع ومايمديني اصور شي .. تقولوا
وراه شي بس اتوقع يبي يوصلنا
عشان يرجع المطار وشاد حيله
بالسرعه ..بس قدرت اصور هالمكان اللي
يوقفون فيها عشان يدفعون ضرائب ....
وطبعا لان السواق وقف قدرت اصور مو
شطاره مني ههه
وصلنا للفندق وارتحنا شوي على طول
تحمسنا ننزل نكتشف من حول الفندق
راح التعب والكسل كله بدقايق.. . وبما ان
الاكوريا قريبه من الفندق
قلنا نبدا مشوارنا الماليزي فيه... ونزلنا
وقلنا يعني اكيد بنلاقيه وبنكتشف بأنفسنا
مكانه ... ونمشي ونمشي وندور عليه
ونروح يمين ويسار ...
وضيعنا الطريق بس مره متعه حتى لو
تضيع هناك متعه .. كل شي حولنا اول
مره نشوفه فعادي نضيع ونتفرج ... وش
ورانا ... واللي زود فرحتنا المطر
يازينه من استقبال ... والجو روعه
وغيوم ...مع ان وقتها ماكانت معانا
المظله وتبللنا بس كويس ان المطر كان
خفيف... وخفنا يزداد المطر ونتوهق
فقررنا نستسلم ونسأل عن الاكوريا ودلونا
عليه ... اتاريه كان قريب وكنا نروح بكل
اتجاه الا باتجاه المركز
عاد خشينا وقصينا تذاكر الدخول90رنقت لشخصين وانبسطنا ... المكان حلو
ويستاهل الواحد يروح له .. وذي بعض
الصور لان مره كان مليان ماقدرت اصور
كثير ..
.
وبعد ماخلصنا من الاكوريا ... تفرجنا
على المركز وطلعنا من باب مدرى كيف
وصلنا له ههه .. نمشى ورا خلق الله
ولقينا انفسنا بحديقه البرجين وجلسنا فيها
ووقتها خلاص على المغرب والجو
روعه بعد المطر وجلسنا نتأمل الطبيعه
محرومين حتى من الحدايق ما عندنا
بديرتنا .. واخذت ذي الصور
واكتفى بهالجزء حاليا لاني تعبت صراحه
وراح اكمل بجزء جديد ...واللي اتمنى
يكون هالجزء خفيف عليكم ...


رحلتي الى ماليزيا
التعليقات (9)
عاشق الخالد
عاشق الخالد
بداية جميلة ورائعة
لازلنا نطمع في المزيد من الصور
حجز مقعد أول : )

قصر الخير
قصر الخير
شرح وافي .. وتقرير من بدايته ماله مثيل
بارك الله فيك اختي ليلك
حقيقة ادخلتينا جو رحلتك
كلام جميل وتفاصيل رائعة وتخطيط موفق ..
واصلي ونحن بالمتابعة
دمتي بود

أبوريتال
أبوريتال
بداية التقرير جميلة اتوقع بيكون التقرير رائع متابع لتقريرك

وافي بزمن جافي
وافي بزمن جافي
تقرير على طبق من ( حلا ) ... لعشاق ماليزيا
وحكايات ... أعادت الذكريات ... لأجمل اللحظات ...
هناك حيث ( تستوطن ) ماليزيا ... في أقصى الشرق الجميل ...
بداية ( قوية ) وممتعة ... أختنا المميزة ( ليلك ) ....
تقرير سيكون بأذن الله من أجمل التقارير ... وأروعها ...
ألف شكر على ( الوفاء ) ... والثناء ... والدعاء ...
وبأنتظار ماتبقى من الحكاية ... للنهاية

ليـلك
ليـلك
الاخ عاشق الخالد .... مشكور على مرورك وان شاء الله راح يكون فيه الكثير من الصور بالاجزاء الجايه.
الاخ قصر الخير .. سعيده بمرورك اخوي ومشكور على تشجيعك لي.
الاخ ابو ريتال .. عسى يكون هالتقرير عند حسن ظنك .. كل الشكر لك.
الاخ وافي بزمن جافي .. كل الشكر لك والثناء على هالكلام جزاك الله كل خير .

أبوالمهند
أبوالمهند
تقرير حلو ومفصل بالتمام على أعلى طراز وأحلى ذوق
يعني أنا نلبس على الجاهز تسلمين ربي يسعدكم
بس فندق إمبيانا في كوالالمبور التي جزء منها سلانقور
خاصة يوم قلتي قريب من الأكواريوم .. وحديقة البرجين
واصلي ونحن معك بس اعتقد سلانقور صار مفهومها عند الغالب
مقتصر على بيتالينج جايا وما حولها وفنادقها المشهورة
والعلم عند الخبراء هنا

ليـلك
ليـلك
ماقدرت اوقف وما اكمل هالجزء من اول ايامنا بماليزيا عشان يكون
الجزء الجاي خاص بلنكاوي ومغامراتها ...
وكنت وصلت لحديقه البرجين ... اللي جلسنا فيها مع نسمات الهواء العليله
وتغريد العصافير ... وبدأ الغروب واعجبني منظر البرجين واخذت هالصوره
وكنت واثقه ومتأكده ان البرجين راح يكون شكلهم بالليل ولا اروع
بس خلاص وقتها مغرب ورجعنا للفندق عشان نصلى ونرتاح شوي
ومثل ماوضحت بالاول فندقنا كان ... امبيانا
وحجزنا فيه يوم واحد بس ... لان ثاني يوم رايحين للنكاوي
ونسيت ماقلت لكم لمن وصلنا للفندق وعطيناهم اوراق الحجز ..
بعدها طلعنا للغرفه وانصدمت ان الاطلاله ماكانت على البرجين
مثل ماطلبنا ... ودقينا على الريسبشن وقالوا لنا ان بالحجز مو طالبين اطلاله على البرجين
وانا متأكده اني كاتبه بخصوص الاطلاله ... بس زوجي وقتها قال خلاص
مشيها اساسا هو يوم واحد بنجلسه ... واذا على البرجين بنروح لهم مشي مو لازم نشوفهم
من الشباك .... ولمن شفت زوجي عادي الوضع معاه خلاص ماعاد قلت شي ..
وهذي صور الغرفه
وهذا الحمام وانتم بكرامه
والاهم انه بشطاف ... وزوجي مستغرب مني اصور يقولي شتبين بالحمام تصورينه
واقوله عشان العرب المسافرون ابكتب تقرير ... وجلس يضحك علي يقول نشووف لمن نرجع
وبشكل عام الغرفه جدا نظيفه والاثاث مو قديم ... وانا كان اكثر شي يهمني
نظافه السرير ابي ريحة النظافه تفوح منه ... وعشان اكون مرتاحه وما اتفاجأ بشي باحد الفنادق
اخذت معايا شراشف واغطيه مخدات ... بس الحمدلله ما اضطرينا نستخدمها كل الفنادق نظيفه..
الموهم ... بعد ماصلينا المغرب والعشا رجعنا طلعنا من الفندق ورحنا للبرجين مشي
منها اكحل عيوني بمنظر البرجين اللي عشقته صراحه .. ومنها نتعشى بمركز سوريا كلس
و طبعا لمن تمروا على البرجين غصب غصب توقفوا .. ياهو منظر للبرجين بالليل
حبيته وصرت امشى واطالع فيه بس
.. وزوجي يقولي لاتصدمي بأحد وتفشلينا
ويحق لي شوفوا معاي بس
يا عسل جيتك ابي كاّس ... اسقيني كاسات الهناّ
وبالهنا اسقيني ساعه ... حتى لو اّضمى سنه
..ليت عندنا بالسعوديه مثله ...ماليزيا كوم وهالبرجين
كوم ثاني ..
وبعد ما كحلت عيوني بالبرجين ..خشينا المركزعشان
نتعشا واساسا اكتشفنا انه ما اكلنا شي غير وجبتنا
بالطياره... وما عااد اكلنا شي بعدها وما حسينا
بالجوع ابد .. الا لمن دخلنا المركز وشفنا المطاعم
وشمينا ريحة الاكل ... يمي يمي جعنا مرره بدقايق
واخذنا وجبه من ماكدونالدز وتعشينا ...
لفينا بالمركز وخطر ببالي نروح السينما... وبرضو
جلسنا نلف ونلف وندور وينها هالسينما ومحنا
لاقينها ....
قام زوجي يقولي اكيد ملخبطه مو بالمركز ذا السينما
وانا مصره اني قريت بالمنتدى ان السينما موجوده
قمت لمن شفت زوجي بدا يمل من االلف
سالت وحده بمحل عن السينما وقالت لي انها ماتعرف ...
ووقتها قلت بنفسي الظاهر
اني ملخبطه مو هنا السينما ... وقلت لزوجي اخر
محاوله بنسأل بالريسبشن اللي بالسوق واكيد بيعرفوا
وانا مصممه اني صح

ابوعبدالله ( الاسفار )
ابوعبدالله ( الاسفار )
الحمد لله على سلامة الاسفار
تقرير رائع من بدايته
متابعين الى الاخير

lover121
lover121
بداية مشوقه للقادم من التقرير
معلومات رائعة جدا
كل الشكر على المجهود


خصم يصل إلى 25%