السلام عليكم ورحمه الله...
طبعا هالسفره سميتها شهر عسل متأخر لأنه بعد زواجي ماسافرت اي مكان بحكم ظروفي الماليه الصعبه الي جاتني من تكاليف الزواج والله يعين باقي العزوبيه..
وبعد سنه ونص من زواجي قررت ان اسافر انا وزوجتي شهر العسل وخلينا بنتنا عند جدتها وعشنا شهر عسل حقيقي ولله الحمد...
طبعا بالبدايه سفرتي ولله الحمد كان ناجحه ولله الحمد بنسبه كبيره جدا جدا وفوق ماتوقعت..
ويعود الفضل لله سبحانه ومن ثم لأخونا الوافي في زمن جافي..الي فعلا شخص اسم على مسمى..
كان وافي معي في كل شي..وساعدني من التخطيط الاول للسفره والحجوزات طيران وفنادق وكل شي إلى مارجعت السعوديه..
وبصراحه تعبته معي بالإسئله والاتصالات بحكم انها اول سفره خارجيه لي..بإستثناء البحرين والكويت لأنهم جيراننا مااعتبر الذهاب لهم سفر..
عموما رحلتي كانت عباره عن 13 يوم يوم رايح ويوم راجع الصافي 11 يوم في ماليزيا..
وكانت الرحله عباره عن يومين في فندق الخيول الذهبيه في سيلانجور
يومين في فندق موتيارا في لينكاوي
ثلاثه ايام في الهوليدي ان في بيانغ او بينيق
اربعه ايام في كوالامبور في فندق استانا
الاقلاع كان يوم الخميس 12 ابريل من جده ‘لى الرياض ومن ثم إلى كوالامبور
الاقلاع من جده الساعه 7ونصف مساء ووصلنا 9 مطار الرياض
وعلى طول قصينا البوردينق وخلصنا امور الجوازات وكل شي وانتظرنا إلى الساعه 12 موعد اقلاع الرحله من الرياض إلى كوالامبور..
طبعا الرحله مدتها ثمانيه ساعات ونصف تقريبا من الرياض..
كنت متخوف اني بأتملل وبأطفش وراح اتعب تعب خرافي بس الحمد لله كانت هينه
وقضيت اغلب الوقت نوم وجرايد وافلام..
لحفظ خصوصيتك تم تعديل الصورة
الفوكس
هذه الورقه الي يوزعونها على كل مسافر..طبعا عبيتها عادي جدا وبعدين عند الوصول إلى مطار كوالا ختمتها منهم وانتهت مهمتها...
وهذه صوره للخريطه وتوضح طريق السفر...
طبعا جالس العب بولينق من الطفش..ههه
وهذه الوجبه..وكانت جيده نوعا ما..الحمد لله...
وهنا عند الاقتراب من كوالا..وشاطفين بياننغ..
وهذه الصوره الوحيده الي اخذتها من مطار كوالا..طبعا كنت مصدع وتعبان جدا وقلقان شوي على العفش ومفجوع نوعا ما..فما صورت صور كثيره..
استلمنا الشنط بعد ما جلست استناها اكثر من ربع ساعه..
بعدين رحت طلعت شريحتين ماليزيه لي ولزوجتي وبالتحديد من شركة دي جاي من احد المكاتب الموجوده وشحنتها وفعلها لنا وكل شي..
ورحت بعد كذا على المحل او الكشك حق التكاسي واخذت اصغر سياره والمكان إلى فندق الخيول الذهبيه وبسعر 100 رنقت تقريبا..
وياليت الكل ينتبه من الي يعرضون خدماتهم عليك ويسلخون الواحد بالسعر..
بعد ما ركبنا التاكسي وفي طريقنا إلى الفندق اخذت كم صوره على الطاير
طبعا وصلنا الفندق ومعايا رقم الحجز وكل شي..دفعوني تقريبا 300 رنجت حق التأمين
وكان الشيك ان حقهم ممتاز جدا ومافي اي تعقيدات..
واول ماطلعنا الغرفه الي كانت مطله على البحيره..
بصراحه اطلاله خرافيه جدا جدا..وهذه بعض الصور
يتبع....
النظافه غايه في الروعه..كل شي اوكي..بس واجهتنا مشكله بسيطه وهي انه كانت غرفتنا في الدور 17 وكان عندهم تصليحات في الدور 16 وانواع الازعاج والتكسير في النهار بس الليل هدوء طبعا..
طبعا لما وصلنا الفندق العصر..تعبانين ومنهلكين..اخذنا دش وروقنا..صارت الساعه 5 تقريبا
قلت لزوجتي لو نمنا الحين بنقوم نص الليل..مالها داعي النومه الحين..بس خلينا نخرج نتمشى شوي في الفندق..واخذنا كم صوره لحديقة الفندق واللوبي والممرات...
هذا مجسم مصغر للفندق...جميل جدا
طبعا..بعد ماخلصنا جوله..قلت لزوجتي..خلينا نريح شوي الغرفه ونصلي المغرب ونروح نتمشى شوي برى..
الحمد لله جاتنا طاقه ماشاء الله وقررنا الذهاب إلى اي سيتي..او ماتسمى بمدينة الاشجار المضيئه..
اخذنا تاكسي ورحنا هناك وخليناه ينتظرنا لين ماخلصنا وتعشينا ورجعنا معه وهذه بعض الصور
طبعا فيه بعض الالعاب بس ماتنفع الا للأطفال بصراحه..
ولكن الي استمتعنا فيه اكثر الاشجار المضيئه لأننا ماقد شفنا حاجه زي كذا من قبل
والشي الثاني الي دخلناه هو بيت الثلج وهو عباره عن مكان مثلج وفيه بعض المجسمات والكراسي والتماثيل وكلها ثلج في ثلج..اول ماتدخل يعطوك جاكيت تلبسه وتدخل..
استمتعنا بس بصراحه ماطولنا لأنه البرد ذبحنا وماكان عندنا قفازات ولا لبس يحمينا اكثر الا الجاكيت الخايس حقهم .. بس تجربه حلوه بصراحه..وهذه بعض الصور..
وبعدين خرجنا وتعشينا في مطعم عربي عندهم..واخذت لي رأس معسل وروقت..
ورجعنا الفندق وانتهى يومنا الاول الطويل جدا جدا جدا...
الرد القادم ان شاء الله..راح اقولكم وش صار ثاني يوم في ملاهي الصنواي لاقون والبراميد مول بالتفصيل ان شاء الله..
اتقبل انتقاداتكم وارائكم واطروحاتكم واستفسارتكم بصدر رحب...