استراليا المسافرون العرب

أكتشف العالم بين يديك المسافرون العرب أكبر موقع سياحي في الخليج و الوطن العربي ، يحتوى على أكبر محتوى سياحي 350 ألف استفسار و نصائح عن السفر و السياحة, 50 ألف تقرير سياحي للمسافرون العرب حول العالم و أكثر من 50 ألف من الاماكن السياحية و انشطة وفعاليات سياحية ومراكز تسوق وفنادق، المسافرون العرب هو دليل المسافر العربي قبل السفر و اثناء الرحلة. artravelers.com ..
الباحثة
01-09-2022 - 12:54 pm

السلام عليكم ورحمة الله وبركاته
كيف الحال خواتي وإخواني ..
أختكم الباحثه ودها إذا الله راد وسهل بسفره لأستراليا إن شاء الله و تبي تضبط أمورها من الحين .
فالكل يعلم بإن المسافه بينا وبين استراليا بعيده و الترانزيت لا بد منه عند السفر لها
إما بالتوقف ببانكوك أو سنغافوره أو ماليزيا .
لذا ممكن سؤال لو سمحتوا لي .......
من منكم جرب أن يسافر الي إحدي هذه الدول الثلاث أولا و من ثم يحجز من هناك
ليسافر لأستراليا ؟؟
و من منكم لديه معلومه عن الأوقات التي تقوم بها شركات طيران تلك الدول بعروض من ضمنها تخفيضات السفر لأستراليا ؟
إن كان هناك فيكم من جرب فكم سعر التذكره تقريبا ؟؟و هل فرق السعر كبير عنه
لو حجزنا من ديرتنا ؟؟
  • * فمن لديه خبره أو معلومه الرجاء أن يفيد إخته الباحثه و لا يبخل عليها **

تحياتي..............


التعليقات (9)
SaudiMfls
SaudiMfls
مرحبا اختي
انا ما راح افيدك بشكل كبير لكن من الطبيعي ان التذكرة من بلدك ولو فيها وقفة ارخص من اصدار تذكرتين
وعلى حد علمي ( علمه هذا من فبراير الماضي) فالتذكرة من المنامة الى سدني عن طريق بانكوك على التايلاندية هو 3300 ريال فقط واظنها الارخص على الاطلاق
والاقرب اظن على طيران الامارات الرياض دبي سدني وهو خط جديد وما اعرف اسعاره لكن ما اظنه اقل من 5000 ريال

عبدالعزيز
عبدالعزيز
وعليكم السلام ورحمة الله وبركاته
هلا والله باختى الكريمة
الباحثة
بالنسبة لا صدرا تذكرتين بمعنى من الكويت الى بانكوك ومنها الى سدنى فيهي غالية كما ذكر اخوي سعودي ..
وكذا بالنسبة للماليزية والسنغفورية...
على اي حال.. كل ماكان اصدار التذكرة قبل السفر بوقت اكبر كل ما طلعت التذكرة بسعر اقل...
مثلاً لو بتسافرين الى سدنى على طيران الامارات والسفر بيكون خلال هالاسبوعين القادمه فسيكون السعر بحدود 5000 الاف ريال...ولو السفرة بعد شهر او شهرين مثلا نقصي ما يقارب الالف ريال وتصير 4000 ريال
على كل حال عندك...
طيران الامارات ... الكويت - دبي - سدنى...والعوده نفس الشئ.. تستغر الرحلة متواصلة من دبي دون توقف ما يقارب ال 14 ساعه...
طيران الكاثي بسيفيك... الكويت - هونج كونج - سدنى... طبعا لازم تمر على كولالمبور او جاكرتا..
طيران الماليزي الكويت - كولا لمبور - سدنى... وهذا يغلب علية التوقف في ماليزيا لوقت لا يقل عن 20 ساعه ويحجزون لك فندق خلال هذا الوقت على حسابهم...
طبعا جميعها اسعارها ما تقل عن 3500 ريال الى 5500 ريال وكما ذكرت حسب وقت الحجز فكلما كان الوقت مبكر كلما كان السعر اخفض ... والله الموفق ورحلة سعيده...امل انى اكون قد وفقت في اجابتى عن جزء من الاستفسار...
مع تحياتى
الخواطر

طيف الورود
طيف الورود
وعليكم السلام ورحمة الله وبركاته
كيف حالك اختي / الباحثة............
بالنسبة لي انا العام الماضي رحت لاستراليا ، وكانت تذكرتي من المدينة الى جده ومن جدة الة كوالا لمبور ((على الخطوط السعودية)) وبعدها حجزنا على الخطوط الماليزية من كوالا لمبور الىاستراليا ((بريزبين)) .......
مع العلم ان الحجز كان من المدينة قبل نسافر ضبطنا الحجز على الخطوط السعودية وعلى الماليزية ، وسافرنا كل امورنا اوكي ............بس لازم الواحد بعد مايوصل ماليزيا يتاكد من حجوزاته مرة ثانية ويشوف هل كل شي تمام او لا.....
وكان سعر التذكرة ((5600 ))ريال سعودي...............
اتمنى اكون افتدك ..........وياليت اذا عندك اي استسفار تتفضلي فيه وان شاء الله اقدر اجاوبك.

الباحثة
الباحثة
السلام عليكم ورحمة الله وبركاته
بارك الله بالجميع و مشكوريين ويعطيكم العافيه
وما قصرتوا على التفاعل والمشاركه
اخوي SaudiMfls معاك حق الواحد لو بيحسبها سعر تذكرتين + الاقامه والتنزه والتسوق بتايلند والا ماليزيا فلو نحط كل هالفلوس على استراليا يكون افضل ..
لكن هو مجرد تساؤل طرحه ابو العيال وحبيت تشاركوني بالاجابه عليه وخصوصا انا حبينا نعرف موسم الخصومات على الطيران التايلندي والماليزي ؟؟.
مشكور اخوي الخواطر على هالمعلومات الطيبه والي اول مره اعرفها :rolleyes:
طيب هالطريقه في الخصم متبعه عند كل شركات الطيران والا شي وشي ؟؟
طيب اذا بحجر من شهر يناير والسفر بشهر يوليو شكثر بيخصمون لي اكيد فيه نسب
و الا بتطلع التذكره ببلاش على هالحاله
وبالنسبة لطيران الكاثي بيسيفك انا ملاحظه انه كثار يروحون عن طريقه لاستراليا لكن حسب ما سمعت بانهم يبالغون بتقديم الكحول للمسافرين لدرجه انه الريحه من الصعب تحملها .. فهل هذا صحيح ؟؟؟
يا حيا الله اختي طيف والحمد لله على السلامه وماقصرتي حبيبتي على الاهتمام والمشاركه الحمد لله انا بخير
و تسلمين والله ..
بالنسبة ل 5600 سعر تذكرتي السعوديه + الماليزيه طبعا .
بس من الواضح انكم مكثتوا بماليزيا كم يوم ولم تكن ترانزيت فقط والا الرحله راح تكون متعبه خصوصا مع اضطراركم لتغيير الطيران .
و على هالحاله تعتقدين شكثر بتكلفنا الرحله اذا مكثنا بماليزيا كم يوم
و كنا 6 افراد ؟؟شامل الفندق + تنزه + أسواق .
بيني وبينج ودي أمر على ماليزيا ولهت عليها ;)
على فكره شلون تعامل أهل أٍستراليا معاكم ....اوكي والا مش ولا بد ؟؟
خبرج تعرفين احنا عرب وما ادراك ما العرب
تحياتي ..............

طيف الورود
طيف الورود
ههه حلوة عرب وماادراك مالعرب.........
والله شوفي اختي احنا شخصين انا وزوجي ، بس التذكرة ذهاب وعودة من المدينة لجدة لماليزيا لاستراليا 5600 ريال للشخص لي انا فقط...............
اما عن المكوث بماليزيا احنا وصلنا في يوم ونزلنا هاذاك اليوم بفندق الخيول الذهبية لانة اقرب شي للمطار ومن البكرة تمشينا شوي وبعدين رجعنا للفندق وجمعنا اغراضنا وعلى المطار كانت الساعة 7 المغرب رحلتنا يعني جلسنا يوم وكم ساعة بماليزيا، بس عاد بعد ماخلصنا من استراليا قلنا نسترجع ذكرياتنا الماضية بماليزيا وجلسنا فيها 6 ايام بين كوالا لمبور وجينتنج يومين في جينتنق والباقي كوالا لمبور يومين قبل جينتنق ويومين بعدها ..........
وسكنا في البداية في دورست مشينا حالينا والباقي في مندرين اوينتال ((لايفوتك)) وجينتنق في جينتنق ......
بس الصراحة الرحلة ماكلفت كثير ابدا .........
اما عن الاستراليين والله طيبين وماشفنا منهم غير كل خير اخلاق وتعامل وخدمة وكل شي كل شي كان تمام ، واساسا استراليا فيها عرب ماتخافيش وكان فيها سواح كمان من غير المتغربين................
اتمنى اكون وصلت لك اللي تتمنية ، واذا فية اي شي مو واضح تفضلي ان شاء الله اقدر افيدك .................
وعلى فكرة اجلسي لك كم يوم بماليزيا عشان ماتحسين من ملل الطيران يكون افضل .........

الباحثة
الباحثة

هلا باختي طيف اي والله سالفتنا سالفه احنا يا العرب صرنا بالسفر نمشي ونتلفت حوالين نفسنا , نخاف ليكون فينا شي مو طبيعي و غير الناس .و شنو هلي يخلي هالامه يخترعون منا ؟؟
الا تعالي قوليلي احنا شفينا غير ؟؟؟ ;)
الحين انا خل اخلص من استراليا يا طيف ادخليني بماليزيا انتي شناويه علي بس
والله هالديره احبها وايد و فعلا فعلا احس مستحيل اروح استراليا وفيه ترانزيت عليها وما امر .. بس ان شاء الله تضبط السالفه والله يهدي ابو العيال و يطاوع والا انا ما عندي مشكله كلش
و بالنسبة لفندق ماندرين اورينتال وين هو بكوالالمبور ؟؟
لاني جربت الدبليو ماريوت فيها و كان رائع مستوي وخدمه وموقع .
فاذا ممكن تفيديني عن الي ريحكم فيه ..بس اشوف شطينا عن استراليا و حولنا على ماليزيا .
عموما ما قصرتي على هالتجاوب الطيب حبيبتي ولا تحاتين اي شي ابيه بسإلج و بنشف ريجج بالاسئله بس لا تنحاشين ديري بالج ..
تحياتي .............

طيف الورود
طيف الورود
الله يسعدك يااختي / الباحثة .........
ايش رايك نروح نسالهم هم وش شايفين فينا ،يمكن اخذين على خاطرهم مننا في شي وحنا ماندري ههه...
المهم فندق مندرين موجود بكوالا لمبور بجانب التوين تاور تطلعين من باب الفندق تلاقين نفسك قدام باب البرجين جدا رائع موقع وخدمة وكل شي زي نفيه ........بس على قولك خلينا نخلي ماليزيا بحالها شوي ونطب علي ساحتها في يوم ونهلكها استفسارات وحكي............................................
امري اختي امر ، تدللي ، كل شي يتعب بالانسان الا الكلام ،الفم مايتعب من كثره.....

الباحثة
الباحثة

ما يا مر عليج عدو حبيبتي طيف عسي الله يسلمج ادري انج ما تقصرين
و صج اختي راحت لأستراليا و ممكن تفيدني بس ولو مستحيل أستغني عنكم
و عن توجيهاتكم ,, فلابد راح اسئلج و اسأل الجميع و بوقتها عن اشياء كثيره اذا الله
اراد و سهل لنا الروحه .
مثلا عن الشقق ,, الفنادق ,, الاماكن الي تنصحوني فيها للتنزه
و ايضا ما راح انسي اسإلج عن مذوب جيوب الرجال و محبوب النساء الا وهو
السوق ..;) وشنو الي تنصحيني اشتريه من هناك ؟؟
فجهزي ورقه وقلم اذا ما عليج كلافه من الحين وحطي فيها كل المطلوب والي يورد على بالج من A الي Z..
و شيفكج من الباحثه .
تحياتي ............

القلب الكبير
القلب الكبير
ما شاء الله تبارك الله وش هالاسئلة المفيدة من الاخت الباحثة والاجابات الوافية من المتميزة طيف .
كل الشكر لكم واستراليا في الحسبان وان شاء الله نجمعها هي وماليزيا بسفرة وحدة .
تحياتي .


خصم يصل إلى 25%