- بسم الله الرحمن الرحيم
بسم الله الرحمن الرحيم
انا توني جاي من لبنان وكانت الرحله لمدة 5 ايام وبصراحه من خلال هالرحله اكتشفت ان لبنان بشهر 2 تكون احلى واحسن من الصيف....الاسباب ان جوها حلو وممتع والصلج بصراحه يعطيك احساس عجيب... مع ان رحت الى كذا مكان وكان مسكر وقالي راعي التكسي ان لا تفتح هذه الاماكن الا بالصيف...ويكون كل مكان زحمه وين ما تروح تلقى ناس واجد والديره تصير غاليه كثير...فأكتشفت ان احسن وقت لها يكون بشهر 2 لانه يعتبر الموسم الشتوي ولما تتمشى فيها الجو حلو وممتع
بخصوص النصائح اللي اوجها الى المسافرون الى لبنان....لاتنخدع مع البائعين في الاماكن السياحيه ....لأنهم استغلاليين لأبعد الحدود وانا صارلي موقفين ولا اقدر انساهم
الاول: كان في اول يوم لي في بيروت كنا نتغدى في كافيه بتيت اللي على صخرة الروشه وبعدها قلنا خل ناخذ قارب ياخذ فينا جوله على الصخره والكهوف الموجوده بهذه الجبال....المهم وانا رايح امشي جانا شخص قال تعالوا ركبوا بالقارب بخمسين دولار قارب خاص فيكم ومحد يركب وياكم قلت اخر شي على شاني بكم؟ قال على شانك من دون مصاري.....قلت يالله تستاهل 50 دولار....و احنا كنا 4 اشخاص انا والوالده و زوجتي و اختي....قال لنا تبون اجيبلكم سياره تنقلكم الى القارب او تحبون تمشون؟ قالت الوالده لا خل نمشي....ولما خلصنا من الرحله وجيت احاسبهم...قالولي لا مو 50 دولار...الشخص 50 دولار!!!!!!!! حاولت فيهم مني مناك...ماكو فايده فدفعت ومشيت قلت زين ابي سياره تردنا لان المشوار مشي بعيد على الوالده...قالت اوكي يالله اركبوا السياره وقبل تمشي قالت ترى عشره دولار السياره والمشوار ما ياخذ دقيقتين...قلنا يالله امرنا لله ماكو غيرهم
المهم سألت راعي التكسي عن سعر الرحله بالقارب قال بالصيف حدها حدها توصل 75 دولار للقارب وليس الفرد
الثاني: كان بثاني يوم عندما ذهبنا الى فريه وهي عباره عن جبال والمدينه كلها ثلجيه وكان الثلج بصراحه عالم ثاني من الجمال والروعه ولا يوجد وجه شبه بين الثلج الحقيقي او الثلج اللي بالفريزر نفس اللي بدبي...عالم مختلف تماماً و من اجمل ما رأيت في لبنان واستشعرت.....المهم قلنا نبي نأجر سكيي دوو(جتسكي الثلج) ودانا راعي التكسي الى المكان اللي فيه الاجارات وقال هذا ارخص واحد موجود بهالمنطقه ولما نزلنا قالت الوالده انا ما راح اركب انتو روحو..فإستأجرنا 2 مع قايد ومع الملابس ولمدة ساعه ونص قالت لنا يطلع حسابكم 780 دولار وقلت سوولي دسكاونت قالت اوكي 750...يعني يطلع على الشخص 250 دولار ومني ومناك وانا بيني وبينكم كان اهم شيء عندي بالسفره ركوب هالجتسكي والتمتع بالثلوج المهم دفعنا المبلغ واستمتعنا ولما انتهينا قلت لراعي التكسي بكل صراحه ماتوقعت هالاسعار وغاليه جداً قال يالله مره بالعمر وبعدين هذا ارخصهم ولو اوديك اماكن ثانيه بتطلع فاتورتك بال1000 او اكثر وهذا رخيص لان المبنى ماله من حديد مو مبنى نفس البقيه على شان جذي اجاره رخيص!!!!!! المهم لقيت صاحبي بالتويتر حاط صور بنفس الوقت اهو بلبنان وبنفس اليوم اللي انا إستأجرت السكيي دوو اهو كان مستأجره ولما سألته عن سعره قالي يا عمي نصابيين انا خذيته ب150 دولار لمدة ساعه ونص مع الملابس....ولما دققت معاه طلع نفس اللي انا خذيته بالضبط وماكو اي فرق حتى بالسكيي دوو نفسه وصديقي ماخذ السكيي دوو نفسه بو نفرين. المهم بوجهة نظري ان كان في تعامل سري من سائق التكسي مع هالجماعه وكان من المفترض اقول له ودني الى مكان ثاني للأجار ما ابي اتعامل معاهم....وكان في مجال أوفر اكثر من هالمبلغ بكثير ولكن نظراً لإستعجالي وثقتي العمياء بصاحب التكسي بأن هذا ارخص مكان كانت هذه النتيجه...
عموماً هذه الاخطاء انا اتحملها كلها وحبيت ان محد يقع بنفس الاخطاء ولا يثق ثقه عمياء او يصفي النيه معاهم وبصراحه الشعب أمين ولكن بعض الاشخاص النصابين والاستغلاليين يخربون سمعة البلد ويخلون الناس يكرهونهم...انا صارلي اكثر من موقف بصراحه حبيت لبنان بسببهم
الاول: طلب مني راعي التكسي قيمة المشوار ب20 وعندما وصلت الى وجهتي قدمت له عشرين دولار قال لا ابي 20 الف ليره....وكان من المفترض ياخذ العشرين دولار ويسكت لانها تساوي 30 الف ليره
الثاني: دخلت اشتري رصيد تلفون وحسابه كان 19 الف ليره وعطيته مية دولار وكانت المية لازقه بمية ثانيه يعني 200 دولار وانا مو منتبه ولا بالي معاه وقاعد اشوف المحل وكان من الممكن ياخذها ويسكت ولكنه رجعها لي وقالي انت عطيتني 200 دولار وليس 100 دولار
الثالث: كنت امشي وفلوسي في مخباة(جيب) بنطلوني الخلفيه وكان مبلغ كبير و كلمني احدهم وقالي دير بالك المصاري لا تطيح منك
عموماً لبنان حلوه وجوها حلو و وقتها بشهر 2 اكثر من الحلو وانا رايحلها لمدة 5 ايام وبصراحه استمتعت بها...وكان سائق التكسي ممتاز ولكن عيبه الوحيد انه يتعامل مع اصحاب المكاتب ويجيب زباين لهم ويعطونه عموله على كل زبون(وانا هذا ظني فيه وقد اكون مخطئ ولكن دفاعه المستميت عنهم هو ما يجبرني على ظني فيه)...ولكنه كان محترم ولا يسكت وعطانا الكثير من المعلومات اللي ما تقدر بثمن وأخذنا الى اماكن كثيره ايضاً لا تقدر بثمن...ويستحق الثناء في هذا المجال ولكن عيبه الوحيد ان احساسي في عملية رحلة الثلج كانت سلبيه تجاهه وعلى شان جذي اقول الحذر وعدم اعطاء الثقه ولا تحسين النيه معاهم وان شاء الله راح تستمتعون بلبنان لانها بلد جميل
لبنان صحيح غالية خصوصا اذا شافونا رفعو الاسعار وغلو علينا كل شي بس اللي يعرفلها يمكن يغير كلامه
ودير بالك على حالك في سفراتك الجاية وتقبل تحياتي