- هاذي صورة قبل لاندخل على لييج شوفوا جمالها اشلون سبحان من صورها
- ترى كل هالصور واحنا للحين في السياره كله علشان بس انروح للباركنق
رائعه هي كالحلم فكيف في الشتاء جمالها لايكاد ان يغيب عن بالي أحببتها تعلقت بها احسست انها قريبه لقلبي وبنفس الشعور هي بادلتني كنت كالطفله خالية من الهموم بها نسيت كل من في عالمي امرح اضحك تحت ثلجها المنهمر كنت احاول الاختباء منه لكني اعود له كم هو رقيق ثلجها عندما يلامس وجنتي .. صغيره بحجمها كاحجمي احسست انها توأمي كأني اعرفها منذ زمن ألتقينا بعناق وفرح وبهجه كم اتمنى لو نلتقي مره اخرى أحب ان أقول لها اني لان انساها ولن تغيب عني يوما وساذكرها لانها هي من بعثت البهجه والفرح لقلبي الصغير شكرا بروكسيل.. سنلتقي يوما
حبيت اشارك هاذي البوابة العزيزه على قلبي موضوعي الصغير والمتواضع وللاسف قليل الصور عن بلجيكا الحلم وحبيت اتشوفون معاي جمال الشتاء فيها وارجع اعتذر عن قلة الصور وفي نفس الوقت حبيت أعيشكم معاي الحلم الجميل حتى لو بصور قليله يكفي انكم تحسون باحساسي اللي حسيته لما كنت فيها
الرحله كانت بتاريخ 2_2_2012م لغاية 5_2_2012م من كولون المانيا انطقلنا في الصباح الباكر لها وكان الجو رائع
هذا كان بداية الطريق وكنت مبسوطه كثير وفرحانه لاني واخيرا بشوف بلجيكا ماعرف ليش من كنت صغيره اسم بلجيكا يعني لي واهتم له واحب اعرف اي شي عن هالبلد واعيوني كانت طول الوقت على الدريشه انتظر ندخل للرائعه بروكسل
في البدايه دخلنا منطقه قبل بروكسل واسم المنطقه Liege (لييج )المنطقه حلوه اتحسونها قرويه كثير حبيتها بس للاسف مادري ليش ماصورت اتوقع البرد كان له دور كبير لاني اذا بجي اصور اضطر افصخ قفازي واذا فصخت قفازي يدي تتجمد علشان كذا كنت اتكيسل اني اصور كل شوي واطلع كيرمتي من شنطتي اعذروني
هاذي صورة قبل لاندخل على لييج شوفوا جمالها اشلون سبحان من صورها
المهم بعد شفنا المنطقه سالنا عن مطعم ينفع لنا لان كنا ميتين جوع ماكلنا اي شي بس شربنا كابتشينو والوقت كان تقريبا 1 ونص الظهر سالنا شخص هناك وهو دلنا على السنتر وانا صورت بس صورة وحده للسنتر وحصلنا مطعم ايطالي كان جيد واصلا ماطولنا في سنترها بس تغدينا وعلى طول حركنا على بروكسل
المهم لما قربنا ندخل بروكسل صار اللي تمنيته الدنيا قامت تثلج ومب اي ثلج ثلج قوي روعه بكل معنى الكلمه
اتمنى ان الثلج يكون باين لان الصور كانت من تلفوني
شوفوا اشلون دريشتي صارت الناس ماعاد اتبين من قوة الثلج
شوفوا شكل الشارع اشلون صار
وفجأه حصلنا مظاهره سوريه مساكين عسى ربي يفرجها عليهم يارب في هالثلج القوي والبرد قاعدين يتظاهرون
لاحظوا اشلون الثلج قام يقوى اكثر واكثر لدرجه ان شعر الناس قلب لونه ابيض وحواجبهم ورموشهم
والشارع تعطل السيارات وقفت في مكانها صار الموضوع شي ينرفز احنا حاجزين في فندق شيرتون ولما وصلنا قالوا لنا صفوا انتو في الباركنق احنا توقعنا ان هم اللي بيصفون لنا سيارتنا تخيلوا قعدنا ساعه والباركنق حده قريب من الزحمه مب قادرين نوصل له السيارات ماكانت تمشي .. مفروض بما ان هاذي حياتهم ومب اول مره يجيهم ثلج يكونون متعودين على الثلج بس اللي شفته ان الشارع تعطل والسيارات ماعاد مشت وجات الشرطه .. عقب اكثر من ساعه تحركت سيارتنا زوجي حده تنرفز اللي يسوق يحترق اكثر من اللي قاعد ومرتاح ويصور
ترى كل هالصور واحنا للحين في السياره كله علشان بس انروح للباركنق
والحمدالله بعد عناء وزحمه غير طبيعيه وصلنا ووقفنا سيارتنا تحت وطلعنا فوق للفندق وكان حلو ونظيف حسيت فيه بالحياه لان لما كنا في كولون سكنا في فندق هو عباره عن قصر قديم صحيح كان حلو بس كلش مافيه حياه واتحسون بضيقه فيه غير طبيعيه بس لما رحنا شيرتون حسينا بالفرق الواحد ابدا ابدا مايضيق صدره من كثر الناس والعالم والحياه اللي فيه
ولما وصلنا غرفتنا صورت لكم هالمنظر الحمدالله كانت اطلالة غرفتنا حلوه
للحين الشارع متعطل بس الزحمه صارت اقل عن لما كنا احنا متعطلين
اكمل معاكم عقب لاني دخت نوم انتظروني ان شاءالله في الجزء القادم
ياحبيبتي بلجيكا روعه وصدف بنفس وقت وجودك فيها كان زوجي هناك للعمل وخصوصا بلييج وازيدك من الشعر بيت يمدحها وطاير فيها يقوولي ابداا ماتوقعتها كذا ,, لول
وحاالف يمين يوديني لها قريب ...وبروكسيل احلى واحلى
للاسف
بلجيكا بلد مظلوم سياحيا عندنا انا شخصيا وبرايي الشخصي اتوقع السبب ان مافي رحلات لها دايركت من الخطوط السعووديه بالنسبه لنا كسعووديين
ولا بلجيكا وجهتي القاادمه باذن الله