أسعد الله صباحاتك بكل الحب أخوي فهد ..
وكل عام وروحك الرائعة بألف خير وصحة
ننتظر سيدي الكريم ...
أن تكمل لنا باقي التقرير ...
وأن تكتب لنا كل ملاحظاتك القيّمة عن ماليزيا بشكل عام وعن كوالا بشكل خاص ...
حتّى تعمّ الفائدة وتكون متاحة للجميع ...
أما الفنادق فقد قمت بالفعل بكتابة تعليق على فندق سويس قاردن
وسأكتب ردي ورأيي في موضوعك الآخر
دمت بود

الحمدالله علي السلامة اخوي فهد
وبنتظار باقي التقرير

الحمدلله على سلامة الوصول
واقصر رحلة بالمنتدى
نرجو ان تزودنا بتفاصيل كاملة لرحلة مع التكلفة

الحمد لله على السلامه
منتظرين تقريرك يالغالي

الحمدلله على سلامة الوصول ياfahad1976
والله يعين . تغيرت كوالالمبور تحديدا ليس نحو الافضل بل للاسف نحو الاسوء . .
انتظرني في موضوعي عالرابط:
https://artravelers.com/p/re/657170

1. تحية طيبة اشكر الجميع على المرور والاهتمام بتقريري البسيط


2. نبداء بسرد الرحلة

تحية طيبة اشكر الجميع على المرور والاهتمام بتقريري البسيط

نبداء بسرد الرحلة

اليوم الاول كان استراحة بعد عناء السفر ورحلة استكشافية سير على الاقدام للمنطقة المحيطة كما هي العادة عند كل سفرة وفعلا موقع الفندق كان جيد جداً ولكن يعاب عليه شيء للمسافر معه عائلته وخاصة اطفال صغار ان الفندق يقع في نهاية شارع العرب ويفصل بينه وبين شارع العرب طريق رايح جاي يمر فيه باصات بشكل كبير ودبابات ويعتبر خطير الى حد ماء للي يبي يقطع الشارع خاصة الاطفال الفندق سويس قاردن كان فخم الى حد جد ونظيف وتصميم الشقق ممتاز جداً ومناسب
اليوم الثاني كان مخصص لزيارة حديقة الحيوانات ( زو نيجارا ) الحديقة رائعة جداً واطفالي انبهروا مما شاهدو وكانت هادئة وممتازة للاطفال مشوار التاكسي كلف تقريبا 50 رينجت طبعا بعد ما تخرج من الحديقة راح تلقى تكاسي كثير بالانتظار ولكن خذ بالاعتبار ان التاكسي الواقف بالانتظار دافع دخولية لسيارته تقريبا 5 رينجت راح يحسبها عليك انا من حظي الحمد لله لقيت تاكسي ينزل راكب عند الباب الخارجي واتفقت معه مباشرة وقلت له انت اوفر اقل شي ب 5 رينجت كانت تكلفة العودة اقل من الذهاب لكن لا اذكر السعر كم
اليوم الثالث كان لزيارة حديقة الاسماك وقبلها رحنا لسوق بيبي سنتر للبحث عن فني يصلح الكاميرا الجديدة الي شريناها للرحلة والي خربت قبل السفر بيوم وكنا ندور بعد خياط ، المهم بعد ما انتهينا دورنا تاكسي عند السوق وافقت معه على العداد واخذنا لفه طيبه قبل يودينا لحديقة الاسماك عشان يحسب تكلفة اعلى والله اعلم ، وزرنا حديقة الاسماك كانت جيدة جداً انا زرت من قبل حديقة مماثله باندونيسيا ولكن هذي افضل بكثير واكبر ، حقيقة ما اذكر كم كانت الدخولية لكن سعرها معقول جداً وبعد ما انتهينا من الحديقة دخلنا على منطقة بيع الهدايا واشترنا اشياء بسيطة للذكرى وخرجنا على منطقة المطاعم الخاصة بالبرج وكنت ادور محل اسمه روتي بوي سمعت انه بالبرج وسألت عاملين بمحل ستار باكس وعطوني وصف غريب لسوق سوريا انا ما اعرف وشو قبل لكن قالو انه يبعد ربع ساعة مشي على الاقل ، قلت اوكي بطلع من المكان هذا واشوف الوضع اذا قريب او بعيد طلعت من السوق مباشرة بوجهي سوق سوريا وليس كما قالوا حقين ستار باكس وفعلا لقيت روتي بوي والسوق كان تحفة فعلاً ويستحق 5 نجوم اسمه كي ال سي سي سوريا وبعد السوق وروتي بوي اتجهنا للسكن وكان المشوار 25 % من مشاور الذهاب رغم الزحمة وقت خروج الموظفين
اليوم الثالث كان لصن واي لاقون اخذنا تاكسي ب 50 رينجت وكان يوم رائع وغريب شوي يعني اول ما وصلت لقيت واحد صيني معلق بطاقة وقاعد يوجه عامل لتنفيذ عمل معين قلت اسئلة عن مكان قص التذاكر فقالي انزل مع الدرج الكهربائي هذا حقين التذاكر تحت وترى اليوم راح فتحون الساعة 11 الصباح ، تركته رحت لنفدق صن واي لاقون لقيت كاونتر التذاكر هناك ولقيت الملاهي شغالين من الساعة 10 الصباح ( مدري ليش الكذب من الصيني ) وتم شراء التذكرة باكيج كامل لثلاث مناطق الشاطيء الصناعي و حديقة حيوان صغيرة و منطقة الملاهي وكنت ناسي بعض الاغراض الخاصة بالسباحة واشتريتها من السوق التابع للفندق وكانت الاسعار غالية شوي لكن مضطر ، وعشان الوقت وخوف من نزول مطر يسبب اغلاق الملاهي وضياع الدخولية عليه حسب كلام الموظفة الهندية حقت التذاكر قلت بجرب كل شي وبسرعة فعلا لعبنا بالشاطيء وبعد كذا في لعبت الرماية بالاسهم وبعدين سألت الموظفة حقت التذاكر عن طريق الذهاب لمنطقة الملاهي قالت مالك غير الجسر المعلق وشلت الشنطة والعربية حقت بنتي وطلعت انا وزوجتي والاولاد وكانت رحلة شاقة وانكسر ذراع العربية ومعاناة الي وصلنا الجهة الثانية وبعد ما وصلت اكتشفت ان الموظفة كانت تكذب بعد وان في طريق ثاني للدخول من المدخل الرئيسي حيث في خيار انك تلف مباشرة لمنطقة الملاهي
الصن واي لاقون فعلا تحتاج يوم كامل على الاقل حتى لو كنت لحالك رائعة وكبيرة جداً
اليوم الخامس نكمل بعدين تعبت

faall
فعلا للاسوء كثير

طيب نكمل ولو على الاقل اليوم الخامس لان فيني نوم بس ما ودي اطول الموضوع والدعوة سفرة اسبوع
اليوم الخامس كان الى بورت ديكسون سويت تشيك اوت وحجزت تاكسي قبل بيوم من راديو تاكسي تقريبا واتفقنا على السعر 150 رينجت
ثاني يوم الصباح التاكسي وصل للفندق والسيارة نظيفة وجديدة والسواق ماليزي مسلم بعد ما مشينا قالي طبعا الشركة اعطوك خبر ان المشوار ب 250 رينجت ، بصراحة انا انصدمت منه وقلت انا لي كم يوم قاعد اعامل صينيين وهنود واحلم بيوم ان اتعامل مع مسلم وتطلع انت تسوي معي كذا !! انا متفق مع الشركة بالسعر هذا وبعدين انت مالك علاقة السيارة للشركة وهم موافقين بس الرجال مو مقتنع ومستحي مني بعد ، وانا بصراحة ما ودي اخرب رحلتي ابي استمتع بكل شي ، قلت شف انت مسلم يعني اخوي وانا ما ارضى ازعلك ولا ارضى اني ينلعب علي لكن بنتفق انا وياك اتفاق المشاور ب 150 رينجت وانا بعطيك هدية 50 رينجت بس بشرط انك توصلنا وانت مطيع وكويس معنا ونبسط منك بالمشاور وابشر بسعدك ممكن اعطيك اكثر بعد فالرجال وافق على طول وهو مبسوط وانا مبسوط ووصلنا وصراحة كان اأدب شي شفته بماليزيا بعد موظفي فندق بورت ديكسون طبعاً
وصلنا لفندق افليون بورت ديكسون وكان استقبال فيه تحفي وادب كبير والغرفة مباشرة جاهزة والخدمة روعة تطلب الشي بالتلفون ما يمدك تقفل الخط الا وطلبك عندك الابتسامة من العاملين بالفندق تلاحقك في كل مكان استغفر الله الواحد حس انه بالجنه من التعامل الرائع من العاملين بالفندق واي واحد تمر من جمبه لازم يسلم عليك وباحترام ويصبح عليك ناهيك عن الطبيعة الجميلة للمكان وخاصة انا من عشاق البحر فكان يوم ممتع بكل ما تعنية الكلمة من معنى وفي محلات قريب من الفندق للي حاب يشتري اغراض السباحة ورخيص جداً وقابلين للتفاوض بمنطقة بورت ديكسون والفندق يجهز رحلات صيد السمك للراغبين وانا كنت من الراغبين لكن لاننا عائلة وفي اطفال ما تحمست كثير والغيت الفكرة وفي بعد مكان ممكن تستأجر منه جت سكي ولكن مو تابع للفندق ، يعاب على بورت ديكسون المطاعم مافي خيارات رح للفاست فود او البيتزا فقط لا تفكر تروح مكان ثاني ابد لان ما في حتى اني سويت بحث بالنت عن افضل المطاعم ورحت لاحسن واحد ماخذ تقييم بصراحة انصدمت والله ولا حق مشاور التاكسي مطعم نظام حلة العبيد بالرياض حقين الراس المندي وقلت للتاكسي ما راح انزل هنا يا رجعني الفندق ولا نروح مطعم ثاني وقلت ابي اكل بحري ووداني عند احسن مطعم اكل بحري مطعم صيني ، غالي بشكل خيالي ولا هو نظيف ولا في خيارات كثير يعني بالعربي ما انصحكم فيه ابد رح لبيتزا هت افضل
ثاني يوم سوينا تشيك اوت الظهر ووفرلنا الفندق تاكسي ب 200 رينجت وسيارة نظيفة كان ممكن تكون مارسيدس ولكن المارسيدس طالعة مشوار جاوبا سيارة ثانية ما اذكر وشي لكن مرتبه وكنب جلد وحلوة ونظيف ومريحة عشان مشاور مثل هذا

اليوم السادس العودة لكوالا ورحنا للسوق الصيني والسوق ما تغير كثير علي من سفرتي السابقة قبل 17 سنة واشتريت من عندهم شنط للاب توب حلوة اعطاني سعر 250 رينجت قلت السعر ما يصلح لي بمشي قال لا تعال فاوضني ومسكني من كتفي قلت اول شي لا عاد تلمسني ؟ الشي الثاني انت سعرك بعيد مرة انا لو بدفع القيمة هذي اشتري شنطة اصلية ولو موب ماركة كبيرة يعني سمسونايت او دلسي وبعدين انت عارف ان الواحد منا يجي السوق الصيني عشان يلقى بضاعة مقلدة بسعر رخيص ، صح ؟
قال صح كلامك خلاص عطني سعرك انت قدرها قلت انا ب 60 رينتجت قال لا مرة سعر غير معقول ، قلت شف اجل اخر سعر عشان ما اطول عليك ولا راح ادفع اكثر من كذا 70 رينجت ،، وافق على طول وغلف الشنطة بس بصراحة حلوة
وبعد تي شيرت بولو اخذته ب 20 رينجت وانتهينا منهم وانتهى اليوم السادس
اليوم السابع والاخير كان لجنتنق هايلاند
وهذا ان شاء الله راح اكمل بعدين وراح اتكلم عن تكاليف الرحلة كاملة وتقييمي للبلد والتغير الحاصل من 17 سنة واليوم